ମାଲକାନଗିରି: ଜିଲ୍ଲାରେ ଜାରି ରହିଛି ପ୍ରଚଣ୍ଡ ଗ୍ରୀଷ୍ମ ଲହରି । ଯାହାର ସିଧାସଳଖ ପ୍ରଭାବ ମଣିଷ ସହ ସରୀସୃପଙ୍କ ଉପରେ ବି ପଡ଼ିଛି । ଏପରି ଏକ ଉଦାହରଣ ମାଲକାନଗିରିରେ ଦେଖିବାକୁ ମିଳିଛି । ଖାଦ୍ୟ ଅନ୍ବେଷଣରେ ବାହାରିଥିବା ଗୋଟିଏ ନାଗସାପ ଅସହ୍ୟ ଗରମ କାରଣରୁ ଚେତା ହରାଇଥିଲା । ଖବରପାଇ ସ୍ନେକ ହେଲ୍ପ ଲାଇନ୍ ସଦସ୍ୟ ପହଞ୍ଚି ଚିକିତ୍ସା କରିଥିଲେ ।
ସୂଚନା ଅନୁଯାୟୀ, ସ୍ଥାନୀୟ ନୂଆଗୁଡ଼ା ସାହିରେ ଜଣେ ବ୍ୟକ୍ତିଙ୍କ ଗୋଟିଏ ସାପ ନିସ୍ତେଜ ହୋଇ ପଡ଼ିଥିବା ଦେଖି ତୁରନ୍ତ ସାପକୁ ଉଦ୍ଧାର ପାଇଁ ସ୍ନେକ ହେଲପ ଲାଇନ ସଦସ୍ୟଙ୍କୁ ଡାକିଥିଲେ । ହେଲ୍ପ ଲାଇନ ସଦସ୍ୟ ସ୍ନେହାଶିଷ ନାୟକ ଏବଂ ତାକ ଟିମ ନୂଆଗୁଡାରେ ପହଞ୍ଚି ସାପକୁ ଉଦ୍ଧାର କରିବା ବେଳେ ସାପଟି ଅଚେତ ହୋଇଯାଇଥିବା ଜଣାପଡ଼ିଥିଲା । ତେଣୁ ଚେତା ଫେରାଇବା ନିମନ୍ତେ ସାପଟିକୁ ଓଲଟ ପାଲଟ କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ଦେଖାନଯିବାରୁ ଶେଷରେ ସ୍ନେହାଶିଷ ଗୋଟିଏ ଛୋଟ ପାଇପ ଆଣି ସାପର ପାଟିରେ ଭର୍ତ୍ତି କରି ବାରମ୍ବାର ଫୁଙ୍କିଥିଲେ । ଏହାପରେ ସାପ ସଂପୂର୍ଣ୍ଣ ଠିକ୍ ହୋଇଯାଇଥିଲା ।
ସ୍ନେହାଶିଷ ନାଗସାପକୁ ସୁସ୍ଥ କରିବା ଦେଖି ସ୍ଥାନୀୟ ଲୋକେ ପ୍ରଶଂସା କରିଥିଲେ । ଏଭଳି କାର୍ଯ୍ୟ ପାଇଁ ଏବେ ସ୍ନେହାଶିଷ ବେଶ ଚର୍ଚ୍ଚାରେ । ତେବେ ସାପ ସୁସ୍ଥ ହେବା ପରେ ତାକୁ ନେଇ ଜଙ୍ଗଲରେ ଛାଡି ଦିଆଯାଇଥିବା ଜଣାପଡ଼ିଛି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
