ମାଲକାନଗିରି: ମାଓଗଡ଼ରେ ଦିନେ ସେ ବନ୍ଧୁକ ଧରି ଶାସନ କରୁଥିଲେ । ତାଙ୍କ ନାଁ ଶୁଣିଲେ ଲୋକଙ୍କ ଦେହରେ ଶିହରଣ ଖେଳି ଯାଉଥିଲା । ଦିନେ ପୋଲିସର ନିଦ ହଜାଇ ଦେଉଥିବା ମାଓ ଦାନସୁରି ଅଂଶୁୟା ଓରଫ ସିତକା ନିଜକୁ ଜନସେବାରେ ନିୟୋଜିତ କରିଛନ୍ତି । ଜିଲ୍ଲା ସୀମାନ୍ତ ତେଲେଙ୍ଗାନାର ମୁଲକୁଲ ନିର୍ବାଚନ ମଣ୍ଡଳୀରୁ ବିଧାୟିକା ଭାବେ ନିର୍ବାଚିତ ହୋଇ ସେ ଜନସେବା କରୁଥିବା ଜଣାପଡିଛି ।
ବିଧାୟକ ହେବା ପରେ ବିଗତ ଏବଂ ଚଳିତ ବର୍ଷ କୋରୋନା ମହାମାରୀ ସମୟରେ ଅପହଞ୍ଚ ଇଲାକାର ଲୋକଙ୍କ ନିକଟରେ ପହଞ୍ଚି ଜନ ସେବାରେ ନିଜକୁ ଉତ୍ସର୍ଗୀକୃତ କରିଛନ୍ତି । ବିଧାୟିକା ହେବା ପରେ ନିଜର ବିଳାସପୂର୍ଣ୍ଣ ଜୀବନ ବିତାଇବା ପ୍ରତି ଗୁରୁତ୍ବ ନଦେଇ ମାନବ ସେବାରେ ଅଧିକ ମନୋନିବେଶ କରିଛନ୍ତି । 16 ବର୍ଷ ବୟସରେ ସେ ହାତରେ ବନ୍ଧୁକ ଧରି ଶାସନ କରିବା ପାଇଁ ମାଓ ଦଳରେ ସାମିଲ ହୋଇଥିଲେ ।
ଏହାପରେ ଦୀର୍ଘ 17 ବର୍ଷ ପର୍ଯ୍ୟନ୍ତ ମାଓବାଦୀ ଦଳରେ ମାଓ କମାଣ୍ଡର ଭାବେ କାର୍ଯ୍ୟ କରିବା ପରେ ଲୋକଙ୍କ ପ୍ରକୃତ ବିକାଶ ପାଇଁ ସେ ମନ ବଳାଇ ଆତ୍ମସର୍ମପଣ କରିଥିଲେ ଏବଂ ଲୋକଙ୍କ ସେବାରେ ନିଜକୁ ମସଗୁଲ କରିଥିଲେ । ତାଙ୍କର ଏଭଳି ସେବା ମନୋଭାବ ଯୋଗୁଁ ସେ ବିଧାୟିକା ଭାବେ ବିଜୟ ହାସଲ କରିବା ପରେ ମଧ୍ୟ ନିଜର ଏହି ଜନସେବା ଜାରି ରଖିଛନ୍ତି ।
କୋରୋନା ଭଳି ମହାମାରୀ ସମୟରେ ଅନେକ ଘର ମଧ୍ୟରେ ରହି ଉପଦେଶ ଦେବାକୁ ଭଲ ପାଉଥିବା ବେଳେ ସେ ନିଜ ଅଞ୍ଚଳର ଦୁର୍ଗମ ଓ ମାଓ ଉପଦ୍ରବ ଅଞ୍ଚଳରେ ରହୁଥିବା ଲୋକଙ୍କ ନିକଟରେ କୋରୋନା ସଚେତନତାର ବାର୍ତ୍ତା ପହଞ୍ଚାଇବା ସହ ଲୋକଙ୍କୁ ଖାଦ୍ୟ ବସ୍ତ୍ର ଯୋଗାଇବା ପାଇଁ ପ୍ରୟାସ ଆରମ୍ଭ କରିଛନ୍ତି ।
ନିଜେ ବିଭିନ୍ନ ସାମଗ୍ରୀ ବୋହି ଜଙ୍ଗଲର ଖାଲଖମା ଭରା ମାଇଲ ମାଇଲ ରାସ୍ତାରେ ଚାଲି ଚାଲି ଲୋକଙ୍କ ନିକଟରେ ପହଞ୍ଚୁଛନ୍ତି । ଆଗାମୀ ଦିନରେ ସେ ବିଧାୟିକା ନ ରହିଲେ ମଧ୍ୟ ଏଭଳି ଜନ ସେବା ଜାରି ରଖିବେ ବୋଲି ପ୍ରକାଶ କରିଛନ୍ତି । ଦାନସୁରି ନିଜ ଭିତରେ ଏଭଳି ପରିବର୍ତ୍ତନ ଆଣି ଅନ୍ୟ ନେତାଙ୍କ ପାଇଁ ଉଦାହରଣ ପାଲଟିଛନ୍ତି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
