ମାଲକାନଗିରି: ମାଲକାନଗିରି ଜିଲ୍ଲା ମାଥିଲି ଗୁଳିକାଣ୍ଡ ଦିବସକୁ ପୁରିଛି ୭୭ ବର୍ଷ । ହେଲେ ସେହି ଦିନକୁ ଆଜିବି ଭୁଲି ପାରି ନାହାନ୍ତି ସଂଗ୍ରାମୀ ପରିବାରବର୍ଗ। ୧୯୪୨ ମସିହାରେ ବ୍ରିଟିଶ ସରକାରଙ୍କ ବିରୁଦ୍ଧରେ ସ୍ଵର ଉତ୍ତୋଳନ କରି ମାଥିଲି ଥାନା ଉପରେ ଆକ୍ରମଣ କରିଥିଲେ ଶତାଧିକ ଆଦିବାସୀ ସଂଗ୍ରାମୀ । ଥାନା ଉପରେ ତ୍ରିରଙ୍ଗା ପତାକା ଲଗାଇବାକୁ ଯାଇ ଶହୀଦ ହୋଇଥିଲେ ଅନେକ ଆଦିବାସୀ ବୀର ପୁରୁଷ । ସେମାନଙ୍କୁ ମନେ ପକାଇ ପ୍ରତିବର୍ଷ ପାଳିତ ହେଉଛି ମାଥିଲି ଗୁଳିକାଣ୍ଡ ଦିବସ ।
ମହାତ୍ମା ଗାନ୍ଧୀ ଭାରତ ଛାଡ ଆନ୍ଦୋଳନର ଡାକରାରେ ମାତି ଉଠିଥିଲେ ମାଲକାନଗିରି ଜିଲ୍ଲାର ଅନେକ ଆଦିବାସୀ ସଂଗ୍ରାମୀ । ଦେଶର ସ୍ଵାଧୀନତା ଆନ୍ଦୋଳନରେ ଭାଗ ନେଇଥିଲେ ଏହି ଅଞ୍ଚଳର ଅନେକ ବୀର ସନ୍ତାନ । ଯେଉଁ ମାନଙ୍କର ନେତୃତ୍ବ ନେଇଥିଲେ ବୀର ଆଦିବାସୀ ସଂଗ୍ରାମୀ ଲକ୍ଷ୍ମଣ ନାୟକ । ୧୯୪୨ ମସିହା ଅଗଷ୍ଟ ୨୧ ତାରିଖ ଦିନ ଲକ୍ଷ୍ମଣ ନାୟକଙ୍କ ନେତୃତ୍ବରେ ମାଥିଲି ଥାନା ଉପରେ ଆକ୍ରମଣ କରିଥିଲେ ଶତାଧିକ ସଂଗ୍ରାମୀ । ଥାନା ଉପରେ ତ୍ରିରଙ୍ଗା ପତାକା ଲଗାଇବାକୁ ଯାଇ ପୋଲିସ ଗୁଳିରେ ଶହୀଦ ହୋଇଥିଲେ ସାତ ଜଣ ବୀର ସନ୍ତାନ । ସେମାନଙ୍କ ଉଦ୍ଦେଶ୍ୟରେ ମାଲକାନଗିରି ଜିଲ୍ଲା ମାଥିଲି ଥାନାରେ ପ୍ରତିବର୍ଷ ପାଳିତ ହୁଏ ଶହୀଦ ଦିବସ । ତେବେ ଦେଶ ଲାଗି ବଳିଦାନ ଦେଇଥିବା ଆଦିବାସୀ ସଂଗ୍ରାମୀ ମାନଙ୍କୁ ସରକାର ଭୁଲିଯାଇଥିବା ବେଳେ ସେମାନଙ୍କ ପରିବାରକୁ ପ୍ରଶାସନ ଅଣଦେଖା କରୁଥିବା ନେଇ ସ୍ଥାନୀୟ ଆଦିବାସୀ ନେତା କ୍ଷୋଭର ସହ କହିଛନ୍ତି ।
ମାଥିଲିର ସେହି ଐତିହାସିକ ଦିବସକୁ ଆଜି ଯାଏଁ ସରକାରୀ ଭାବେ ଘୋଷଣା କରା ଯାଇନଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ରାଜ୍ୟର ଅନେକ ମନ୍ତ୍ରୀ ଅନେକ ଥର ଏହାକୁ ସରକାରୀ ଭାବେ ଘୋଷଣା କରିବାର କଥା କହିଥିଲେ ହେଁ ତାହା ବର୍ତ୍ତମାନ ସୁଦ୍ଧା କାର୍ଯ୍ୟକାରୀ ହୋଇନାହିଁ । ତଥାପି ସ୍ଥାନୀୟ ଲୋକେ ନିଜସ୍ବ ଉଦ୍ୟମରେ ପାଳୁଛନ୍ତି ସେହି ଐତିହାସିକ ମାଥିଲି ଗୁଳିକାଣ୍ଡ ଦିବସ । ଏହି ଅବସରେ ହସ୍ତତନ୍ତ ବୟନ ଶିଳ୍ପ ମନ୍ତ୍ରୀ ପଦ୍ମିନୀ ଦିଆନ, ନବରଙ୍ଗପୁର ସାଂସଦ ରମେଶ ମାଝୀ, ଚିତ୍ରକୋଣ୍ଡା ଓ ମାଲକାନଗିରି ବିଧାୟକ ଓ ଆଦିବାସୀ ଉନ୍ନୟନ ପରିଷଦର ସଭାପତି ମାନସ ମାଡକାମୀ ପ୍ରମୁଖ ଯୋଗ ଦେଇଥିଲେ ।
୧୯୪୨ ମସିହାର ସେହି ଐତିହାସିକ ଦିନଟି ଆଜି ପାଳିତ ହୋଇଥିଲା । ସ୍ଥାନୀୟ ବସଷ୍ଟାଣ୍ଡ ଠାରୁ ଶହୀଦ ସ୍ମୃତିସ୍ତମ୍ଭ ଯାଏଁ ଏକ ବିରାଟ ଶୋଭାଯାତ୍ରାରେ ସ୍କୁଲ କୋଲେଜ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ସାଧାରଣ ଲୋକ ଓ ମନ୍ତ୍ରୀ ସାଂସଦ ସମସ୍ତେ ଆସିଥିଲେ ଶହୀଦ ସ୍ତମ୍ଭ ନିକଟକୁ । ହେଲେ ସରକାର ଆଜିଯାଏ ଏହାକୁ ସ୍ବୀକୃତି ଦେଇନଥିବା ବେଳେ କେବେ ସ୍ବୀକୃତି ଦେବେ ତାକୁ ଅପେକ୍ଷା ।
ମାଲକାନଗିରିରୁ ଜୟନ୍ତ ତିଆଡି ଇଟିଭି ଭାରତ
