କୋରାପୁଟ: ଜିଲ୍ଲାରେ ଭରିରହିଛି ଭଳିକି ଭଳି ବାଉଁଶ । ପ୍ରତ୍ୟେକ ପ୍ରକାର ବାଉଁଶ ନିଜ ଭିତରେ ଏକ ସ୍ବତନ୍ତ୍ର ପରିଚୟ ଓ ସମ୍ଭାବନା ବହନ କରେ । ଏଥିରୁ ତିଆରି ହୁଏ ସୁନ୍ଦର ସୁନ୍ଦର ଜିନିଷ । କିନ୍ତୁ ଉଚିତ ବଜାରର ଅଭାବରୁ ବାଉଁଶ କାରିଗରମାନେ ସବୁବେଳେ ଦୁର୍ଦ୍ଦିନରେ ରହି ଆସୁଥିଲେ । ବର୍ତ୍ତମାନ କିନ୍ତୁ ସମୟ ବଦଳୁଛି । ଅଣ୍ଟା ସଳଖି ଛିଡା ହେଉଛନ୍ତି କୋରାପୁଟର ଶହଶହ ବାଉଁଶ କାରିଗର । କାରଣ ସେମାନେ ଶିଖିଗଲେଣି ବାଉଁଶରେ ସୁନ୍ଦର ଓ ସୌଖିନୀ ସାମଗ୍ରୀ ତିଆରି ।
ଯାହାର ବର୍ତ୍ତମାନ ବଜାରରେ ଚାହିଦା ବଢୁଛି । ଅଭାବ ଅନାଟନ ପାଇଁ କୌଳିକ ବୃତ୍ତିରୁ ମୁହଁ ଫେରାଇ ନେଇଥିବା ବାଉଁଶ କାରିଗରଙ୍କ ମୁହଁରେ ଫୁଟିଛି ହସ ।
ଆଜି ପର୍ଯ୍ୟନ୍ତ ଏହି ପାହାଡ଼ ଜଙ୍ଗଲରେ ବସବାସ କରୁଥିବା ଆଦିବାସୀ ସେଥିରୁ ପାରମ୍ପରିକ ଢଙ୍ଗରେ କୁଲା, ଝୁଡ଼ି, ସପ, ବିଞ୍ଚଣା ପ୍ରଭୃତି ନିତ୍ୟ ବ୍ୟବହାର୍ଯ୍ୟ ଜିନିଷ ତିଆରି କରି ଆସୁଥିଲେ । ଏବେ କିନ୍ତୁ ଧିରେ ଧିରେ ଯୁଗ ବଦଳୁଛି ଆଉ ସେହି ବାଉଁଶରୁ ଆଧୁନିକ ଜିନିଷ ତିଆରି କରିବା ପାଇଁ ବାଉଁଶ ପ୍ରକ୍ରିୟାକରଣ ୟୁନିଟ ସ୍ଥାପନ କରିଛନ୍ତି ସରକାର । ଆଦିବାସୀଙ୍କୁ ତାଲିମ ଦେବା ପାଇଁ ତାଲିମଦାତାଙ୍କୁ ମଧ୍ୟ ନିୟୋଜିତ କରାଯାଇଛି । କୋରାପୁଟ ଜିଲ୍ଲା ଜୟପୁର ବନଖଣ୍ଡକୁ ଏହାର ସମସ୍ତ ଶ୍ରେୟ ମିଳିଛି । ବୈପାରିଗୁଡା ବ୍ଲକର ମାଠପଡା ଗାଁରେ ବନସୁରକ୍ଷା ସମିତି ( ଭିଏସଏସ) ର ସଦସ୍ୟଙ୍କୁ ନେଇ ଏହି ବାଉଁଶ ପ୍ରକ୍ରିୟାକରଣ ୟୁନିଟ ସ୍ଥାପନ କରାଯାଇଛି । ଯାହା ଫଳରେ ଗରିବ ଆଦିବାସୀ ବାଉଁଶ କାରିଗରଙ୍କ ବେଉସା ଜୀବନ୍ୟାସ ପାଇଛି ।
