ମାଲକାନଗିରି: ମାଥିଲି ଥାନା ପରିସରରେ ଥିବା ଶହୀଦ ସ୍ମୃତି ସ୍ତମ୍ଭ ନିକଟରେ ୮୦ତମ ମାଥିଲି ଗୁଳିକାଣ୍ଡ ଦିବସ ପାଳିତ ହୋଇଛି । ଏହି ଅବସରରେ ମାଥିଲି ପୂରୁଣା ଶହୀଦ ଭବନଠାରୁ ଏକ ମଶାଲ ଶୋଭାଯାତ୍ରା ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ମାଣ୍ୟଗନ୍ୟ ବ୍ୟକ୍ତି ଯୋଗ ଦେଇ ଶହୀଦ ସ୍ତମ୍ଭରେ ପୁଷ୍ପ ମାଲ୍ୟାର୍ପଣ କରିବା ସହ ସ୍ମୁତିଚାରଣ କରିଥିଲେ ।
ଶୋଭାଯାତ୍ରାରେ ସାଂସଦ ରମେଶ ମାଝୀ, ବିଧାୟକ ପୂର୍ଣ୍ଣଚନ୍ଦ୍ର ବାକା, ମାନସ ମାଡକାମୀ, ଅଧ୍ୟକ୍ଷ ମହେଶ ବାକା, ପୂର୍ବତନ ମନ୍ତ୍ରୀ ପଦ୍ମିନୀ ଦିଆନ ପ୍ରମୁଖଙ୍କ ସହ ବିଭିନ୍ନ ଦଳୀୟ କର୍ମୀ ଏବଂ ଛାତ୍ରଛାତ୍ରୀ ମଶାଲ ଶୋଭାଯାତ୍ରାରେ ଭାଗନେଇଥିଲେ । ଶୋଭାଯାତ୍ରା ମାଥିଲି ଥାନା ପରିସରରେ ପହଞ୍ଚିବା ପରେ ସେଠାରେ ଥିବା ଶହୀଦ ସ୍ତମ୍ଭ ନିକଟରେ ପୋଲିସ ପକ୍ଷରୁ ସଲାମୀ ଦିଆଯାଇଥିଲା । ପରେ ସ୍ଥାନୀୟ ଲକ୍ଷ୍ମଣ ନାୟକ ଭବନରେ ଏକ ସାଧାରଣ ସଭା ଆୟୋଜନ କରିବା ସହ ଶହୀଦଙ୍କ ଦାୟାଦମାନଙ୍କୁ ସମ୍ମାନିତ କରାଯାଇଥିଲା ।
ଶହୀଦଙ୍କ ବଳିଦାନକୁ ଅମର ରଖିବା ପାଇଁ ଏହି ଦିବସକୁ ସରକାରୀ ମାନ୍ୟତା ପ୍ରଦାନ ପାଇଁ ଦାବି କରିଛନ୍ତି ଅଞ୍ଚଳବାସୀ । ଅନ୍ୟସ୍ଥାନ ଭଳି ସରକାରୀ ସ୍ତରରେ ଶହୀଦ ଦିବସ ପାଳନ କରାଯିବା ସହ ଶହୀଦଙ୍କ ଦାୟାଦମାନଙ୍କୁ ସରକାରୀ ସୁବିଧା ଯୋଗାଇ ସେମାନଙ୍କ ଗାଁର ଉନ୍ନତି ପାଇଁ ଦାବି କରିଛନ୍ତି ଅଞ୍ଚଳବାସୀ ।
୧୯୪୨ ମସିହାରେ ବ୍ରିଟିଶ ସରକାରଙ୍କ ବିରୁଦ୍ଧରେ ସ୍ଵର ଉତ୍ତୋଳନ କରି ମାଥିଲି ଥାନା ଉପରେ ଆକ୍ରମଣ କରିଥିଲେ ଶତାଧିକ ଆଦିବାସୀ ସଂଗ୍ରାମୀ । ଥାନା ଉପରେ ତ୍ରିରଙ୍ଗା ପତାକା ଲଗାଇବାକୁ ଯାଇ ଶହୀଦ ହୋଇଥିଲେ ଅନେକ ଆଦିବାସୀ ବୀର ପୁରୁଷ । ସେମାନଙ୍କୁ ମନେ ପକାଇ ପ୍ରତିବର୍ଷ ପାଳିତ ହେଉଛି ମାଥିଲି ଗୁଳିକାଣ୍ଡ ଦିବସ ।
ଇଟିଭି ଭାରତ, ମାଲକାନଗିରି
