କୋରାପୁଟ: ଜୟପୁର ସହରରେ ୧୪୪ ଧାରା ଲାଗୁ । ଜୟପୁର ସହରରେ ୭ ଦିନ ପାଇଁ ଲାଗୁ ହେଲା ୧୪୪ ଧାରା । ସହରର ସବ୍ଡିଭିଜନ ଅଞ୍ଚଳରେ ୧୪୪ ଧାରା ଲାଗୁ କରାଯାଇଛି । ଏସଡିପିଓଙ୍କ ଦ୍ୱାରା ଦିଆଯାଇଥିବା ସୂଚନାକୁ ଆଧାର କରି ଏହି କଟକଣା ଏପ୍ରେଲ ୧୩ରୁ ୨୦ ତାରିଖ ଯାଏଁ ଲାଗୁ ରହିବ । ଏହି ୭ ଦିନ ଅପରାହ୍ନ ୩ଟାରୁ ପରିବର୍ତ୍ତୀ ଦିନ ସକାଳ ୯ଟା ଯାଏଁ କଟକଣା ବଳବତ୍ତର ରହିବ । ପରେ ସକାଳ ୯ଟାରୁ ଅପରାହ୍ନ ୩ଟା ଯାଏଁ କଟକଣା କୋହଳ କରାଯିବ । ଆଗକୁ ହନୁମାନ ଜୟନ୍ତୀକୁ ଦୃଷ୍ଟିରେ ରଖି ୧୪୪ ଧାରା ଲାଗୁ କଲା ପ୍ରଶାସନ ।
ଏହି ବିଜ୍ଞପ୍ତି ଅନୁଯାୟୀ ଜୟପୁର ସହର ତଥା ଆଖପାଖ ଗ୍ରାମ ଗୁଡିକରେ ଦୁଇଜଣଙ୍କଠାରୁ ଅଧିକ ବ୍ୟକ୍ତି ସର୍ବସାଧାରଣ ସ୍ଥାନରେ ଏକାଠି ହେବା ଉପରେ ନିଷେଧାଦେଶ ଜାରି କରାଯାଇଛି । ଦୁଇଜଣଠାରୁ ଅଧିକ ବ୍ୟକ୍ତି ଏକାଠି ହେବା କିମ୍ବା କୌଣସି ପ୍ରକାରେ ଅପ୍ରୀତିକର ପରିସ୍ଥିତି ସୃଷ୍ଟି କରିବା ଅପରାଧ ଭାବେ ବିବେଚିତ ହେବ । ଆଇନ ଅମାନ୍ୟ କରୁଥିବା ବ୍ୟକ୍ତିଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନେଇ ଏହି ନିର୍ଦ୍ଦେଶନାମାରେ ଉଲ୍ଲେଖ କରାଯାଇଛି । ତେବେ ଜୟପୁରବାସୀ ଏହି ନିର୍ଦ୍ଦେଶକୁ ସହଜରେ ଗ୍ରହଣ କରିପାରି ନାହାଁନ୍ତି ।
ଆସନ୍ତା କାଲି ମହା ବିଷୁବ ସଂକ୍ରାନ୍ତି ଓ ଓଡ଼ିଆ ନବ ବର୍ଷ ଅବସରରେ ଜୟପୁର ସହରରେ ବ୍ୟାପକ ଆୟୋଜନ କରାଯାଇଥିବା ବେଳେ ଏପରି ଏକ ଆଦେଶ ଏହି ଉତ୍ସବ ପାଳନରେ ବାଧା ଉପୁଜିବା ନେଇ ମତ ପ୍ରକାଶ ପାଇଛି । ତେବେ ଏପରି ଏକ କଠିନ ନିଷ୍ପତ୍ତି ପଛରେ କଣ ଯେ ବାସ୍ତବତା ତଥ୍ୟ ଲୁଚି ରହିଛି ସେନେଇ ପ୍ରଶାସନ କିମ୍ବା ପୋଲିସ ତରଫରୁ ସ୍ପଷ୍ଟୀକରଣ କରାଯାଇନାହିଁ ।
ବିନା କାରଣରେ ୧୪୪ ଧାରା ଲଗାଇବା ଫଳରେ ଅଞ୍ଚଳରେ ଅଶାନ୍ତ କରିବାରେ ସହାୟ ହେବ ବୋଲି ଜୟପୁରର ବିଶିଷ୍ଟ ସଙ୍ଗୀତକାର ଧୀରେନ ମୋହନ ପଟ୍ଟନାୟକ ମତବ୍ୟକ୍ତ କରିଛନ୍ତି । ଗତକାଲି ସମ୍ବଲପୁରରେ ହନୁମାନ ଜୟନ୍ତୀ ଅବସରରେ ସମ୍ବଲପୁରରେ ଏକ ବଡ଼ ଅଘଟଣ ଦେଖିବାକୁ ମିଳିଥିଲା । ଜିଲ୍ଲାର ବିଭିନ୍ନ ସ୍ଥାନରେ ପୋଡ଼ାଜଳା କରାଯିବା ସହ ଭୟଙ୍କର ହିଂସାକାଣ୍ଡ ଘଟିଥିଲା । ହନୁମାନ ଜୟନ୍ତୀ ଉପଲକ୍ଷେ ସମ୍ବଲପୁରରେ ଏକ ବାଇକ ଶୋଭାଯାତ୍ରା କରାଯାଉଥିଲା । ତେବେ ଏହି ସମୟରେ ଶୋଭାଯାତ୍ରାରେ ଯୋଗ ଦେଇଥିବା ବ୍ୟକ୍ତି ବିଶେଷଙ୍କ ଉପରେ ପଥର ମାଡ଼ ହୋଇଥିଲା । ଏହାପରେ ଏଠାରେ ୧୪୪ ଧାରା ଲାଗିଛି ।
ଇଟିଭି ଭାରତ, କୋରାପୁଟ
