ମାଲକାନଗିରି: ମାଲକାନଗିରିରେ ବନ୍ୟାକୁ ନେଇ ରାଜନୀତି । ଲଗାଣ ବର୍ଷା ଫଳରେ ଜିଲ୍ଲାରେ ସୃଷ୍ଟି ହୋଇଥିବା ବନ୍ୟା ପରିସ୍ଥିତି ପରେ ଏବେ ରାଜନୀତି ଜୋର ଧରିଛି । ଏହି ବନ୍ୟା ଲାଗି ମାଲକାନଗିରି ବିଧାୟକ ରାଜ୍ୟ ସରକାରଙ୍କୁ ଦାୟୀ କରିଥିବାବେଳେ ନବରଙ୍ଗପୁର ସାଂସଦ ଆନ୍ଧ୍ରର ପୋଲାଭରମ୍ ପ୍ରକଳ୍ପକୁ ଦାୟୀ କରିଛନ୍ତି । ଆଜି(ରବିବାର) ବନ୍ୟାଞ୍ଚଳ ପରିଦର୍ଶନ କରି ଦୁଇ ନେତା ଏପରି କହିଛନ୍ତି ।
ଆଜି(ରବିବାର) ମାଲକାନଗିରି ବିଧାୟକ ଆଦିତ୍ୟ ମାଢି ବନ୍ୟାରେ ସର୍ବାଧିକ କ୍ଷୟକ୍ଷତି ହୋଇଥିବା କାଲିମେଳା ଏବଂ ପଡିଆ ବ୍ଲକ ପରିଦର୍ଶନ କରିଛନ୍ତି । ବିଧାୟକ ବନ୍ୟା ପୀଡିତଙ୍କ ସହ ଆଲୋଚନା କରି ତାଙ୍କର କ୍ଷୟକ୍ଷତି ବାବଦରେ ପଚାରି ବୁଝିଥିଲେ । ବନ୍ୟା ଫଳରେ ଜିଲ୍ଲାର ଚାଷ ଜମି, ରାସ୍ତା ଏବଂ ପୋଲ କେତେ ଦୂର ନଷ୍ଟ ହୋଇଛି ତାହା ପରିଦର୍ଶନ କରି ଦେଖିଥିଲେ । ଏହା ସହ ବନ୍ୟା ମୁକାବିଲା ପାଇଁ କିକି ପଦକ୍ଷେପ ନିଆଯାଇଥିଲା ତାକୁ ନେଇ କାଳିମେଳାରେ ଏକ ସମୀକ୍ଷା ବୈଠକ କରିଥିଲେ । ଗସ୍ତ ଅବସରରେ ସେ ବନ୍ୟା ପରିସ୍ଥିତି ପାଇଁ ରାଜ୍ୟ ସରକାରଙ୍କୁ ଦାୟୀ କରିଛନ୍ତି ।
ଅନ୍ୟପଟେ ନବରଙ୍ଗପୁର ସାଂସଦ ରମେଶ ମାଝୀ ଦିନିକିଆ ମାଲକାନଗିରି ଗସ୍ତରେ ଆସି ବନ୍ୟା ପୀଡିତ ଏବଂ ବନ୍ୟା ପ୍ରଭାବିତ ଅଞ୍ଚଳ ବୁଲି ଦେଖିଥିଲେ। ଜିଲ୍ଲାର ମାଥିଲି, ଖଇରପୁଟ, କୋରକୋଣ୍ଡା, ପୋଟେରୁ ଆଦି ଅଞ୍ଚଳ ବୁଲି ଦେଖିବା ସହ ସାଧାରଣ ଲୋକଙ୍କ ସହ ଆଲୋଚନା କରିଥିଲେ । ଏହା ସହ ସେମାନଙ୍କ ଦାବି କେନ୍ଦ୍ର ସରକାରଙ୍କ ନିକଟରେ ଉପସ୍ଥାପନା କରିବେ ବୋଲି କହିଥିଲେ । ଏହି ଅବସରରେ ବନ୍ୟା ପାଇଁ ସେ ଆନ୍ଧ୍ର ପ୍ରଦେଶର ପୋଲାଭରମ ପ୍ରକଳ୍ପକୁ ଦାୟୀ କରିଛନ୍ତି ।
ତେବେ ଏହି ଆରୋପ ପ୍ରତ୍ୟାରୋପରେ ଜିଲ୍ଲାର ବନ୍ୟା ପୀଡିତଙ୍କ ଦୁଖଃ କେବେ ଦୂର ହେବ ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
