ବାରିପଦା:ମୟୂରଭଞ୍ଜ ଜିଲ୍ଲା ମୋରଡ଼ା ଥାନା ଅଞ୍ଚଳରେ ଜଣେ ନାବାଳିକାକୁ ଦୁଷ୍କର୍ମ ଅଭିଯୋଗରେ ଜଣେ ଯୁବକକୁ ଗିରଫ କରିଛି ପୋଲିସ । ପରେ ଅଭିଯୁକ୍ତକୁ ଡାକ୍ତରୀ ପରୀକ୍ଷା ପାଇଁ ପ୍ରଥମେ କିଶାନ ତାଣ୍ଡି ଡାକ୍ତରଖାନାରୁ ବାରିପଦା ପିଆରଏମ ମେଡିକାଲ କଲେଜ ହସ୍ପିଟାଲ ନିଆଯାଇଥିଲା । ହେଲେ ଡାକ୍ତରୀ ପରୀକ୍ଷା ହୋଇପାରି ନଥିବାରୁ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇନାହିଁ ।
ମୋରଡା ଥାନା ଅଞ୍ଚଳରୁ ଜଣେ ଆଦିବାସୀ ନାବାଳିକାକୁ ଗତ ୧୦ ତାରିଖରେ ଅପହରଣ କରାଯାଇଥିବା ତାଙ୍କ ଭାଇ ୧୨ ତାରିଖରେ ମୋରଡା ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ମାମଲା ରୁଜୁ ହୋଇଥିଲା । ପୀଡିତାଙ୍କ ଡାକ୍ତରୀ ପରୀକ୍ଷା ପରେ ତାଙ୍କୁ ବାରିପଦା ପିଆର ଏମ ମେଡ଼ିକାଲ କଲେଜ ଆଣ୍ଡ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ଏହି ଘଟଣା ପରେ ଏବଂ ଧାରା ୧୬୧ରେ ବୟାନ ରେକର୍ଡ କରାଯିବା ପରେ ଅପହରଣ ମାମଲାକୁ ଦୁଷ୍କର୍ମ ମାମଲାରେ ପରିବର୍ତ୍ତିତ ହୋଇଥିଲା । ଥାନା ଅଧିକାରୀ ଅଭିଯୁକ୍ତ ଝିଙ୍କିରିଆ ଗ୍ରାମର କାଳିଚରଣ ଓରଫ ସପନ ଗିରି (୨୬)ଙ୍କୁ ଗିରଫ କରିଥିଲେ । ପୋଲିସ ଅଭିଯୁକ୍ତକୁ ଗିରଫ କରି ଅଧିକ ତଦନ୍ତ ଜାରି ରଖିଛି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
