ମାଲକାନଗିରି: ସାରା ଦେଶରେ ଜୁଲାଇ 28ରୁ ଅଗଷ୍ଟ 3 ତାରିଖ ପର୍ଯ୍ୟନ୍ତ ଶହୀଦ ସପ୍ତାହ ଭାବେ ପାଳନ କରୁଛନ୍ତି ଲାଲବାହିନୀ । ଏହି ସମୟ ମଧ୍ୟରେ ନକ୍ସଲପନ୍ଥୀଙ୍କୁ ଦମନ କରିବାକୁ ଫୁଲ୍ ଦମ ଲଗାଇଛନ୍ତି ଆନ୍ଧ୍ର, ଓଡିଶା, ତେଲେଙ୍ଗାନା ଓ ଛତିଶଗଡ ରାଜ୍ୟର ପୋଲିସ ।
ସେପଟେ ସହିଦ ସପ୍ତାହ ଭିତରେ ଛତିଶଗଡ ପୋଲିସକୁ ଦୁଇ 2 ଥର ସଫଳତା ମିଳିଛି । ବୁଧବାର ପୁଣି ଥରେ ତେଲେଙ୍ଗାନା ପୋଲିସ କୋତ୍ତାଗୁଡେମ୍ ଜିଲ୍ଲାରେ ଆରମ୍ଭ କରିଥିଲା ନକ୍ସଲ ଅପରେସନ । ନିଉ ଡେମୋକ୍ରାସି ଦଳମ୍ ନାମରେ ଗଠିତ ନକ୍ସଲପନ୍ଥୀଙ୍କ ଏକ ନୂଆ ଦଳ ଜବାଲାପାଲ୍ଲୀ ଜଙ୍ଗଲରେ ସଭା କରୁଥିବା ସମୟରେ ସିଆରଫିଏଫ୍ ଯବାନ ଅତର୍କିତ ଚଢାଉ କରିଥିଲେ ।
ଯବାନଙ୍କ ଅତର୍କିତ ଆକ୍ରମଣ ଫଳରେ ଜଣେ ନକ୍ସଲ ପ୍ରାଣ ହରାଇବା ପରେ ଗାଁ ଲୋକେ ଯବାନଙ୍କୁ ଘେରି ଯାଇଥିଲେ । ଏପରିକି ଗାଁର କିଛି ମହିଳା ଓ ପୁରୁଷ ଯବାନଙ୍କୁ ଉପରେ ଜୋରଦାର ଆକ୍ରମଣ କରି ବାଡି ଓ ଠେଙ୍ଗାରେ ପ୍ରହାର କରିଥିଲେ । ନିଜ ଜୀବନ ବଞ୍ଚାଇବା ପାଇଁ ଘଟଣାସ୍ଥଳରୁ ଯବାନ ଦୌଡି ପଳାଇଥିଲେ ।
ତେବେ ମୃତ ନକ୍ସଲପନ୍ଥୀଙ୍କ ନାମ ଲିଙ୍ଗାନା ଏବଂ ସେ ନିଉ ଡେମୋକ୍ରାସି ଦଳମ୍ର ସଭାପତି ଥିବା ଜଣାପଡିଛି । ଉକ୍ତ ଘଟଣା ପରେ ସମ୍ପୃକ୍ତ ଅଞ୍ଚଳରେ ପୋଲିସ ନିୟୋଜିତ କରାଯାଇଛି । ସଙ୍ଗଠନର ଅନ୍ୟ ସଦସ୍ୟଙ୍କୁ କାବୁ କରିବା ପାଇଁ ଯବାନ ଆଉ ଏକ ଅପରେସନ ଆରମ୍ଭ କରିଥିବା ଜଣାପଡିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
