ମାଲକାନଗିରି: ସରକାର ବିଭିନ୍ନ ପ୍ରକାରର ଯୋଜନା କରିଥିଲେ ମଧ୍ୟ ମାଲକାନଗିରି ଭଳି ଉପାନ୍ତ ଜିଲ୍ଲାରେ ଅପହଞ୍ଚ ସମସ୍ତ ସୁବିଧା ସୁଯୋଗ । ପୁଣି ଖଟିଆରେ ବୁହାହୋଇ ଡାକ୍ତରଖାନା ଗଲେ ଗର୍ଭବତୀ ମହିଳା । ଖଇରିପୁଟ ବ୍ଲକ ଅନ୍ତର୍ଗତ ଅମଳାଭଟ୍ଟାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି ।
ପ୍ରତିମା ସାହୁ ନାମକ ମହିଳା ଗର୍ଭ ଯନ୍ତ୍ରଣାରେ ଛଟପଟ ହେବାରୁ ପରିବାର ଲୋକେ ପ୍ରଥମେ ଖଇରୀପୁଟ ପ୍ରାଥମିକ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଯିବାପାଇଁ ଆମ୍ବୁଲାନ୍ସକୁ ଫୋନ କରିଥିଲେ କିନ୍ତୁ ରାସ୍ତା ଖରାପ ଥିବାରୁ ଆମୁଲାନ୍ସ ଆସିନଥିଲା। ଫଳରେ ପରିବାର ଲୋକେ ପାଖପାଖି ୩ କିଲୋମିଟର ଖଟିଆରେ ବୋହି ଖଇରିପୁଟ ମେଡିକାଲକୁ ଆଣିଥିଲେ। ଡାକ୍ତରଖାନା ରେ ପ୍ରସୂତି ମହିଳା ଜଣକ ଏକ କନ୍ୟା ସନ୍ତାନକୁ ଜନ୍ମ ଦେଇଛନ୍ତି । ବର୍ତ୍ତମାନ ଉଭୟ ମା ଓ ଶିଶୁର ଅବସ୍ଥା ସୁସ୍ଥ ଥିବା ଜଣାପଡିଛି।
ତେବେ ଜିଲ୍ଲାରେ ବାରମ୍ବାର ଏହି ଭଳି ଘଟଣା ଘଟୁଥିଲେ ମଧ୍ୟ ସରକାର କିମ୍ବା ଜିଲ୍ଲା ପ୍ରଶାସନ କୌଣସି ପ୍ରକାରର ପଦକ୍ଷେପ ନେଉନଥିବା ଅଭିଯୋଗ ହେଉଛି।
ମାଲକାନଗିରିରୁ ଜୟନ୍ତ ତିଆଡିି, ଇଟିଭି ଭାରତ
