କୋରାପୁଟ: ସ୍ୱାଧୀନତାର ଆକ୍ଷରିକ ଅର୍ଥକୁ ସାକାର କରି ସୁନାବେଡା ସ୍ଥିତ ଡିପି କ୍ୟାମ୍ପରେ ରହୁଛନ୍ତି ଦୁଇଜଣ ଦିବ୍ୟାଙ୍ଗ ଭାଇ ନିତେଇ ଓ ଗୌର ରାଏ । ଜୀବନର ଝଡ ଝଞ୍ଜାକୁ ସାମନା କରି ସ୍ୱାଭିମାନର ଜୀବନ ଅତିବାହିତ କରିବା ଦିଗରେ ଏକ ଜ୍ୱଳନ୍ତ ଉଦାହରଣ ପାଲଟିଛନ୍ତି । ଆଜି 52 ବର୍ଷ ବୟସରେ ଏହି ଦୁଇ ଯାଆଁଳା ଭାଇ ଝାଲ ମୁଢି ବିକ୍ରି କରି ନିଜ ପୁଅ ଝିଅଙ୍କୁ ଉଚ୍ଚ ଶିକ୍ଷିତ କରାଇବାରେ ସକ୍ଷମ ହୋଇ ଏକ ସ୍ବାଧୀନଚେତା ମଣିଷ ହୋଇପାରିଛନ୍ତି । ସାମାଜିକ ପରିଚାଳନା ଗତ ବ୍ୟବସ୍ଥା ମଧ୍ୟରେ ଅବହେଳାର ଶିକାର ହୋଇ ମଧ୍ୟ ସାହସ ଓ ଉତ୍ସାହକୁ ଆଧାର କରି ଆଗକୁ ବଢି ଜୀବନ ରଥ ଟାଣି ଚାଲିଛନ୍ତି ।
35 ବର୍ଷର ଯାତ୍ରା: ପିଲାଟି ବେଳୁ ବାପାମା ଛେଉଣ୍ଡ ହୋଇଥିବା ଏହି ଦୁଇ ଭାଇ । ଯେତେବେଳେ ସେମାନଙ୍କ ବୟସ ଆଠ ବର୍ଷ ହୋଇଥିଲା ଉଭୟେ ହଠାତ ଚାଲବୁଲ କରିବାରେ ଅକ୍ଷମ ହୋଇଗଲେ । ନିତେଇ ବାଡିଟିଏ ଧରି ଠିଆ ହେବାରେ ସକ୍ଷମ ହୋଇଥିବା ବେଳେ ଗୌର କିନ୍ତୁ ବିଲକୁଲ ଚାଲିବା ପାଇଁ ଅସମର୍ଥ ହୋଇଯାଇଥିଲେ । ଜୀବନର ରାସ୍ତା ଅନ୍ଧକାରରେ ଭରିଗଲା ବେଳେ ବଡଭାଇ ସୁକୁମଲ ନିଜେ ମିସ୍ତ୍ରୀ କାମ କରି ଦୁଇ ଭାଇଙ୍କ ଭରଣ ପୋଷଣର ଦାୟିତ୍ୱ ନେଇଥିଲେ । କିନ୍ତୁ ଉଭୟଙ୍କୁ ଯେତେବେଳେ 17 ବର୍ଷ ବୟସ ହୋଇଥିଲା ସେହି ସମୟରେ ସେମାନେ ଆଉ ବଡଭାଇ ଉପରେ ବୋଝ ହୋଇ ରହିବା ପାଇଁ ପସନ୍ଦ କଲେ ନାହିଁ । ଉଭୟେ ନିଜ ସାଧ୍ୟମତେ ସୁନାବେଡା ସହରରେ ପୃଥକ ପୃଥକ ଭାବେ ଝାଲ ମୁଢି ବିକ୍ରି କରି ନିଜ ପେଟକୁ ଦାନା ଯୋଗାଇବାରେ ସକ୍ଷମ ହୋଇଥିଲେ । ଦୀର୍ଘ 35 ବର୍ଷର ଏହି ଜୀବନ ଯାତ୍ରାରେ ଉଭୟେ ସଂସାର ଗଢି ଏକ ସଫଳ ସ୍ୱାମୀ ଓ ବାପା ହେବାର ସାମର୍ଥ୍ୟ ଅର୍ଜନ କରିଛନ୍ତି ।
ଅଧିକ ପଢନ୍ତୁ: ଚିକିତ୍ସାରେ ଅର୍ଥ ସାଜିଛି ବାଧକ, ଦିବ୍ୟାଙ୍ଗ ଝିଅର ଚିକିତ୍ସା କରାଇ ସର୍ବସ୍ୱାନ୍ତ ପିତାମାତା
ଦିବ୍ୟାଙ୍ଗ ବ୍ୟବସାୟୀ ଗୌର କୁମାର ରାଏ କହିଛନ୍ତି, ‘‘ବର୍ଷକ ପୂର୍ବେ ଜିଲ୍ଲା ସାମାଜିକ ସୁରକ୍ଷା ବିଭାଗ ତରଫରୁ ଏକ ବ୍ୟାଟେରୀ ଚାଳିତ ହ୍ବିଲ ଚେୟାର ଦିଆଯାଇଥିଲା । କିନ୍ତୁ ଅନେକ ସରକାରୀ ଯୋଜନା ଭଳି ଏହି ହ୍ବିଲ ଚେୟାରଟି ମଧ୍ୟ ମାସକ ମଧ୍ୟରେ ଅକାମି ହୋଇପଡିଥିଲା । ତାର ମରାମତି କରିବା ପାଇଁ ସରକାରଙ୍କ ନିକଟରେ ବାରମ୍ବାର ଗୁହାରି କରିଥିଲେ । କିନ୍ତୁ ବର୍ଷେ କାଳ ବିତିଯାଇଥିଲେ ହେଁ ଏ ପର୍ଯ୍ୟନ୍ତ ତାହାର ମରାମତି ହୋଇ ପାରୁନାହିଁ । ନିଜ କର୍ମକୁ ଆଦରି ନିଜ ଜୀବନ ରଥ ଟାଣି ଚାଲିଛୁ ।’’
ଇଟିଭି ଭାରତ, କୋରାପୁଟ
