ବାରିପଦା: ଶିମିଳିପାଳ ଅଭାୟାରଣ୍ୟରେ ପୁଣି ଏକ ମାଈ ହାତୀର ମୃତ୍ୟୁ । ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଜାତୀୟ ଉଦ୍ୟାନ ରେଞ୍ଜ ଅନ୍ତର୍ଗତ କୋର ଅଞ୍ଚଳ ମଧ୍ୟରେ ମଙ୍ଗଳବାର ଏହି ହାତୀର ମୃତ୍ୟୁ ଘଟିଥିବା ଜଣାପଡିଛି । ହାତୀଟିର ବୟସ ପାଖାପାଖି ୪୦ ବର୍ଷରୁ ଊର୍ଦ୍ଧ୍ବ ହେବ ।
୫ ଦିନ ପୂର୍ବରୁ ବନ ବିଭାଗ କର୍ମଚାରୀ ପାଟ୍ରୋଲିଂ କରୁଥିବା ସମୟରେ ସମ୍ପୃକ୍ତ ହାତୀଟି ଅସୁସ୍ଥ ଅବସ୍ଥାରେ ଥିବା ଜାଣିବାକୁ ପାଇଥିଲେ । ତତକ୍ଷଣାତ୍ ପ୍ରାଣୀ ଚିକିତ୍ସକଙ୍କୁ ଖବର ଦିଆଯିବା ପରେ ଚିକିତ୍ସା ମଧ୍ୟ ଚାଲିଥିଲା । ହେଲେ ଅସୁସ୍ଥ ହାତୀଟିର କିଡନୀରେ ପୁଜ ଜମିଯାଇଥିବା ବେଳେ ସେପଟିସେମିଆ ରୋଗରେ ଆକ୍ରାନ୍ତ ଥିବା ଯୋଗୁଁ ଗତକାଲି(ମଙ୍ଗଳବାର) ତାର ମୃତ୍ୟୁ ହୋଇଛି ବୋଲି କହିଛନ୍ତି ବନ ବିଭାଗ ଅଧିକାରୀ । ମୃତ ହାତୀଟିକୁ ଆଜି ବ୍ୟବଚ୍ଛେଦ ପରେ ପୋତି ଦିଆଯିବ ବୋଲି ଜଣାପଡିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
