କୋରାପୁଟ: କୋଟିଆ ପଞ୍ଚାୟତର 21ଟି ଗାଁରେ ଥିବା ସମସ୍ୟା ଗୁଡିକୁ ସମାଧାନ କରିବା ପାଇଁ ଏକ ସାମୂହିକ ସ୍ବର ଆବଶ୍ୟକ ବୋଲି କହିଛନ୍ତି ସଞ୍ଜୟ ଦାସବର୍ମା । କୋରାପୁଟ ଜିଲ୍ଲାର କୋଟିଆ ପଞ୍ଚାୟତର 21ଟି ଗାଁରେ ଥିବା ସମସ୍ୟା ଗୁଡିକୁ ସମାଧାନ କରିବା ପାଇଁ ଓଡ଼ିଶା ରାଜ୍ୟ ଯୋଜନା ବୋର୍ଡର ଡେପୁଟି ଚେୟାରମ୍ୟାନ୍ ସଞ୍ଜୟ ଦାସବର୍ମା ଏକ ସାମୂହିକ ସ୍ବର ଆବଶ୍ୟକ ବୋଲି କହିଛନ୍ତି ।
ଓଡିଶା ଓ ଆନ୍ଧ୍ରପ୍ରଦେଶ ସରକାରଙ୍କ ମଧ୍ୟରେ କୋଟିଆକୁ ନେଇ ଚାଲିଥିବା ବିବାଦର ଶୁଣାଣି କରି 2006ରେ ସୁପ୍ରିମକୋର୍ଟର ପାଞ୍ଚଜଣ ସଦସ୍ୟଙ୍କ ସ୍ବତନ୍ତ୍ର ବେଞ୍ଚ ଦ୍ବାରା କୋଟିଆରେ ସ୍ଥିତାବସ୍ଥା ରଖିବା ପାଇଁ ଆଦେଶ ଦିଆଯାଇଥିଲା । ମାତ୍ର ଆନ୍ଧ୍ରପ୍ରଦେଶ ସରକାର ଏଠାକାର ଲୋକଙ୍କୁ ନିଜ ଆଡକୁ ଆକର୍ଷିତ କରିବା ପାଇଁ ବିବିଧ ଲୋଭନୀୟ କାର୍ଯ୍ୟକ୍ରମରେ ସେମାନଙ୍କୁ ସାମିଲ କରିଆସିଥିବା ସେ ଅଭିଯୋଗ କରିଛନ୍ତି ।
ଗୁରୁବାର ଆନ୍ଧ୍ରପ୍ରଦେଶ ବିରୋଧରେ ଓଡିଶା ସରକାରଙ୍କ ତରଫରୁ ସୁପ୍ରିମକୋର୍ଟରେ ଅଦାଲତ ଅବମାନନାର ଏକ ପିଟିସନ ଦାଖଲ କରାଯାଇଥିବା ବେଳେ ସମସ୍ତ ରାଜନୈତିକ ଦଳ ଏକ ସ୍ବରରେ ଆନ୍ଧ୍ରପ୍ରଦେଶର ଏପରି ଅନଧିକାର ପ୍ରବେଶ ଓ ପଞ୍ଚାୟତ ନିର୍ବାଚନ କରିବାକୁ ବିରୋଧ କରିବାକୁ ପଡିବ ବୋଲି ସେ ମତ ରଖିଛନ୍ତି ।
ଓଡିଶା ହେଉଛି ଏକ ନିର୍ଦ୍ଦିଷ୍ଟ ଭାଷା ଆଧାରରେ ସୃଷ୍ଟି ହୋଇଥିବା ଏକ ରାଜ୍ୟ ଏବଂ ସମସ୍ତ ସୀମାନ୍ତବର୍ତ୍ତୀ ଅଞ୍ଚଳ ପଡୋଶୀ ରାଜ୍ୟଗୁଡିକର ଅନୁପ୍ରବେଶର ସମ୍ମୁଖୀନ ହେଉଛନ୍ତି । ଦାସବର୍ମା ଗୁରୁବାର କୋରାପୁଟରେ ଗଣମାଧ୍ୟମକୁ ସମ୍ବୋଧିତ କରି ଏହି ଆଶଙ୍କା ବ୍ୟକ୍ତ କରିଛନ୍ତି । ବୁଧବାର କୋଟିଆ ପଞ୍ଚାୟତର ଫାଟୁସିନେରୀ ଗ୍ରାମ ଗସ୍ତ ପରେ ବିଜେପିର ରାଜ୍ୟ ସଭାପତି ମଧ୍ୟ କୋଟିଆରେ ସମସ୍ୟାର ସମାଧାନ ପାଇଁ ଏକ ସର୍ବଦଳୀୟ ସଭା ଡାକିବାକୁ ରାଜ୍ୟ ସରକାରଙ୍କ ପାଖରେ ଦାବି କରିଥିଲେ।
କୋରାପୁଟରୁ ସି.ଏଚ୍ ଶାନ୍ତାକାର, ଇଟିଭି ଭାରତ
