କୋରାପୁଟ: କୋଟିଆରେ ପୁନଃ ପ୍ରତିଷ୍ଠା ହେବ ଥାନା । ଏନେଇ ବାଚସ୍ପତି ସୂଚନା ଦେବାପରେ କୋରାପୁଟରେ ଆରମ୍ଭ ହୋଇଛି ଚର୍ଚ୍ଚା ।
କୋରାପୁଟ ଜିଲ୍ଲାର ସୀମାନ୍ତରେ ଥିବା 21ଟି ଗ୍ରାମକୁ ନେଇ ଗଠିତ କୋଟିଆ ପଞ୍ଚାୟତର ବିକାଶକୁ ନେଇ ଭୁବନେଶ୍ବରରେ ରାଜ୍ୟ ସରକାର ଆଲୋଚନା କରିବା ଓ ସେଠାରେ ପୁଣି ଥରେ ଥାନା ତିଆରି କରିବା ସଂକ୍ରାନ୍ତରେ ବାଚସ୍ପତି ସୂଚନା ଦେବା ପରେ ଜିଲ୍ଲାରେ ଚର୍ଚ୍ଚା ଆରମ୍ଭ ହୋଇଛି।
ଅନେକ ବର୍ଷ ପୂର୍ବେ ମାଓବାଦୀଙ୍କ ପ୍ରାର୍ଦୁଭାବ ଯୋଗୁଁ ଏଠାରୁ ଉଭୟ ଓଡିଶା ଓ ଆନ୍ଧ୍ରପ୍ରଦେଶର ପୋଲିସ ଫାଣ୍ଡି ସ୍ଥାନାନ୍ତରିତ ହୋଇଯାଇଥିବାବେଳେ ଏଠାକାର ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ମଧ୍ୟ ବନ୍ଦ ପଡିଛି । ତେବେ ଥାନା ପାଇଁ ସବୁଜ ସଙ୍କେତ ମିଳିବା ପରେ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଚାଲୁ ପାଇଁ ଦାବି ହୋଇଛି ।
ସମଗ୍ର କୋଟିଆ ଅଞ୍ଚଳରେ ଅଙ୍ଗନବାଡି ସେବା ଓ ବାର୍ଦ୍ଧକ୍ୟ ଭତ୍ତା ପ୍ରଦାନ ଏବଂ ସାଧାରଣ ବଣ୍ଟନ ବ୍ୟବସ୍ଥାର ମାନ ତଥା ଶିକ୍ଷା ଯୋଗାଇଦେବାର ଆନ୍ତରିକତାକୁ ନେଇ ଗତ 50 ବର୍ଷରୁ ଊର୍ଦ୍ଧ୍ବ ସମୟ ଧରି ଓଡିଶା ଓ ଆନ୍ଧ୍ରପ୍ରଦେଶ ମଧ୍ୟରେ ଟଣା ଓଟରା ଲାଗି ରହିଛି । ଏହାସହ ରାସ୍ତାଘାଟ, ବିଜୁଳି, ଜଳ ଓ ଟେଲିଫୋନ ଯୋଗାଯୋଗ ଯୋଗାଇଦେବା କ୍ଷେତ୍ରରେ ଆନ୍ଧ୍ର ସରକାରଙ୍କ ପାଖରେ ଓଡିଶା ସରକାରଙ୍କ ଉଦ୍ୟମ ହାର ମାନିଥିବା ଅଭିଯୋଗ ହେଉଥିବାବେଳେ ରାଜ୍ୟ ସରକାରଙ୍କ ଦ୍ବାରା ନିଆଯାଇଥିବା ଏହି ନିଷ୍ପତ୍ତିକୁ ସ୍ବାଗତ କରାଯାଇଛି ।
ତେବେ ଜମି ପଟ୍ଟା ବିହୀନ ଏକ ସାମାଜିକ ବ୍ୟବସ୍ଥାରେ ଜାତିଗତ ପ୍ରମାଣ ପତ୍ର ନଥିବା ଓ ଆଦିବାସୀ ମାନ୍ୟତା ନ ମିଳିଥିବା ଜୀବନକୁ ନେଇ ବିଭିନ୍ନ ସମସ୍ୟାରେ ପେଷି ହେଉଥିବା କୋଟିଆବାସୀଙ୍କ ପାଇଁ ଥାନାର ପୁନରୁଦ୍ଧାର କେତେଦୂର ବିକାଶକୁ ତ୍ବରାନ୍ବିତ କରିବ ତାକୁ ନେଇ ସନ୍ଦେହ ପ୍ରକାଶ ପାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
