ବାରିପଦା: କୋଭିଡ ନିୟମ ଉଲ୍ଲଙ୍ଘନ ହେଲେ ଦୋକାନ ସିଲ୍ କରାଯିବ । ଦ୍ବିତୀୟ ପର୍ଯ୍ୟାୟ କୋଭିଡ ସଂକ୍ରମଣ ରୋକିବାକୁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ପକ୍ଷରୁ ନିୟମ କଡାକଡି ପାଳନ କରିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି । ଶୁକ୍ରବାର ଭାରତ ବନ୍ଦ ପାଇଁ ଦିନ ବେଳେ ସହରରେ ଦୋକାନ ବଜାର ବନ୍ଦ ଥିବାବେଳେ ସନ୍ଧ୍ୟା ସମୟରେ ଦୋକାନ ବଜାର ଖୋଲା ଯାଇଥିଲା । ତେବେ ସନ୍ଧ୍ୟା ସମୟରେ ଦୋକାନ ନିକଟରେ କୋଭିଡ ନିୟମକୁ ନ ପାଳି ବ୍ୟବସାୟ କରାଯାଉଥିବା ଦେଖିବାକୁ ମିଳିଥିଲା।
କୋଭିଡ ନିୟମ ଉଲଂଘନ ଅଭିଯୋଗ, ସିଲ ହେଲା 5ଟି ବଡ ଦୋକାନ
ଖବର ପାଇ ଜିଲ୍ଲା ପ୍ରଶାସନ ଓ ବାରିପଦା ଟାଉନ ପୋଲିସ ସହାୟତାରେ ବାରିପଦା ତହସିଲଦାରଙ୍କ ଉପସ୍ଥିତିରେ କୋଭିଡ ନିୟମ ଉଲ୍ଲଙ୍ଘନ ଅଭିଯୋଗରେ 5 ଟି ବଡ଼ ଦୋକାନକୁ ସିଲ କରାଯାଇଛି । ଅନ୍ୟପକ୍ଷେ ବାରିପଦା ସହରର କୃଷ୍ଣଚନ୍ଦ୍ର ଗୋଲେଇ, ମେନ ମାର୍କେଟ, ହସ୍ପିଟାଲ ରୋଡ଼, ଭଞ୍ଜପୁର ଅଞ୍ଚଳରେ ଅନ୍ୟ ଛୋଟ ଠେଲା ଦୋକାନୀଙ୍କୁ ନିୟମ କଡାକଡି ପାଳନ କରିବାକୁ ସତର୍କ ସୂଚନା ଦେଇଛି ପ୍ରଶାସନ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
