ମାଲାକାନାଗିରି: ଅଶାନ୍ତ ବିଚ୍ଛିନ୍ନାଞ୍ଚଳକୁ ଶାନ୍ତ କରିବାକୁ ଅଣ୍ଟା ଭିଡ଼ିଛି ଜିଲ୍ଲା ପ୍ରଶାସନ । କିଛିଦିନ ଧରି ବିଛିନ୍ନାଞ୍ଚଳରେ ଜାରି ରହିଥିବା ପ୍ରଜାମେଳି ଏବଂ ଆନ୍ଦୋଳନକୁ ସ୍ବାଭାବିକ କରି ସ୍ବାଭିମାନ ଅଞ୍ଚଳ ଭାବେ ଗଢି ତଳିବାକୁ ନେଇଛି ପ୍ରଶାସନ ନିଷ୍ପତି । ଦୀର୍ଘ 6 ଦଶନ୍ଧି ଧରି ଜଳବନ୍ଦୀ ଜୀବନ କାଟୁଥିବା ମାଲକାନଗିରି ଜିଲ୍ଲାର ବିଛିନ୍ନାଞ୍ଚଳ ଅନ୍ତର୍ଗତ 100ରୁ ଉର୍ଦ୍ଧ୍ବ ଗ୍ରାମରେ ବାସ କରୁଥିବା 30ହଜାରରୁ ଉର୍ଦ୍ଧ୍ବ ଆଦିବାସୀଙ୍କ ନିକଟରେ ଚଳିତ ମାସ 3 ତାରିଖରୁ ମାଲକାନଗିରି ପ୍ରଶାସନ ପହଞ୍ଚିବ ।
ଯେଉଁ କାମ ବ୍ଲକ କିମ୍ବା ପଞ୍ଚାୟତ ସ୍ତରରେ ହେଉଥିଲା ବର୍ତ୍ତମାନ ତାହା ଜନସେବା ମାଧ୍ୟମରେ ଉକ୍ତ ଗ୍ରାମ ମାନଙ୍କରେ ସମାଧାନ ହେବ । ପାନୀୟ ଜଳ ଠାରୁ ଆରମ୍ଭ କରି ରାସ୍ତାଘାଟ, ବିଦ୍ୟାଳୟ ସମସ୍ୟା , ଅଙ୍ଗନବାଡି କେନ୍ଦ୍ରର ସମସ୍ୟା ସହ ରାସ୍ତାଘାଟ ଭଳି ମୌଳିକ ସମସ୍ୟା ସବୁର ସମାଧାନକୁ ନେଇ ମାଲକାନଗିରି ଜିଲ୍ଲାପାଳ ମନୀଷ ଅଗ୍ରୱାଲ ଚିଠି ଜାରି କରିଛନ୍ତି ।
ବିଛିନ୍ନାଞ୍ଚଳର ଥିବା 9ଟି ପଞ୍ଚାୟତରେ ଆସନ୍ତାକାଲି ଠାରୁ ପ୍ରଶାସନ ପହଁଚି ଲୋକଙ୍କ ସମସ୍ୟାକୁ ସୁଧାରିବ । ପ୍ରଶାସନର ଏହି ପଦକ୍ଷେପ ପରେ ଜଳବନ୍ଦୀ ଜୀବନ କାଟୁଥିବା ବିଛିନ୍ନାଞ୍ଚଳବାସୀଙ୍କ ପାଇଁ ଆଗାମୀ ଦିନରେ ଏହା ଅନେକ ଫଳପ୍ରଦ ସାବ୍ୟସ୍ତ ହେବ ବୋଲି ଜଣାପଡିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
