ମାଲକାନଗିରି: ମେଡିକାଲରୁ ଚେକଅପ ପାଇଁ ଯାଇଥିବା ବେଳେ ଚମ୍ପଟ ମାରିଲେ ଦୁଇ ଅଭିଯୁକ୍ତ । ଗଞ୍ଜେଇ ଚୋରା ଚାଲାଣରେ ମାଲକାନଗିରି କାଲିମେଳା ପୋଲିସ ୨ଜଣ ଅଭିଯୁକ୍ତଙ୍କୁ ଗିରଫ କରିଥିଲା । ଫେରାର ପରେ ଜଣେ ଅଭିଯୁକ୍ତଙ୍କୁ ପୋଲିସ କାବୁ କରିଛି । ସୂଚନା ଅନୁଯାୟୀ ଗତକାଲି ୨ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରିବା ପୂର୍ବରୁ ମେଡିକାଲ ଚେକଅପ ପାଇଁ ମେଡିକାଲ ନିଆଯାଇଥିଲା । ତେବେ ସେଠାରେ ଡାକ୍ତର ଚେକଅପ କରିବା ସମୟରେ ପୋଲିସକୁ ଧକ୍କା ଦେଇ ଫେରାର ହୋଇଯାଇଥିଲେ ଦୁଇ ଅଭିଯୁକ୍ତ ।
ଗତକାଲି ରାତିରେ ବୁଦୁଗୁଡା ନିକଟରୁ ଜଣକୁ ପୋଲିସ ଧରିବାରେ ସଫଳ ହୋଇଥିବା ବେଳେ ଏବେ ବି ଅନ୍ୟ ଜଣେ ଫେରାର ରହିଛି । ଧରାପଡିଥିବା ଅଭିଯୁକ୍ତ ଜଣଙ୍କ ହେଉଛି ମହାରାଷ୍ଟ୍ରର ଦୀପକ ପାଟିଲ ୱେବ । ଫେରାର ଥିବା ଅଭିଯୁକ୍ତ ହେଉଛି ମାଲକାନଗିରି ଟେକଗୁଡ଼ାର ହରି ମାଟାମ । ଏହି ଘଟଣା ପରେ ପୋଲିସ ଫେରାର ଅଭିଯୁକ୍ତକୁ ଧରିବା ପାଇଁ ତଦନ୍ତ ଜାରି ରଖିଛି ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
