ମାଲକାନଗିରି: ରାଜ୍ୟବ୍ୟାପୀ ଆରମ୍ଭ ହୋଇଯାଇଛି ପକ୍ଷୀଗଣନା । ଆଜି ମାଲକାନଗିରିର ବିଭିନ୍ନ ଜଳଭଣ୍ଡାରରେ ବନଖଣ୍ଡ ପକ୍ଷରୁ କରାଯାଉଛି ପକ୍ଷୀ ଗଣନା । ସଦର ମହକୁମା ସ୍ଥିତ ସତୀଗୁଡା ଜଳଭଣ୍ଡାରରେ ଜିଲ୍ଲା ବନାଞ୍ଚଳ ପକ୍ଷରୁ ପକ୍ଷୀ ଗଣନା କରାଯାଇଛି । ଆଜିର ଏହି ପକ୍ଷୀ ଗଣତି ଅନୁସାରେ ଗତବର୍ଷ ସତୀଗୁଡା ଜଳଭଣ୍ଡାରରେ ମୋଟ 2117ଗୋଟି ବିଭିନ୍ନ ପ୍ରଜାତିର ପକ୍ଷୀ ଥିବାବେଳେ ଆଜି ଗଣନାରେ 1588ଟି ବିଭିନ୍ନ ପ୍ରଜାତିର ପକ୍ଷୀ ଚିହ୍ନଟ ହୋଇଛି ।
ଚଳିତ ବର୍ଷ ବିଦେଶୀ ପକ୍ଷୀଙ୍କ ସଂଖ୍ୟା ହ୍ରାସ ପାଇଛି । ତେବେ କେଉଁ କାରଣରୁ ପକ୍ଷୀଙ୍କ ସଂଖ୍ୟା ହ୍ରାସ ପାଉଛି, ସେ ନେଇ ବନବିଭାଗ ସମୀକ୍ଷା କରିଥିବା ସହକାରୀ ବନ ସଂରକ୍ଷକ ଶ୍ରୀକାନ୍ତ ନାୟକ ପ୍ରକାଶ କରିଛନ୍ତି । ଶ୍ରୀ ନାୟକଙ୍କ ନେତୃତ୍ବରେ ବନାଞ୍ଚଳ ଅଧିକାରୀ ବାସୁଦେବ ନାୟକ, ବନପାଳ ମୋହନ ଗୁଡିଆ ସମେତ ଅନେକ ତାଲିମ ପ୍ରାପ୍ତ ବନ କର୍ମଚାରୀମାନେ ସତୀଗୁଡା ଜଳଭଣ୍ଡାରରେ 4ଟି ଦଳରେ ବିଭକ୍ତ କରାଯାଇ ବାଇନୋକୁଲାର, ଜିପିଏସ ଓ ଅନ୍ୟାନ୍ୟ ଆନୁସଙ୍ଗିକ ଯନ୍ତ୍ରପାତି ସହ ଗଣନା କାର୍ଯ୍ୟ କରିଥିଲେ ।
ଏଥିରେ ପାଣି ଡୁବୁକ 223, ମାଟିଆ ଡୁବୁକି 574, ବଡପାଣି କୁଆ 49, ପାଣି କୁଆ 177, ଛୋଟ ପାଣି କୁଆ 40, ଦୁବ ହଂସ 1, ହଂସରାଳି 323, ବଗ 114, ଖଇରାବଗ 7, ବଡ ବଗ 11, ପାଣି ବଗ 2, ସାରସ 67ଟି ଥିବା ଗଣନାରୁ ଜଣାପଡିଛି । ଚଳିତ ବର୍ଷ ପାଣି ଡୁବୁକି, ବଡ ପାଣିକୁଆ ଦୁବ ହଂସ, ହଂସରାଳି, ଖଇରାବଗ, ବଡବଗ ଓ ସାରସ ପକ୍ଷୀଙ୍କ ସଂଖ୍ୟା ବୃଦ୍ଧି ପାଇଥିବାବେଳେ, ଅନ୍ୟାନ୍ୟ ପକ୍ଷୀଙ୍କ ସଂଖ୍ୟା ହ୍ରାସ ଘଟିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
