କୋରାପୁଟ: ଜିଲ୍ଲାର ଲକ୍ଷ୍ମୀପୁରସ୍ଥିତ SBI ବ୍ୟାଙ୍କରେ ସୁନା ଚୋରି ହୋଇଥିବା ଘଟଣା । ଏହାର ପର୍ଦ୍ଦାଫାଶ କରିଛି ସିସିଟିଭି ଫୁଟେଜ । ଅନିୟମିତତା କାରଣରୁ ବ୍ୟାଙ୍କରୁ କଢା ଯାଇଥିବା କର୍ମଚାରୀ ଜଣକ ବ୍ୟାଙ୍କରୁ ଲୁଟ କରିଥିବା ଜଣାପଡ଼ିଛି । ତେବେ ସିସିଟିଭି ଫୁଟେଜର ଚୋରି ସମୟର ଦୃଶ୍ୟ ଦେଖିବାକୁ ମିଳିଥିବା ବେଳେ ଏ ସମ୍ପର୍କରେ କୋରାପୁଟ SP ବରୁଣ ଗୁଣ୍ଟାପଲି ସୂଚନା ଦେଇଛନ୍ତି ।
ଗତ ବର୍ଷ ନଭେମ୍ବର ମାସ 30 ତାରିଖରେ ବ୍ୟାଙ୍କର ଜଣେ ପୂର୍ବତନ କର୍ମଚାରୀ ଯାହାକୁ କି ଅନିୟମିତତା କାରଣରୁ ବାହାର କରାଯାଇଥିଲା । ସେ ବ୍ୟାଙ୍କ ଭିତରେ କିଛି କାମ ଦର୍ଶାଇ ଦିନବେଳା ବ୍ୟାଙ୍କକୁ ଯାଇଥିଲେ । ସେହିଦିନ ହିଁ ସେ ବ୍ୟାଙ୍କରୁ ନ ବାହାରି ବ୍ୟାଙ୍କ ଭିତରେ ଏକ କୋଠରୀରେ ଲୁଚି ରହିଯାଇଥିଲେ। ସଂଧ୍ୟା ସମୟରେ କର୍ମଚାରୀମାନେ ବାହାର ପଟୁ ତାଲା ପକାଇ ଚାଲିଯିବା ପରେ ରାତ୍ରରେ କୋଠରୀରୁ ବାହାରି କର୍ମଚାରୀ ଜଣକ ଘଟାଇଥିଲେ ଏହି କାଣ୍ଡ ।
ବ୍ୟାଙ୍କ ମ୍ୟାନେଜରଙ୍କ ରୁମରେ ଥିବା ଷ୍ଟ୍ରଙ୍ଗରୁମ୍ ଓ ଲକରର ଚାବି ବାହାର କରି ଦେଢ କେଜିରୁ ଊର୍ଦ୍ଧ୍ବ ସୁନା ବାହାର କରି ପୁଣି ପୂର୍ବ ଭଳି ଲକର ସମେତ ଷ୍ଟ୍ରଙ୍ଗ ରୁମରେ ତାଲା ପକାଇଥିଲେ । ଏହାପରେ ପୁଣି ଲୁଚି ରହିଯାଇଥିଲେ । ସକାଳ ହେବା ପରେ ବ୍ୟାଙ୍କ ଖୋଲା ଯିବା ପରେ ଚୋରି ହୋଇଥିବା ସମ୍ବନ୍ଧରେ ସାମାନ୍ୟ ଟିକେ ସୁରାକ୍ ମଧ୍ୟ କେହି ପାଇନଥିଲେ । ଏହାର ସୁଯୋଗ ନେଇ ଘଣ୍ଟାଏ ପରେ ଅତି ଆରାମରେ ଚୋର ବ୍ୟାଙ୍କରୁ ପଳାଇଯାଇଥିବା ସିସିଟିଭି ଫୁଟେଜରୁ ଜଣାପଡିଛି ।
ଚୋରି ସମୟର ଦୃଶ୍ୟ ସିସିଟିଭି ଫୁଟେଜରେ କଏଦ ହୋଇ ରହିଛି । ଏହାକୁ ଯାଞ୍ଚ କରିବା ପରେ ଚୋରି କାଣ୍ଡ ସମ୍ପର୍କରେ ଜଣାପଡ଼ିଥିଲା । ଏହାପରେ ଚୋରକୁ ଗିରଫ କରିବା ସହ ପୋଲିସ ଉକ୍ତ କର୍ମଚାରୀଙ୍କ ଘରେ ରେଡ଼ କରି ଚୋରି ହୋଇଥିବା ସମସ୍ତ ସୁନା ଓ ଲକ୍ଷାଧିକ ନଗଦ ଟଙ୍କା ଜବତ କରିଛି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
