କୋରାପୁଟ: ସାହା ହେଲା ସହଯୋଗ । ସ୍ବାଭାବିକ ହେଉଛି ଟଙ୍କ ଜାନି ଜୀବନ । ଦୌଡିବ, ଚାଲିବ ଖେଳିବ ଆଉ ଅନ୍ୟ ପରି ଜୀବନକୁ ଜୀଇଁବ ଟଙ୍କ ଜାନି । କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଅନ୍ତର୍ଗତ ବଡଗୁଡା ଗ୍ରାମର ଟିକି ପିଲା ଟଙ୍କ ଜାନି ଏବେ ନିଜ ଗୋଡ଼ରେ ନିଜେ ଠିଆ ହେବା ପାଇଁ ଚେଷ୍ଟା କରୁଛି । ଯାହାକୁ ଦେଖି ବାପାମାଆଙ୍କ ଆନନ୍ଦ କହିଲେ ନସରେ ।
ଜନ୍ମରୁ ଟଙ୍କ ଜାନି ଚାଲିବାକୁ ସକ୍ଷମ ନଥିଲା । ଏବେ ସେ ଚାଲିବାକୁ ଚେଷ୍ଟା କରୁଛି । ପୁଅ ଯେ ଦିନେ ଗାଁ ଦାଣ୍ଡରେ ଚାଲିବ ସେ ବିଶ୍ବାସ ଜନ୍ମ ହେବାରେ ଲାଗିଛି ବାପା ମାଆଙ୍କ ହୃଦୟରେ । ଏକତା ସଂଗଠନର ସ୍ବେଚ୍ଛାସେବୀଙ୍କ ସହାୟତାରେ ଟଙ୍କ ଧୀରେ ଧୀରେ ଚାଲିବାକୁ ଲାଗିଛି । ତାକୁ ଏକତା ସଂଗଠନ ଦ୍ଵାରା ପରିଚାଳିତ ଭିନ୍ନକ୍ଷମ ପୁନର୍ବାସ କେନ୍ଦ୍ରରେ ଆବଶ୍ୟକୀୟ ବ୍ୟାୟାମ କରାଇବା ସହ ପୁଷ୍ଟିକର ଖାଦ୍ୟ ଦେବା ଫଳରେ ଟଙ୍କର ସ୍ବାସ୍ଥ୍ୟ ଧୀରେ ଧୀରେ ଉନ୍ନତ ହେବାରେ ଲାଗିଛି । ଯାହାକୁ ନେଇ ବାପାମାଆଙ୍କ ଖୁସି କହିଲେ ନସରେ । ଏକତା ସଙ୍ଗଠନରେ ସ୍ପେଶାଲ ଏଡୁକେଟର ଭାବେ କାର୍ଯ୍ୟରତ ଅଲିଭା ସାମଲଙ୍କ ଉଦ୍ୟମରେ ଏହା ସମ୍ଭବପର ହୋଇଛି ।
ଏହା ବି ପଢନ୍ତୁ...ବାପ ପୁଅ ଡ୍ରଗ୍ସ ସିଣ୍ଡିକେଟର ଖୁଲାସା, ଢେଙ୍କାନାଳରୁ ହେରୋଇନ ଜବତ
ଟଙ୍କର ବାପା ମାଆ ଦିନ ମଜୁରିଆ । ପୁଅର ଚିକିତ୍ସା ପାଇଁ ତାଙ୍କର ସାମର୍ଥ୍ୟ ନାହିଁ । ହେଲେ ଏକତା ସଂଗଠନ ତାଙ୍କୁ ସାହା ହେଲା । ପୁନର୍ବାସ କେନ୍ଦ୍ରରେ ଅଧିକ ଦିନ ରହିବା ଟଙ୍କ ପାଇଁ ସମ୍ଭବ ହୋଇପାରିନଥିଲା । ତଥାପି ନିଜ ଘରକୁ ଫେରିବା ପରେ ମଧ୍ୟ ଏକତା ସଂଗଠନର ସ୍ବେଚ୍ଛାସେବୀ ତାଙ୍କ ଘରେ ପହଞ୍ଚି ବ୍ୟାୟାମ କରାଇବା ସହ ବାପା ମାଆଙ୍କୁ ଏ ସମ୍ପର୍କରେ ଶିଖାଇଥିଲେ । ଫଳରେ ଟଙ୍କକୁ ଘରେ ମଧ୍ୟ ସ୍ବତନ୍ତ୍ର ବ୍ୟାୟାମ କରାଇବାରେ ବାପା ମାଆ ସକ୍ଷମ ହୋଇଥିଲେ । ଏକତା ସଂଗଠନ ତରଫରୁ ଟଙ୍କ ପାଇଁ ଖାଦ୍ୟ ଯୋଗାଇ ଦିଆଯିବ ବୋଲି ଅଲିଭା ସାମଲ ଜଣାଇଛନ୍ତି ।
ଇଚିଭି ଭାରତ, କୋରାପୁଟ
