ମାଲକାନଗିରି: ଧାନ କିଣାରେ ବ୍ୟାପକ ଦୁର୍ନୀତି ନେଇ କଂଗ୍ରେସ ପକ୍ଷରୁ ଦାବିପତ୍ର ପ୍ରଦାନ । ମାଲକାନଗିରି ଜିଲ୍ଲାରେ ଧାନ କିଣା କାରବାର ପଛରେ ଏକ ବଡ଼ ଧରଣର ରାକେଟ କାର୍ଯ୍ୟ କରୁଛି । ଏହି ଧାନ କିଣା କାରବାର ପଛରେ ତଳରୁ ଉପର ପର୍ଯ୍ୟନ୍ତ କିଛି ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡ଼ିତ ଥିବାବେଳେ ଯୋଗାଣ ବିଭାଗର ଜଣେ ଅଧିକାରୀଙ୍କ ଅଡିଓ କ୍ଲିପ୍ ଭାଇରାଲ ଘଟଣା ସାଧାରଣରେ ଆଲୋଡ଼ନ ସୃଷ୍ଟି କରିଛି ।
ଗତ ଧାନ କିଣା ସମୟରେ ଜିଲ୍ଲାରେ କିଛି ମହିଳା ସ୍ବୟଂ ସହାୟକ ଦଳକୁ ଧାନ କିଣିବାକୁ ଦାୟିତ୍ବ ଦିଆଯାଇଥିଲା । ମାଲକାନଗିରି ବ୍ଲକର ଚାଲାଣଗୁଡା ମଣ୍ଡିରେ ଲକ୍ଷ୍ମୀଦେବୀ ମହିଳା ସ୍ଵୟଂ ସହାୟକ ଦଳକୁ ଦାୟିତ୍ବ ମିଳିଥିଲା । ମଣ୍ଡିରେ ଧାନ କିଣାରେ ବ୍ୟାପକ ଦୁର୍ନୀତି ହୋଇଥିବା ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା । ସଂପୃକ୍ତ ଯୋଗାଣ ଅଧିକାରୀ ଜଣକ କିଛି ଦଲାଲଙ୍କୁ ନେଇ ଘଟଣାକୁ ଚପାଇ ଦେବାକୁ ସ୍ପଷ୍ଟ ହୋଇଛି । ମଣ୍ଡିରେ ଦଲାଲଙ୍କ ଜରିଆରେ ଧାନ କିଣାଯାଉଥିବା ନେଇ ଅଭିଯୋଗ ହୋଇଥିଲା । କଂଗ୍ରେସ ଦଳର କାର୍ଯ୍ୟକାରୀ ସଭାପତି ରାମ ପ୍ରସାଦ ପଟ୍ଟନାୟକ ସଂପୃକ୍ତ ଯୋଗାଣ ଅଧିକାରୀଙ୍କ ବିରୋଧରେ ଉଚ୍ଚସ୍ତରୀୟ ତଦନ୍ତ କରିବାକୁ ଦାବି କରିଛନ୍ତି ।
ଅପରପକ୍ଷରେ ନିଜେ ଉପଜିଲ୍ଲାପାଳ ଏହି ମାମଲାରେ ସଂପୃକ୍ତ ଥିବା ନେଇ ଅଡିଓରେ ରହିଥିବାବେଳେ ତାଙ୍କୁ ତଦନ୍ତ ଦାୟିତ୍ବ ଦିଆନଯାଉ । ଜଣେଉଚ୍ଚସ୍ତରୀୟ ଅଧିକାରୀଙ୍କୁ ତଦନ୍ତ ଦାୟିତ୍ବ ଦେଇ ନିରପେକ୍ଷ ଭାବେ ତଦନ୍ତ କରିବା ପାଇଁ ଦାବି କରିଛନ୍ତି । ଏ ନେଇ କଂଗ୍ରେସ ଦଳ ପକ୍ଷରୁ ଏସପି ଓ ଜିଲ୍ଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଏହି ଅଡିଓ ଭାଇରାଲ ହେବା ପରେ ଜିଲ୍ଲା ଯୋଗାଣ ବିଭାଗର ପାରିବା ପଣିଆ ପଦାରେ ପଡିଛି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
