ମାଲକାନଗିରି: ଗୁଣାତ୍ମକ ଶିକ୍ଷାକୁ ଗୁରୁତ୍ବ ଦେବା ସହ ବିଭିନ୍ନ ଯୋଜନାକୁ କାର୍ଯ୍ୟକାରୀ କରୁଛନ୍ତି ସରକାର । କୋଟି କୋଟି ଟଙ୍କା ବ୍ୟୟରେ ନିର୍ମାଣ ହେଉଛି ସ୍ମାର୍ଟ କ୍ଲାସରୁମ । ଛାତ୍ରଛାତ୍ରୀଙ୍କୁ ସ୍କୁଲକୁ ଟାଣିବା ପାଇଁ ମଧ୍ୟାହ୍ନ ଭୋଜନ ଠାରୁ ଆରମ୍ଭ କରି ଜୋତା ପୋଷକ ମିଳୁଛି । ତେବେ ମାଲକାନଗିରିରେ ଏହାର ଓଲଟା ଚିତ୍ର ଦେଖିବାକୁ ମିଳୁଛି । କୋରକୋଣ୍ଡା ବ୍ଲକ ତାର୍ଲାକୋଟା ପଞ୍ଚାୟତ ଅନ୍ତର୍ଗତ ପୁସପାଲ୍ଲୀ ଗାଁରେ ଥିବା ସରକାରୀ ଉନ୍ନିତ ଉଚ୍ଚ ବିଦ୍ୟାଳୟରେ(Pushpalli Higher Secondary School) ଶିକ୍ଷା ବ୍ୟବସ୍ଥାର ନଗ୍ନଚିତ୍ର ଦେଖିବାକୁ ମିଳିଛି । ବାହାର ସୁନ୍ଦର ଭିତର ଫମ୍ପା ଭଳି ଏଠାରେ ଗୋଟିଏ ଶ୍ରେଣୀଗୃହରେ ବସି ପାଠପଢୁଛନ୍ତି ପ୍ରଥମରୁ ଅଷ୍ଟମ ଶ୍ରେଣୀର ଛାତ୍ରଛାତ୍ରୀ ।
ନବମ ଓ ଦଶମ ଶ୍ରେଣୀରେ ପ୍ରାୟ ୪୦ ଲେଖାଏଁ ପିଲା ପାଠ ପଢୁଥିବାବେଳେ, ହିନ୍ଦୀକୁ ଛାଡିଦେଲେ ଅନ୍ୟ ବିଷୟରେ କୌଣସି ଶିକ୍ଷକ ନାହାନ୍ତି । ଯାହାଫଳରେ ପିଲାମାନେ ପାଠ ପଢିବାରେ ବହୁ ଅସୁବିଧା ହେଉଥିବା କହିଛନ୍ତି ଛାତ୍ରଛାତ୍ରୀ । ତେବେ ପ୍ରାଥମିକ ଶିକ୍ଷକମାନେ କାମ ଚଳାରେ ଏହି ହାଇସ୍କୁଲର ପିଲାଙ୍କୁ ପାଠ ପଢାଉଥିବା ଦେଖିବାକୁ ମିଳିଛି । ସେହିପରି ସ୍କୁଲରେ ଶ୍ରେଣୀ ଗୃହ ନଥିବାରୁ ଗୋଟିଏ ଛାତ ତଳେ ପ୍ରଥମରୁ ତୃତୀୟ ପର୍ଯ୍ୟନ୍ତ ପିଲାମାନେ ବାରଣ୍ଡାରେ ପାଠ ପଢୁଥିବା ବେଳେ ଚତୁର୍ଥରୁ ଅଷ୍ଟମ ପର୍ଯ୍ୟନ୍ତ ପିଲାମାନେ ଗୋଟିଏ ହଲ୍ରେ ବସି ପାଠ ପଢୁଛନ୍ତି ।
ସେହି ହଲରେ ଦୁଇ ଜଣ ଶିକ୍ଷକ ଦୁଇପଟେ ପିଲାଙ୍କୁ ବସାଇ ପାଠ ପଢାଉଛନ୍ତି । ଯାହା ଫଳରେ ପିଲାମାନେ କେଉଁ ଶ୍ରେଣୀର ପାଠ ପଢାଯାଉଛି ବୁଝିପାରୁନଥିବା କହିଛନ୍ତି ଛାତ୍ରଛାତ୍ରୀ । ଏଭଳି ପରିସ୍ଥିତିରେ ଛାତ୍ରଛାତ୍ରୀମାନେ କେମିତି ଦଶମ ପାସ୍ ହେବେ ସେନେଇ ଚିନ୍ତାରେ ରହିଛନ୍ତି ଅଭିଭାବକ । ସ୍କୁଲ୍ କମିଟି ଏବଂ ପ୍ରଧାନ ଶିକ୍ଷକ ବାରମ୍ବାର ବିଭାଗକୁ ଏନେଇ ଗୁହାରି କରୁଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଗ୍ରାମବାସୀ କହନ୍ତି ।
ଏହି ଘଟଣାକୁ ନେଇ ମାଲକାନଗିରି ଜିଲ୍ଲା ସ୍ବତନ୍ତ୍ର ଉନ୍ନୟନ ଅଧିକାରୀ ବାଳମୁକୁନ୍ଦ ଭୂୟାଁ କହିଛନ୍ତି, "ଏହି ବିଦ୍ୟାଳୟର ଶ୍ରେଣୀଗୃହ ପାଇଁ ଟେଣ୍ଡର ହୋଇଯାଇଛି ବହୁଶୀଘ୍ର କାମ ଆରମ୍ଭ କରାଯିବ । ଏହାସହ ଆବଶ୍ୟକତା ଅନୁସାରେ ଶିକ୍ଷକ ନିଯୁକ୍ତି ଦିଆଯିବ । ଅଧିକ ପିଲା ରହିଥିବା ନେଇ ଆମ ପାଖରେ ସୂଚନା ରହିଛି । କଣ ପଦକ୍ଷେପ ନିଆଯାଇପାରିବ ଆମେ ଆଲୋଚନା କରି ପଦକ୍ଷେପ ନେବୁ ।"
ଇଟିଭି ଭାରତ, ମାଲକାନଗିରି
