ରାଇରଙ୍ଗପୁର: ଅସୁରକ୍ଷିତ ଅବସ୍ଥାରେ ବଜ୍ରକପ୍ତା । ଦିନକୁ ଦିନ ବଢ଼ୁଛି ବଜ୍ରକପ୍ତା ଚୋରା ଚାଲଣ । ଏନେଇ ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଠାକୁରମୁଣ୍ଡା ରେଞ୍ଜ ଅଞ୍ଚଳରୁ ବିପୁଳ ପରିମାଣରେ ବଜ୍ରକପ୍ତା କାତି ଚୋରା ଚାଲାଣ ହେଉଥିବା ସମୟରେ ବନବିଭାଗ ଓ ବନ୍ୟପ୍ରାଣୀ ବିଭାଗ କର୍ମଚାରୀ ବଜ୍ରକପ୍ତା କାତି ଜବତ କରିଛି । ଏହାସହ ଏଥିରେ ସଂପୃକ୍ତ ୪ ଜଣ ଅଭିଯୁକ୍ତକୁ ଗିରଫ କରିଛି ବନବିଭାଗ । ତେବେ ଘଟଣାସ୍ଥଳରୁ ଅନ୍ୟ ୫ ଜଣ ଅଭିଯୁକ୍ତ ଫେରାର ହୋଇ ଯାଇଥିବା ବେଳେ ସାମାନଙ୍କୁ ଧରିବା ପାଇଁ ଚେଷ୍ଟା ଚଲାଇଛି ବନବିଭାଗ ।
ସୂଚନା ଅନୁସାରେ, ଉତ୍ତର ଶିମିଳିପାଳର କ୍ଷେତ୍ର ନିର୍ଦ୍ଦେଶକ ସମ୍ରାଟ ଗୌଡା ନେତୃତ୍ୱରେ ଦକ୍ଷିଣ ବନ୍ୟପ୍ରାଣୀ ବିଭାଗ କର୍ମଚାରୀ, ଠାକୁରମୁଣ୍ଡା ରେଞ୍ଜ ଅଧିକାରୀ କିଶୋର ପାଣିଗ୍ରାହୀ ଓ କରଞ୍ଜିଆ ବନଖଣ୍ଡର ବନ କର୍ମଚାରୀମାନେ ଠାକୁରମୁଣ୍ଡା କରଞ୍ଜିଆ ରାସ୍ତାର ପାଟବିଲ କୋଲଫିର୍ଟ ସାହି ନିକଟରେ ଏକ ଅଟୋ ଉପରେ ଚଢ଼ାଉ କରିଥିଲେ । ଉକ୍ତ ଅଟୋରେ ୯ ଜଣ ବ୍ୟକ୍ତି କେନ୍ଦୁମୁଣ୍ଡି ପଟକୁ ଆସୁଥିବା ବେଳେ ଅଟୋକୁ ବନ କର୍ମଚାରୀମାନେ ଅଟକାଇ ଥିଲେ । ବନ କର୍ମଚାରୀଙ୍କୁ ଦେଖି ଘଟଣାସ୍ଥଳରୁ ୫ ଜଣ ଦୌଡ଼ି ଖସି ପଳାଇ ଯାଇଥିବା ବେଳେ ଅନ୍ୟ ୪ ଜଣକୁ ବନ କର୍ମଚାରୀମାନେ ଧରିବାରେ ସଫଳ ହୋଇଥିଲେ । ଅଟୋ ଭିତରୁ ପ୍ରାୟ ୩ କିଲୋ ୬୦୦ ଗ୍ରାମ ଓଜନର ବଜ୍ରକପ୍ତା କାତିଥିବା ଏକ ବ୍ୟାଗକୁ ଜବତ କରିଛି ବନ ବିଭାଗ । ଏହାସହ ସେମାନଙ୍କ ଦ୍ବାରା ବ୍ୟବହୃତ ଏକ ଅଟୋକୁ ମଧ୍ୟ ଜବତ କରାଯାଇଥିବା ନେଇ ସୂଚନା ଦେଇଛନ୍ତି ଶିମିଳିପାଳର କ୍ଷେତ୍ର ନିର୍ଦ୍ଦେଶକ ।
