ମାଲକାନଗିରି: ହଜିଲା ପୁଅ ସୁନ୍ଦରକୁ ଘରେ ପହଞ୍ଚାଇଲା ମାଲକାନଗିରି ପୋଲିସ । ଗତ କିଛି ଦିନ ତଳେ ମାଲକାନଗିରି ପୋଲିସ ପାଟ୍ରୋଲିଂ ବେଳେ ସୁନ୍ଦରଙ୍କୁ ଠାବ କରି ଘରେ ପହଞ୍ଚାଇଛନ୍ତି ।
ଗତ ଦୁଇ ବର୍ଷ ତଳେ ଝାଡ଼ଖଣ୍ଡରୁ ଜଣେ ଯୁବକ ନିଖୋଜ ହୋଇଥିବା ନେଇ ଥାନାରେ ଏତଲା ଦାୟର କରାଯାଇଥିଲା। ସୁନ୍ଦର କୋପେ ନାମକ ଯୁବକ ଜଣକ କାମ ସନ୍ଧାନରେ ଘରୁ ଗୋଡ଼ କାଢ଼ିଥିଲେ । ହେଲେ ଘରୁ ବାହାରିବା ପରେ ସେ ଆଉ ଘରକୁ ଫେରି ନଥିଲେ । ୨୦୧୮ ମସିହାରେ ନିଖୋଜ ପୁଅକୁ ବହୁ ଖୋଜାଖୋଜି କରିବା ପରେ ମଧ୍ୟ ପୁଅର ପତ୍ତା ମିଳିନଥିଲା ।
ଗତ କିଛି ଦିନ ତଳେ ମାଲକାନଗିରି ପୋଲିସ ପାଟ୍ରୋଲିଂ କରୁଥିବା ବେଳେ ସୁନ୍ଦରଙ୍କୁ ଠାବ କରିଥିଲା । ଏହାପରେ ପୋଲିସ ତାଙ୍କୁ ଧରି ପଚରାଉଚରା କରିଥିଲା । ସୁନ୍ଦର ନିଜର ପରିଚୟ ଦେବା ସହ ସମସ୍ତ ବିଷୟ କହିଥିଲା । ପରେ ପୋଲିସ ତୁରନ୍ତ ଝାଡ଼ଖଣ୍ଡ ପୋଲିସ ସହ ଯୋଗାଯୋଗ କରି ଭିଡିଓ କଲିଂ ମାଧ୍ୟମରେ ତାଙ୍କ ପରିବାର ସହ ଯୋଗାଯୋଗ କରାଇଥିଲା ।
ହଜିଲା ପୁଅକୁ ପାଇ ମା ' ଆଖିରୁ ଶୁଖୁନଥିଲା ଲୁହ । ପରେ ମାଲକାନଗିରି ପୋଲିସ ନିଜସ୍ୱ ଉଦ୍ୟମରେ ଏକ ଗାଡ଼ି କରି ସୁନ୍ଦରଙ୍କୁ ଝାଡ଼ଖଣ୍ଡ ପଠାଇଥିଲେ। ଯାହାକୁ ନେଇ ମାଲକାନଗିରି ପୋଲିସର ମହାନତାକୁ ଭୁରି ଭୁରି ପ୍ରଶଂସା କରିଥିଲେ ଗାଁ ଲୋକେ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