ଜୟପୁର ବନଖଣ୍ଡର ଡ଼ିଏଫଓ ଆଶିଷ କରଙ୍କ କହିବା ଅନୁଯାୟୀ ବାଉଁଶ ପ୍ରକ୍ରିୟାକରଣ ପ୍ରକଳ୍ପ ସ୍ଥାପନ ସମଗ୍ର ଓଡ଼ିଶାରେ ପ୍ରଥମ । ଏଠାରେ ବାଉଁଶକୁ ଉପଯୋଗିତା ଆଧାରରେ ଚିହ୍ନିବା ଠାରୁ ଆରମ୍ଭ କରି ଭିନ୍ନ ଭିନ୍ନ ରୂପ ଦେବାର ଜ୍ଞାନକୌଶଳ ଶିକ୍ଷା ପାଇଁ ଆସାମରୁ ଦକ୍ଷ, କୁଶଳୀ କାରିଗରଙ୍କୁ ଆଣାଯାଇଛି । କୁଶଳୀ କାରିଗରଙ୍କ ତତ୍ତ୍ବାବଧାନରେ ବାଉଁଶରେ ସୁନ୍ଦର ଓ ସୌଖିନୀ ସାମଗ୍ରୀ ତିଆରି କରୁଛନ୍ତି ଏଠାକାର ପରଜା ଓ ଦୁରୁଆ ଆଦିବାସୀ ସମ୍ପ୍ରଦାୟର ବଉଁଶ କାରିଗର ।
ତାଲିମ ପ୍ରଦାନକାରୀଙ୍କ ଉପସ୍ଥିତିରେ ଆଦିବାସୀ ମହିଳା ଓ ପୁରୁଷ ନିଜ ହାତର କଳାକୁ ବାଉଁଶରେ ପ୍ରଦର୍ଶିତ କରାଇବା ସହ ଏଠାରେ ସ୍ଥାପନା କରାଯାଇଥିବା ଅତ୍ୟାଧୁନିକ ବାଉଁଶ ପ୍ରକ୍ରିୟାକରଣ ମେସିନକୁ ଚଳାଇବା ଓ ତାର ସଦୁପଯୋଗ କରିବା ନେଇ ଶିକ୍ଷା ଗ୍ରହଣ କରୁଛନ୍ତି । ଆସାମରେ ମିଳୁଥିବା ବାଉଁଶ ଠାରୁ ଏଠାକାର ବାଉଁଶ ଭିନ୍ନ ହେଲେ ମଧ୍ୟ ଏଠାକାର ବାଉଁଶରୁ ଚୌକି, ସୋଫାସେଟ୍, ଖଟ ପ୍ରଭୃତି ଆସବାବପତ୍ର ସୁନ୍ଦର ଭାବେ ତିଆରି କରାଯାଇପାରିବ ବୋଲି ଆସମରୁ ଆସିଥିବା ତାଲିମଦାତା ଆଜାଦ ଜଣାଇଛନ୍ତି ।
କୁଲା, ଝୁଡ଼ି ପ୍ରଭୃତି ତିଆରୀ କରି ହାଟବଜାରରେ ବିକୁଥିବା କାରିଗର ହରି ହନ୍ତାଳ ଏହି ପ୍ରକଳ୍ପ ଅଧୀନରେ ତାଲିମ ପାଇବା ଦ୍ବାରା ତାଙ୍କ ଭଳି ଛୋଟ କାରିଗର ଲାଭବାନ ହେବେ ବୋଲି ଆଶାପୋଷଣ କରିଛନ୍ତି । ମାଠପଡା ଭିଏସଏସର ସଭାପତି ଚନ୍ଦ୍ରଶେଖର ରଥ ଏହି ପ୍ରକଳ୍ପ ମାଧ୍ୟମରେ ଅଞ୍ଚଳର ବେକାରୀ ସମସ୍ୟା ଅନେକାଂଶରେ ଦୂର ହୋଇପାରିବ ବୋଲି ମତ ରଖିଛନ୍ତି । କୋରାପୁଟ ଓରମାସ ସହାୟତାରେ ଏହି ବାଉଁଶ ନିର୍ମିତ ସାମଗ୍ରୀର ବଜାରରେ ଚାହିଦା ବୃଦ୍ଧି କରୁଛି । ଏହି ବାଉଁଶ ଶିଳ୍ପ ଦ୍ବାରା ଏ ଅଞ୍ଚଳରେ ସମାଧାନ ହୋଇଛି ଦାଦନ ସମସ୍ୟା, ପୁରୁଛି ଆଦିବାସୀ କାରିଗରଙ୍କ ପେଟ ।
ତେବେ ସରକାରଙ୍କ ସହାୟତାରେ ଯଦି ଏହାର କମର୍ସିଆଲ ମାର୍କେଟିଂ କରାଯାଇପାରନ୍ତା ତେବେ କାରିଗର ବେଶ ଲାଭବାନ ହୁଅନ୍ତେ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
