ମାଲକାନଗିରି: କାଲିମେଳା ବ୍ଲକରେ କାର୍ଯ୍ୟରତ PEO ମଧୁ କିର୍ଶାନି ଗତ ଅଢେଇ ବର୍ଷ ତଳେ ମାଲକାନଗିରି ବ୍ଲକରୁ ବଦଳି ହୋଇ କାଲିମେଳା ବ୍ଲକକୁ ଯାଇଛନ୍ତି। ତେବେ ମାଲକାନଗିରି ବ୍ଲକ କର୍ତ୍ତୃପକ୍ଷ LPC ପଠାଇବାରେ ଟାଳଟୁଳ ନୀତି ଅବଲମ୍ବନ କରୁଥିବା ଅଭିଯୋଗ ହୋଇଛି। LPC ଯାଇ ନଥିବାରୁ ମଧୁଙ୍କୁ ଅଢେଇ ବର୍ଷ ହେଲା ଦରମା ମିଳି ପାରିନଥିବା ପରି ସଙ୍ଗୀନ ଅଭିଯୋଗ କରିଛନ୍ତି ମଧୁ। ବାରମ୍ବାର ବିଡ଼ିଓ ଏବଂ ବ୍ଲକ କର୍ତ୍ତୃପକ୍ଷଙ୍କୁ ଅନୁରୋଧ କଲେ ମଧ୍ୟ ସହଯୋଗ କରୁନଥିବାରୁ ବାଧ୍ୟ ହୋଇ ମଧୁ ମଲକାନଗିରି ବ୍ଲକ କାର୍ଯ୍ୟାଳୟ ସାମ୍ନାରେ ଧାରଣା ଦେଇଛନ୍ତି । LPC ନମିଳିବା ପର୍ଯ୍ୟନ୍ତ ସେ ଧାରଣରୁ ହଟିବେ ନାହିଁ ବୋଲି କହିଛନ୍ତି।
ମିଳିଥିବା ସୂଚନା ଅନୁସାରେ, ଗତ 2013 ମସିହାରେ ମଧୁଙ୍କ ବାପାଙ୍କୁ ନକ୍ସଲ ହତ୍ୟା କରିଥିଲେ। ତେବେ ମଧୁଙ୍କ ପରିବାରକୁ ତତ୍କାଳୀନ ଜିଲ୍ଲାପାଳ ମାଲକାନଗିରିରେ ରହିବା ପାଇଁ ଘରର ବ୍ୟବସ୍ଥା କରିଥିଲେ। ଜୀବନ ପ୍ରତି ବିପଦ ରହିଥିବାରୁ ମାଲକାନଗିରିରେ ହିଁ ପରିବାରକୁ ରଖି ସେ କାଲିମେଳା ବ୍ଲକରେ ରହି କାମ କରୁଥିଲେ। ତେବେ ସେହି ଘରୁ ମଧ୍ୟ ତାଙ୍କୁ ହଟାଇବାକୁ ବ୍ଲକ ପ୍ରଶାସନ ଜବରଦସ୍ତି କରୁଥିବା ଅଭିଯୋଗ କରିଛନ୍ତି ମଧୁ।
ଅନ୍ୟପଟେ BDO କୋରୋନା ସଂକ୍ରମିତ ଥିବାରୁ ଚିକିତ୍ସିତ ହେଉଛନ୍ତି। ବହୁ ଅଧିକାରୀ ମଧୁଙ୍କୁ ବୁଝାସୁଝା କରିଥିଲେ ମଧ୍ୟ ସେ ଶୁଣୁ ନ ଥିବା ଦେଖିବାକୁ ମିଳିଛି । ଏଥିନେଇ ଆମେ ପିଡି ଡିଆରଡିଏଙ୍କ ସହ ଯୋଗାଯୋଗ କରିବାପରେ PEO ମଧୁଙ୍କ ସମସ୍ତ ଅଭିଯୋଗର ସମାଧାନ କରାଯିବ କହିଛନ୍ତି ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
