ମାଲକାନଗିରି: ଗଞ୍ଜେଇ ମାଫିଆଙ୍କ ମାଡରେ ହୋମଗାର୍ଡଙ୍କ ମୃତ୍ୟୁ ହୋଇଛି । ମୃତ ହୋମଗାର୍ଡ ବନବାସୀ ମହାରଣାଙ୍କୁ ଜିଲ୍ଲା ପୋଲିସ ପକ୍ଷରୁ ଗାର୍ଡ ଅଫ ଅନର ପ୍ରଦାନ କରାଯାଇଛି । ଏଥିସହ ମାଲକାନଗିରି ଜିଲ୍ଲା ପୋଲିସ ଦ୍ୱାରା 36 ଗଞ୍ଜେଇ ମାଫିଆଙ୍କୁ ଗିରଫ କରାଯାଇଛି । ଗିରଫ ସମସ୍ତ ମାଫିଆ ନବରଙ୍ଗପୁର ଜିଲ୍ଲାର କଷାଗୁମୁଡ଼ା ଅଞ୍ଚଳର ଗଞ୍ଜେଇ କାଉଡ଼ିଆ ବୋଲି ସୂଚନା ଦେଇଛନ୍ତି ମାଲକାନଗିରି ଏସପି ଋଷିକେଶ ଦୟାନନ୍ଦ ଖିଲାରୀ ।
ରବିବାର ଗଞ୍ଜେଇ କାଉଡ଼ିଆଙ୍କୁ ଧରିବାକୁ ଯିବାବେଳେ ଜଣେ ହୋମଗାର୍ଡଙ୍କ ମୃତ୍ୟୁ ହୋଇଥିଲା । ଶହୀଦ ହୋମଗାର୍ଡ ବନବାସୀ ମହାରଣାଙ୍କୁ ଜିଲ୍ଲା ପୋଲିସ ପକ୍ଷରୁ ସୋମବାର ଗାର୍ଡ ଅଫ ଅନର ଦିଆଯାଇଛି । ଏହି ଘଟଣା ପରେ ଜିଲ୍ଲାର ବିଭିନ୍ନ ସ୍ଥାନରେ ଗଞ୍ଜେଇ କାଉଡ଼ିଆ ଲୁଚି ରହିଥିବା ବେଳେ ପୋଲିସ ସେମାନଙ୍କୁ ଗିରଫ କରିବାରେ ସଫଳ ହୋଇଛି ।
ତେବେ ଏବେ ବି ଆଉ କିଛି ଗଞ୍ଜେଇ ମାଫିଆ ଲୁଚି ରହିଥିବାରୁ ପୋଲିସ ପକ୍ଷରୁ ଚଢ଼ାଉ ଜାରି ରହିଛି । ଆଗକୁ ଗଞ୍ଜେଇ ଚୋରା ଚାଲାଣକୁ ରୋକିବା ପାଇଁ ଅଧିକ କଡା ପଦକ୍ଷେପ ନିଆଯିବ ଓ ମୃତ ହୋମ ଗାର୍ଡ ବନବାସୀ ମହାରଣାଙ୍କ ବଳିଦାନ ବ୍ୟର୍ଥ ଯିବନି ବୋଲି ମାଲକାନଗିରି ଏସପି କହିଛନ୍ତି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
