ମାଲକାନଗିରି: ଇତିହାସରେ ପ୍ରଥମଥର ପାଇଁ ମାଓବାଦୀ ବନାମ ଆଦିବାସୀ ଲଢେଇ ଦେଖିବାକୁ ମିଳିଛି । ଯେଉଁ ମାଓବାଦୀ ଦିନେ ଆଦିବାସୀଙ୍କୁ ଢାଲ କରି ଉନ୍ନୟନ ମୂଳକ କାର୍ଯ୍ୟକୁ ବିରୋଧ କରୁଥିଲେ ଏବେ ସେହି ଆଦିବାସୀ ମାଓବାଦୀଙ୍କୁ ଦେଇଛନ୍ତି ପାନେ। ଦୀର୍ଘ ୬ ଦଶନ୍ଦି ପରେ ଏଭଳି ଚିତ୍ର ଦେଖିବାକୁ ମିଳିଛି ମାଲାକାନଗିରର ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳରେ ।
ଘଟଣା ଅନୁସାରେ ଗୁରୁପ୍ରିୟା ସେତୁ ନିର୍ମାଣ ହେବା ପରେ ଜାନବାଇ ଠାରୁ ଯୋଡାଆମ୍ବ ପର୍ଯ୍ୟନ୍ତ ଦୀର୍ଘ ୧୪ କିଲୋମିଟର ରାସ୍ତା କାମକୁ ତରାନ୍ବିତ କରିଛି ମାଲକାନଗିରି ପୋଲିସ । ବିଏସଏଫ ଯବାନଙ୍କ କଡା ସୁରକ୍ଷା ବଳୟରେ ଚାଲିଛି ରାସ୍ତା କାମ । ଏହି ବିକାଶ ମୂଳକ କାର୍ଯ୍ୟକୁ ବିରୋଧ କରିବା ପାଇଁ ମାଓବାଦୀ ଆଦିବାସୀଙ୍କୁ ପ୍ରବର୍ତ୍ତାଇଥିଲେ। ମାଓ ସଙ୍ଗଠନର ୨୦ ରୁ ୨୫ ଜଣ ସଦସ୍ୟ ଶନିବାର ରାତିରେ ପହଞ୍ଚିଥିଲେ ଜନ୍ତୁରାଇ ଗାଁରେ। ଗାଁ ଲୋକେ ନକ୍ସଲଙ୍କ କଥା ନଶୁଣିବାରୁ, ସେମାନେ ଆଦିବାସୀଙ୍କୁ ଭୟଭୀତ କରିବା ଲାଗି ଫାଙ୍କା ଗୁଳି ଚାଳନା କରିଥିଲେ।
ଯାହାର ଜବାବ ଦେବାକୁ ଯାଇ ଆଦିବାସୀ ପଥର ମାଡ କରିବା ସହ ପାରମ୍ପରିକ ଅସ୍ତ୍ରଶସ୍ତ୍ରରେ ପାଲଟା ଆକ୍ରମଣ କରିଥିଲେ । ଏହି ସଂଘର୍ଷରେ ଜଣେ ମାଓନେତାଙ୍କ ମୃତ୍ୟୁ ହେବା ସହ ଅନ୍ୟ ଜଣେ ଗୁରୁତର ଭାବେ ଆହତ ହୋଇଛନ୍ତି । ଆହତ ମାଓବାଦୀକୁ ଧରି ଆଦିବାସୀ ସୁରକ୍ଷାକର୍ମୀଙ୍କୁ ହସ୍ତାନ୍ତର କରିଛନ୍ତି।
ଜନ୍ତୁରାଇ ଗାଁ ଲୋକଙ୍କ ଆକ୍ରମଣରେ ପ୍ରାଣ ହରାଇଥିବା ମାଓବାଦୀ ହେଉଛନ୍ତି ଗୁମ୍ମା ଏରିଆ କମିଟି ମେମ୍ବର ଗଙ୍ଗା ମାଢି। ଏହି ମାଓନେତାଙ୍କ ନାମରେ ରାଜ୍ୟ ସରକାର ପୁର୍ବରୁ ଏକ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ । ଆହତ ହୋଇ ଧରାପଡିଥିବା ମାଓବାଦୀ ହେଉଛନ୍ତି କୋରାପୁଟ ନାରାୟଣପାଟଣା ନକ୍ସଲ ସଙ୍ଗଠନର ଏସିଏମ । ତାଙ୍କ ଉପରେ ପୂର୍ବରୁ ରାଜ୍ୟ ସରକାର 4 ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ। ଦୁଇ ଜଣ ହାର୍ଡକୋର ମାଓବାଦୀ ଗାଁ ଲୋକଙ୍କ ହାତରେ ଧରା ପଡିବା ପରେ ସେଠାରେ ଦେଖାଦେଇଛି ଉତ୍ତେଜନା।
ପୁଣି ଥରେ ଲାଲବାହିନୀ ଜନ୍ତୁରାଇ ଗାଁରେ ପହଞ୍ଚି ପୋଡାଜଳା କରିଛନ୍ତି। ନିରୀହ ଆଦିବାସୀ ଲୋକଙ୍କ ଘର ଦ୍ବାର ଭାଙ୍ଗିବା ସହ ୧୦ଟି ଘରେ ନିଆଁ ଲଗାଇ ଦେଇଛନ୍ତି । ଏହାସହ ୫ଟି ମୋଟର ସାଇକେଲକୁ ମଧ୍ୟ ନିଆ ଲଗାଇ ପୋଡି ଦେଇଛନ୍ତି ନକ୍ସଲ । ଫଳରେ ଗାଁ ଲୋକେ ଏବେ ଭୟଭୀତ ହୋଇ ଜୀବନ ବଞ୍ଚାଇବା ପାଇଁ ଗାଁ ଛାଡି ଅନ୍ୟତ୍ର ଚାଲି ଯାଇଛନ୍ତି।
ସରକାରଙ୍କ ଉନ୍ନୟନମୂଳକ କାମରେ ବାଧା ସୃଷ୍ଟି କରିବା ଲାଗି ଯାଇଥିବା ନକ୍ସଲଙ୍କୁ ପ୍ରଥମ ଥର ଲାଗି ଏମିତି ହଟହଟା ହେବାକୁ ପଡିଛି। ସ୍ବାଧୀନତାର ୭୩ ବର୍ଷ ପରେ ନିଜ ଅଞ୍ଚଳ ବିକାଶ ଲାଗି ନକ୍ସଳଙ୍କୁ ଘୋର ବିରୋଧ କରିଛନ୍ତି ସ୍ବାଭିମାନ ଅଞ୍ଚଳର ବାସିନ୍ଦା। ଯାହାକୁ ଦେଖି ଚିତ୍ରକୋଣ୍ଡା ବିଚ୍ଛିନାଞ୍ଚଳରେ ପୂର୍ଣ୍ଣ ସ୍ବରାଜ୍ୟ ଫେରିବା ପରି ଲାଗୁଛି।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
