ମାଲକାନଗିରି: ପୁରୀ ଜଗନ୍ନାଥ ମନ୍ଦିର ରୀତିନୀତି ଅନୁସାରେ ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲାରେ ମଧ୍ୟ ଖୁବ୍ ଧୁମ୍ଧାମ୍ରେ ପାଳିତ ହୋଇଛି ରଥଯାତ୍ରା । ଭୋର ୪ଟାରୁ ମନ୍ଦିର ଦ୍ୱାର ଖୋଲାଯିବା ପରେ ଦ୍ବାରଫିଟା, ମଙ୍ଗଳ ଆଳତୀ, ମଇଲମ ଓ ତଡପ ଲାଗି ଆଦି ନୀତିକାନ୍ତି ଅନୁଷ୍ଠିତ ହୋଇଥିଲା । ଦିନ ୧୧ଟାରେ ଆରମ୍ଭ ହୋଇଥିଲା ପହଣ୍ଡି ବିଜେ ।
ଧାଡ଼ି ପହଣ୍ଡିରେ ଆସିଥିଲେ ମହାପ୍ରଭୁ । ତାପରେ ଅପରାହ୍ନ ସାଢେ ତିନିଟାରେ ଛେରାପହଁରା ଏବଂ ଦିନ ୪ଟାରୁ ରଥଟଣା ହୋଇଥିଲା । ଆକାଶ ମେଘାଚ୍ଛନ୍ନ ରହିଥିଲେ ବି ହରିବୋଲ, ହୁଳହୁଳି ସହ ଖଞ୍ଜଣୀ କୀର୍ତ୍ତନରେ କମ୍ପି ଉଠିଥିଲା ଚତୁର୍ଦ୍ଦିଗ । ତିନି ଠାକୁରଙ୍କୁ ଏକାଠି ଦେଖି ଭାବବିହ୍ବଳ ହୋଇଥିଲେ ଭକ୍ତ । ସମଗ୍ର ପରିବେଶ ହୋଇଥିଲା ଜଗନ୍ନାଥମୟ ।
ଚଳିତ ରଥଯାତ୍ରା ଅବସରରେ ପଡୋଶୀ ରାଜ୍ୟ ଛତିଶଗଡ ସମେତ ଆନ୍ଧ୍ରପ୍ରଦେଶରୁ ଆସିଥିବା ଭକ୍ତଙ୍କର ଭିଡ଼ ପରିଲକ୍ଷିତ ହୋଇଥିଲା । ତେଣୁ ସୁରକ୍ଷା ଦୃଷ୍ଟିରୁ ଗୁରୁତ୍ଵ ଦେଇ ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯିବା ସହ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା ।
ମାଲକାନଗିରିରୁ ଜୟନ୍ତ କୁମାର ତିଆଡି, ଇଟିଭି ଭାରତ
