ମାଲକାନଗିରି: ବେଆଇନ ଗଞ୍ଜେଇ ଫସଲ ନଷ୍ଟ । ଜିଲ୍ଲା ଅବକାରୀ ବିଭାଗ ଓ ବନ ବିଭାଗ ମିଳିତ ଭାବେ ଚଢାଉ କରି ବାପନପାଲ୍ଲୀ ଗ୍ରାମରେ ବେଆଇନ ଭାବେ ଚାଷ ହେଉଥିବା ଗଞ୍ଜେଇ ଫସଲକୁ ନଷ୍ଟ କରିଛି । ନଷ୍ଟ ହୋଇଥିବା ଗଞ୍ଜେଇ ଚାଷର ଆନୁମାନିକ ବଜାର ମୂଲ୍ୟ 5 କୋଟି ହେବ ।
ବାପନପାଲ୍ଲୀ କୌଣସି ମାଓ ପ୍ରଭାବିତ ଅଞ୍ଚଳ ହୋଇ ନଥିବାବେଳେ ଏଠାରେ ଏକର ଏକର ଜମିରେ ବେଆଇନ ଭାବେ ଗଞ୍ଜେଇ ଚାଷ କରାଯାଉଛି । ଯାହାକୁ ଶୁକ୍ରବାର ଅବକାରୀ କର୍ମଚାରୀମାନେ ଅତ୍ୟାଧୁନିକ ଯନ୍ତ୍ରପାତି ସହାୟତାରେ କାଟି ନିଆଁ ଲଗାଇ ପୋଡି ଦିଆଯାଇଛି । ପ୍ରାୟ 36 ଏକର ଜଙ୍ଗଲ ଜମିରେ ବେଆଇନ ଭାବେ ଲଗାଯାଇଥିବା 54,000 ଗଞ୍ଜେଇ ଗଛକୁ କାଟି ନଷ୍ଟ କରାଯାଇଛି ।
ବର୍ତ୍ତମାନ ଗଞ୍ଜେଇ ଅମଳର ସମୟ ପାଖକୁ ଆସିଛି । ତେଣୁ ଆଗାମୀ ଦିନରେ ମଧ୍ୟ ଜିଲ୍ଲାର ବିଭିନ୍ନ ଅଞ୍ଚଳରେ ଏପରି ଚଢାଉ କରାଯିବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ମିଳିଛି । ସେପଟେ ସଦର ମହକୁମା ଠାରୁ ମାତ୍ର 30 କିମି ଦୁରରେ ଏକର ଏକର ଜମିରେ ଗଞ୍ଜେଇ ଚାଷ କରାଯାଉଥିବା ବେଳେ ଆଜି ପର୍ଯ୍ୟନ୍ତ କେମିତି ମାଲକାନଗିରି ଅଵକାରୀ ବିଭାଗ ଓ ପୋଲିସ ଜାଣିପାରିନାହିଁ ସେ ନେଇ ସାଧାରଣରେ ପ୍ରଶ୍ନ ଉଠିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
