ମାଲକାନଗିରି: ମାଓ ପ୍ରବଣ ମାଲକାନଗିରି ଜିଲ୍ଲାରେ ପ୍ରଥମଥର କରି ଲାଗି ବରିଷ୍ଠ ନାଗରିକମାନଙ୍କୁ ଜିଲ୍ଲା ପୋଲିସ ପକ୍ଷରୁ ପରିଚୟପତ୍ର ପ୍ରଦାନ କରାଯାଇଛି । ଜିଲ୍ଲା ପୋଲିସ କାର୍ଯ୍ୟାଳୟରେ ଅନୁଷ୍ଠିତ ସଭାଗୃହରେ ଆୟୋଜିତ ପରିଚୟ ପତ୍ର ପ୍ରଦାନ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମାଲକାନଗିରି ଏସପି ଜଗମୋହନ ମିନା ଯୋଗ ଦେଇଥିଲେ ।
ଜିଲ୍ଲାର 85 ଜଣ ବରିଷ୍ଟ ନାଗରିକ ମାନଙ୍କୁ ପ୍ରଥମ ଥର ଲାଗି ଚିହ୍ନଟ କରା ଯାଇ ଆଜି ପରିଚୟ ପତ୍ର ପ୍ରଦାନ କରାଯାଇଥିଲା । ଏହି ପରିଚୟ ପତ୍ର ପ୍ରଦାନ କରିବା ଦ୍ୱାରା ସେମାନେ ଉପକୃତ ହୋଇ ପାରିବେ । ବିଶେଷ କରି ବରିଷ୍ଠ ନାଗରିକମାନଙ୍କୁ ପରିବାର ଲୋକେ କିମ୍ବା ରାସ୍ତା ଘାଟରେ କୌଣସି ପ୍ରକାର ଅସୁବିଧା ହେଲେ ଏହି ପରିଚୟ ପତ୍ରରେ ଥିବା ନମ୍ବରକୁ ଫୋନ କଲେ ପୋଲିସ ତୁରନ୍ତ ତାଙ୍କ ପାଖରେ ପହଞ୍ଚି ସମସ୍ତ ସୁବିଧା ଯୋଗାଇ ଦେବ ।
ଏହାସହ ରାଜ୍ୟ ବାହାରକୁ ଯଦି ବରିଷ୍ଠ ନାଗରିକ ବୁଲିବାକୁ ଯାଇଥିବା ସ୍ଥାନରେ କୌଣସି ସମସ୍ୟାର ସମ୍ମୁଖୀନ ହେଲେ ସେଠାରେ ପୋଲିସ ପହଞ୍ଚି ତାଙ୍କୁ ସମସ୍ତ ସୁବିଧା ଯୋଗାଇବ। ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଏସଡିପିଓ ହୃଷିକେଶ ଡି ଖିଲାରିଙ୍କ ସହ ମାଲକାନଗିରି ମଡେଲ ଥାନା ଅଧିକାରୀ ରଞ୍ଜନ କୁମାର ସାହୁ ଉପସ୍ଥିତ ଥିଲେ ।
ମାଲକାନଗିରିରୁ ଜୟନ୍ତ ତିଆଡି,ଇଟିଭି ଭାରତ
