ମାଲକାନଗିରି: ପୁଣି ଚିଠି ମାଧ୍ୟମରେ ନିଜ କ୍ଷୋଭ ପ୍ରକାଶ କଲେ ଲାଲ ବାହିନୀ । MKV ଡିଭିଜୋନାଲ କମିଟି ଚିଠି ଜାରି କରିଥିବା ବେଳେ ଆଦିବାସୀ ଅଞ୍ଚଳରେ ଚାଲୁଥିବା ଦମନ ଲୀଳାକୁ ବନ୍ଦ କରିବା ସହ ଜନସାଧାରଣଙ୍କୁ ଲଢେଇ ପାଇଁ ଆମନ୍ତ୍ରିତ କରିବା ନେଇ ଚିଠିରେ ପ୍ରକାଶ କରାଯାଇଛି । ଏହାସହ ମାଡକାପଦର ଏନକାଉଣ୍ଟରକୁ ତୀବ୍ର ବିରୋଧ କରିବା ସହ ଏନକାଉଣ୍ଟରରେ ମୃତ୍ୟୁ ବରଣ କରିଥିବା ବ୍ୟକ୍ତି ସହ ମାଓବାଦୀଙ୍କ କିଛି ସମ୍ପର୍କ ନଥିବା କଥା ଚିଠିରେ ଉଲ୍ଲେଖ କରିଛନ୍ତି ।
ଗତ 16 ତାରିଖରେ ଜନ୍ତ୍ରୀ ନିକଟସ୍ଥ ଧାକଡପଦର ଅଞ୍ଚଳରୁ ମାଛ ଧରିବାକୁ ଯାଇଥିବା ଯୁବକକୁ ପୋଲିସ ଉଠାଇ ନେଇ ଏକ ସପ୍ତାହ ପରେ ଗିରଫ କରିଥିବା ଦର୍ଶାଇଛି । ଯାହାକୁ ଲାଲ ବାହିନୀ ସମ୍ପୂର୍ଣ୍ଣ ବିରୋଧ କରିଛନ୍ତି । ଏହାସହ ସ୍ବାଭିମାନ ଅଞ୍ଚଳରେ ଗତ କିଛି ମାସ ଭିତରେ ମାଟିତଳେ ପୋତା ଯାଇଥିବା ମାଓ ସାମଗ୍ରୀ, ଯେଉଁ ସବୁକୁ ପୋଲିସ ଓ BSF ବାହିନୀ ଉଦ୍ଧାର କରିଥିଲା ସେସବୁ ମାଓବାଦୀଙ୍କ ନୁହେଁ ବୋଲି ଚିଠିରେ ଉଲ୍ଲେଖ କରିବା ସହ ମାଓବାଦୀଙ୍କ ବିରୋଧରେ ପୋଲିସ ମିଥ୍ୟା ପ୍ରଚାର କରୁଛି । ଏହାସହ କେନ୍ଦ୍ର ସରକାରଙ୍କ କୃଷି ଆଇନକୁ ମଧ୍ୟ ବିରୋଧ କରିଛନ୍ତି ଲାଲବାହିନୀ ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
