ମାଲକାନଗିରି: ଭତ୍ତା ପାଇଁ 30 କିମି.ଚାଲି ଚାଲି ବ୍ଲକ କାର୍ଯ୍ୟାଳୟକୁ ଆସିବାକୁ ପଡୁଛି ଆଦିମ ଜନଜାତି ବଣ୍ଡାଙ୍କୁ । ଏଭଳି କିଛି ଚିତ୍ର ଦେଖିବାକୁ ମିଳିଛି ଜିଲ୍ଲାର ଖଇରପୁଟ ଅଞ୍ଚଳରେ । ରାଜ୍ୟ ସରକାରଙ୍କ ପାଖରୁ ଆରମ୍ଭ କରି କେନ୍ଦ୍ର ସରକାରଙ୍କ ପର୍ଯ୍ୟନ୍ତ ବଣ୍ଡା ଜନଜାତିଙ୍କ ଉନ୍ନତି ପାଇଁ କେତେ କଣ ଯୋଜନା କରୁଛନ୍ତି । କିନ୍ତୁ ବାସ୍ତବ ଚିତ୍ର ଏଠି ସମ୍ପୂର୍ଣ୍ଣ ଅଲଗା । କାରଣ ସରକାରୀ କର୍ମଚାରୀ ମାନଙ୍କ ଉଦାସୀନତା ପାଇଁ ଆଦିମ ଜନଜାତି ବଣ୍ଡାଙ୍କୁ ଦୀର୍ଘ 30 କିମି ପାହାଡ଼ ପର୍ବତ ପାର ହୋଇ ବ୍ଲକ କାର୍ଯ୍ୟାଳୟକୁ ଆସିବାକୁ ପଡୁଛି ଭତ୍ତା ପାଇଁ ।
ଖଇରପୁଟ ବ୍ଲକ ଅନ୍ତର୍ଗତ ବଣ୍ଡାଘାଟିର ମୁଦୁଲିପଡା ପଞ୍ଚାୟତର ବୃଦ୍ଧାବୃଦ୍ଧ ମାନଙ୍କୁ ଦୀର୍ଘ 30 କିମି ପାହାଡ଼ ପର୍ବତ ଘାଟି ପାର ହୋଇ ଖଇରପୁଟ ବ୍ଳକ କାର୍ଯ୍ୟାଳୟକୁ ଆସିବାକୁ ପଡୁଛି । ଏହି ବିଷୟରେ ସଂପୃକ୍ତ ଅଧିକାରୀ ରୋହିତ ମଣି ଧାରୁଆଙ୍କୁ ବଣ୍ଡା ଲୋକେ ଅଭିଯୋଗ କରିଥିଲେ ସୁଦ୍ଧା ସେ କର୍ଣ୍ଣପାତ କରିନଥିବା ଅଭିଯୋଗ ହୋଇଛି ।
ସେପଟେ ସଂପୃକ୍ତ ଅଧିକାରୀ ଜଣକ ସରକାରଙ୍କ ନିୟମକୁ ଖୋଲା ଖୋଲି ଭାବେ ଉଲ୍ଲଂଘନ କରୁଥିବା ଦେଖିବାକୁ ମିଳିଛି । ଏଭଳି ଏକ ସମ୍ବେଦନଶୀଳ ଘଟଣାକୁ ଜିଲ୍ଲା ପ୍ରଶାସନ ଗୁରୁତର ସହ ନେଇ ସମ୍ପୃକ୍ତ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ବଣ୍ଡାଘାଟିର ମୁଦୁଲିପଡା ପଞ୍ଚାୟତ କାର୍ଯ୍ୟାଳୟରେ ଭତ୍ତା ବଣ୍ଟନ କରିବାକୁ ସାଧାରଣରେ ଦାବି ହେଉଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
