ମାଲକାନଗିରି: କାଲିମେଳା ବ୍ଲକ ଚିନ୍ତଲୱାଡା ଗ୍ରାମପଞ୍ଚାୟତର ପରଜାଗୁଡା ଗାଁ । ଏହି ଗାଁରେ ଦିନେ ନକ୍ସଲ ରାଜୁତି ଚାଲୁଥିଲା । ପଞ୍ଚାୟତର ଅଧିକାଂଶଙ୍କ ହାତରେ ଥିଲା ବନ୍ଧୁକ । ହେଲେ 2014ରେ ପଞ୍ଚାୟତବାସୀ ସମାଜର ମୁଖ୍ୟସ୍ରୋତକୁ ଫେରିବା ପାଇଁ ପୋଲିସ ନିକଟରେ କରିଥିଲେ ଆତ୍ମସମର୍ପଣ । ଆଉ ଏସବୁ ମଧ୍ୟରେ ବିତି ଯାଇଛି ପାଞ୍ଚ ବର୍ଷ । ହେଲେ କେମିତି ରହିଛି ଚିନ୍ତଲୱାଡା ପଞ୍ଚାୟତ...ସେଠାକାର ପ୍ରକୃତ ସ୍ଥିତି ପରଖିବାକୁ ଗ୍ରାଉଣ୍ଡ ଜିରୋରେ ପହଞ୍ଚିଥିଲେ ଆମ ରିପୋର୍ଟର । ପାହାଡିହା ରାସ୍ତାରେ ଏହି ଅପହଞ୍ଚ ଇଲାକାକୁ ଯାଉଯାଉ କେଉଁଠି କାଦୁଅରେ ଗାଡି ଫସିଥିଲା ତ କେଉଁଠି ଗାଡିରୁ ଓହ୍ଲାଇ ପାଣିରେ ଚାଲିବାକୁ ପଡିଥିଲା । ଶେଷରେ ଗାଁରେ ପହଞ୍ଚିବା ପରେ ସେଠାରେ ସମସ୍ୟାର ପାହାଡ ଥିବା ଜାଣିବାକୁ ମିଳିଥିଲା ।
ତେବେ ଗାଁର ସବୁ କିଛି ଆମକୁ ଯେମିତି ନଗ୍ନ ଚିତ୍ର ପରି ଲାଗୁଥିଲା । ଗ୍ରାମବାସୀମାନେ ନିଜେ ଗାଁ ଭିତରେ ଢଳେଇ ରାସ୍ତା କରିଥିଲେ ବି ଗାଁରେ ଗୋଟିଏ ବି ହେଲେ ଛାତ ଘର ନାହିଁ । କେବଳ ଆଜବେଷ୍ଟସ ଓ ଝୁମ୍ପୁଡି ଘରେ କାଳତିପାତ କରୁଛନ୍ତି ଏଠାକାର ଆଦିବାସୀ । ସେପଟେ ଶିକ୍ଷା ଓ ସ୍ବାସ୍ଥ୍ୟ କଥା ନକହିବା ଭଲ । ଗାଁରେ ଥିବା ପ୍ରାଥମିକ ବିଦ୍ୟାଳୟଟି ଅନେକ ଦିନରୁ ବନ୍ଦ ଥିବାବେଳେ ଅଙ୍ଗନୱାଡି ଘରର 2 ବର୍ଷ ହେବ ଆଜେବେଷ୍ଟସ ଉଡିଯାଇଛି । ବିଶୁଦ୍ଧ ପାଣି ନପାଇ ନଦୀ ନାଳ ପାଣିରେ ଶୋଷ ମେଣ୍ଟାଉଛନ୍ତି ଏମାନେ ।
ଗାଁର ସମସ୍ୟା କ୍ୟାମେରାରେ କଏଦ କରିବା ପରେ ଆମ ସମ୍ବାଦଦାତା ପହଞ୍ଚିଥିଲେ କାଲିମେଳା ବ୍ଲକ କାର୍ଯ୍ୟାଳୟରେ । ହେଲେ ସେଠାରେ ବିଡିଓଙ୍କ ଦେଖା ନପାଇ ବ୍ଲକ ଅଧ୍ୟକ୍ଷଙ୍କୁ ଅବଗତ କରାଇବା ପରେ ଯୁଦ୍ଧକାଳୀନ ଭିତ୍ତିରେ ସମସ୍ୟାର ସମାଧାନ ପାଇଁ ସେ ପ୍ରତିଶ୍ରୁତି ଦେଇଛନ୍ତି ।
ସେପଟେ 2014 ମସିହାରୁ ସ୍ଥାନୀୟ ଅଞ୍ଚଳରୁ ନକ୍ସଲ ରାଜୁତି ଶେଷ ହୋଇଥିଲେ ବି ଏପର୍ଯ୍ୟନ୍ତ ସମାଜର ମୁଖ୍ୟ ସ୍ରୋତ କଣ ଜାଣି ପାରିଲେନି ଏମାନେ । ତେବେ ଦେଖାଯାଉ କେବେ ପ୍ରଶାସନର ଦୃଷ୍ଟି ପଡିବ ଓ କେବେ ବିକାଶର ସ୍ବାଦ ଚାଖିବେ ପରଜାଗୁଡାବାସୀ ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
