ରାଇରଙ୍ଗପୁର: ଅତି ନିର୍ମମ ଭାବେ ଜଣେ 8ବର୍ଷର ନାବାଳକକୁ ହତ୍ୟା ଅଭିଯୋଗ । ଏଭଳି ଏକ ଅମାନବୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବାଦାମପାହାଡ ଥାନା ଅନ୍ତର୍ଗତ ବାସାଘୁଟୁ ଓ ତୁଣ୍ଟିପାଣି ଗ୍ରାମ ସୀମାରେ।
ମୃତ ନାବାଳକ ଜଣକ ବାସାଘୁଟୁ ଗ୍ରାମର ଦେବେନ୍ଦ୍ର ହେମ୍ବ୍ରମ ଓ ଜାବାନି ହେମ୍ବ୍ରମଙ୍କ 8 ବର୍ଷର ପୁତ୍ର ସନ୍ତାନ ଦଶରଥ ହେମ୍ବ୍ରମ। ସୂଚନା ଅନୁଯାୟୀ, ନାବାଳକ ଜଣକ ଗତ ଶନିବାର ଗାଁ ପିଲାମାନଙ୍କ ସହ ଛେଳି ଚରାଇବାକୁ ଯାଇ ଆଉ ଘରକୁ ଫେରି ନଥିଲେ। ଶନିବାର ଠାରୁ ନାବାଳକ ଜଣକ ନିଖୋଜ ଥିବାବେଳେ ପରିବାର ଲୋକେ ଖୋଜାଖୋଜି କରି ରବିବାର ବାସାଘୁଟୁ ଓ ତୁଣ୍ଟିପାଣି ଗ୍ରାମ ସୀମାରେ ଥିବା ରାସ୍ତା କଡ଼ରୁ କ୍ଷତାକ୍ତ ଅବସ୍ଥାରେ ମୃତଦେହ ପଡିଥିବା ଦେଖିବାକୁ ପାଇଥିଲେ ।
ଏନେଇ ବାଦାମପାହାଡ ଥାନା ପୋଲିସକୁ ଖବର ଦେବାରୁ ସୋମବାର ସକାଳୁ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଛାନଭିନ ଆରମ୍ଭ କରିଛି। ମୃତ ନାବାଳକଙ୍କ ମୁହଁ, ନାକ, କାନ, ହାତ, ଗୋଡ଼ରେ କ୍ଷତ ଚିହ୍ନ ରହିଛି । ଯାହାକୁ ଦେଖିଲେ କେହି ଦୁର୍ବୃତ୍ତ ନାବାଳକକୁ ହତ୍ୟା କରି ଫୋପାଡି ଦେଇଥିବା ସନ୍ଦେହ କରାଯାଉଛି ।
ତେବେ ବାଦାମପାହାଡ଼ ଥାନା ପୋଲିସ ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ ଟିମ୍ ମଧ୍ୟ ଆସିଥିଲେ। ସେପଟେ ପୋଲିସ ମୃତଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଡାକ୍ତରଖାନା ପଠାଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା , ଇଟିଭି ଭାରତ
