ବାରିପଦା: ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ “ମୋ ସରକାର’’ ଯୋଜନାକୁ ତ୍ବରାନ୍ବିତ କରିବା ପାଇଁ ମୟୂରଭଞ୍ଜ ଜିଲ୍ଲା ପୋଲିସ ତତ୍ପର ହୋଇଉଠିଛି । ମୟୁରଭଞ୍ଜ ଜିଲ୍ଲାରେ 'ମୋ ସରକାର’ ଯୋଜନାକୁ ଲୋକଙ୍କ ପାଖରେ ପହଞ୍ଚାଇବାକୁ ଜିଲ୍ଳା ପ୍ରଶାସନ ଅଣ୍ଟା ଭିଡ଼ିଛି । ବିଭିନ୍ନ ସରକାରୀ କାର୍ଯ୍ୟାଳୟ ଓ ଅଫିସରେ ଦଲାଲ ରାଜ ଅବସାନ ପାଇଁ ମୟୂରଭଞ୍ଜ ଜିଲ୍ଲା ପ୍ରଶାସନ ଅଭିଯାନ ଆରମ୍ଭ କରିଛି ।
ବାରିପଦା ଆଞ୍ଚଳିକ ପରିବହନ କାର୍ଯ୍ୟାଳୟରେ ଚଢାଉ କରି ୬ ଜଣ ଦଲାଲଙ୍କୁ ଗିରଫ କରି ଟାଉନ୍ ଥାନା ପୋଲିସ କୋର୍ଟ ଚାଲାଣ କରିଛି । ଗିରଫ ହୋଇଥିବା ଦଲାଲମାନେ ହେଲେ ପ୍ରିତମ ବାରିକ୍(୩୬), ସୂର୍ଯ୍ୟପ୍ରକାଶ ବେହେରା(୪୪), ଅମର କୁମାର ସେଠୀ(୪୯), ଜିତେନ୍ଦ୍ର ବିଶ୍ବାଳ(୪୬), ସଦାଶିବ ମହାପାତ୍ର(୫୫) ଏବଂ ସାଲୋର ରଞ୍ଜନ ପରିଡ଼ା(୪୬) । ବିଭିନ୍ନ ସମୟରେ ଯାନବାହାନ ଲାଇସେନ୍ସ ପାଇଁ ଆଞ୍ଚଳିକ ପରିବହନକୁ ଆସୁଥିବା ନିରୀହ ଲୋକଙ୍କୁ ଠକୁଥିବା ଅଭିଯୋଗ ହୋଇଛି । ଏହି ଦଲାଲମାନଙ୍କ ବିରୋଧରେ ଟାଉନ୍ ଥାନାରେ କେସ ନମ୍ବର ୨୩୭ ରେ ଏକ ମାମଲା ରୁଜୁ କରି ୧୮୬/୪୧୯/୪୪/୪୧ ଦଫାରେ କୋର୍ଟ ଚାଲାଣ କରାଯାଇଛି ।
ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜରେ ଶୁକ୍ରବାର ପୂର୍ବାହ୍ନ ସାଢେ ୧୧ଟରେ ଟାଉନ୍ ଥାନା ପୁଲିସ ଦ୍ବାରା ଚଢ଼ାଉ କରାଯାଇଥିଲା । ସରକାରୀ ମେଡିକାଲକୁ ଆସୁଥିବା ରୋଗୀଙ୍କୁ ବିଭିନ୍ନ ସମୟରେ ଘରୋଇ ହସ୍ପିଟାଲକୁ ସ୍ଥାନାନ୍ତର କରିବାକୁ ପ୍ରବର୍ତ୍ତାଇବା ଅଭିଯୋଗରେ ତିନି ଜଣ ଦଲାଲଙ୍କୁ ପୋଲିସ ଗିରଫ କରିଛି । ସେମାନେ ହେଲେ ସରୋଜ କୁମାର ଜେନା(୪୭), ଚିରଞ୍ଜିବ ଦାସ (୩୦) ଏବଂ ଦେବେନ୍ଦ୍ର ନାଥ ମୁର୍ମୁ (୩୮) । ସେମାନଙ୍କ ବିରୋଧରେ କେସ 236 ମାମଲା ରୁଜୁ କରି ୧୮୬/୪୧୯/୪୪/୪୧ ଦଫାରେ କୋର୍ଟ ଚାଲାଣ କରାଯାଇଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
