ମାଲକାନଗିରି: ଲଗାଣ ବର୍ଷା ଯୋଗୁ ଜିଲ୍ଲାରେ ସୃଷ୍ଟି ହୋଇଥିବା ବନ୍ୟା ପରିସ୍ଥିତିରେ ସୁଧାର ଆସିଛି । ତଥାପି ଜିଲ୍ଲାରେ ବର୍ଷା ଲାଗି ରହିଥିବାରୁ ସମସ୍ତ ନଦୀରେ ବିପଦ ସଂକେତ ଉପରେ ଜଳ ପ୍ରଭାହିତ ହେଉଛି । ପାଙ୍ଗାମ, କାଙ୍କୁରକୋଣ୍ଡା, ପୋଟେରୁ, କୋରକୋଣ୍ଡା, ଏମଭି37, ଚାଲନଗୁଡା ଓ କନ୍ୟାଶ୍ରମ ନଦୀ ପୋଲଉପରେ ପାଣି କମିଥିବା ସହ ମାଲକାନଗିରି ଠାରୁ ଜୟପୁର, ବାଲିମେଳା, କାଲିମେଳା, ମୋଟୁ ଓ ପୋଡ଼ସି ରାଜ୍ୟ ଛତିଶଗଡ଼ର ସୁକୁମା ଅଞ୍ଚଳକୁ ଯାନ ବାହନ ଚଳାଚଳ ମଧ୍ୟ ଆରମ୍ଭ ହୋଇଛି ।
ବନ୍ୟା ଯୋଗୁ ମାଲକାନଗିରି ଜିଲ୍ଲାର 6ଟି ବ୍ଲକ ପ୍ରଭାବିତ ହୋଇଛି । ତେବେ କରୁକୋଣ୍ଡା, ମାଥିଲି ଓ କାଲିମେଳା ବ୍ଲକ ସବୁଠାରୁ ଅଧିକା କ୍ଷତିଗ୍ରସ୍ତ ହୋଇଛି । ବନ୍ୟାକୁ ଦେଖି ଶୁକ୍ରବାର (3 ଅଗଷ୍ଟ) ଦିନ ଜିଲ୍ଲାପାଳ ଦୁଇ ଦିନ ଲାଗି ସ୍କୁଲ କଲେଜକୁ ଛୁଟି ଘୋଷଣା କରିଥିଲେ । ବର୍ଷାର ପରିମାଣ ବଢିଲେ ଏହାକୁ ଆହୁରି ଅଧିକ ବଢାଯାଇପାରେ । ପରିସ୍ଥିତି ଉପରେ ନଜର ରଖିବା ପାଇଁ ଜିଲ୍ଲାର ସମସ୍ତ ବିଡ଼ିଓ, ତହସିଲଦାର ଓ ସମସ୍ତ ଥାନାର ଆଇଆଇସି ମାନଙ୍କୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ।
ତଳିଆ ଅଞ୍ଚଳର ଲୋକଙ୍କୁ ସୁରକ୍ଷା ପ୍ରଦାନ କରିବା ଲାଗି 630 ଜଣଙ୍କୁ 23ଟି ବନ୍ୟା ଆଶ୍ରୟ ସ୍ଥଳିରେ ରଖାଯାଇ ସେମାନଙ୍କୁ ରନ୍ଧା ଖାଦ୍ୟ ଦିଆ ଯାଉଛି । ବନ୍ୟାରେ 40ହେକ୍ଟର ଚାଷ ଜମି ବର୍ତ୍ତମାନ ସୁଦ୍ଧା କୌଣସି ସହାୟତା ମିଳିନଥିବା ବେଳେ ଆକଳନ କରାଯାଇ ସମସ୍ତଙ୍କୁ କ୍ଷତିପୂରଣ ଦିଆଯିବ ବୋଲି ଜିଲ୍ଲା ଜରୁରୀକାଳୀନ ଅଧିକାରୀ କହିଛନ୍ତି । ବନ୍ୟା ସହ ମୁକାବିଲା କରିବା ପାଇଁ କେଉଁ ପଦକ୍ଷେପ ଜିଲ୍ଲା ପ୍ରଶାସନ ନେଉଛି ସେ ନେଇ ସମ୍ପୂର୍ଣ ବିବରଣୀ ଦେଇଛନ୍ତି ମାଲକାନଗିରି ଜିଲ୍ଲା ଜରୁରୀକାଳୀନ ଅଧିକାରୀ ଅକ୍ଷୟ ଖେମୁଡୁ ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
