କୋରାପୁଟ: ବଢୁଛି ସହରର ସୀମାରେଖା । ବୃଦ୍ଧି ପାଉଛି ଜନସଂଖ୍ୟା । ହେଲେ ଆଜି ବି ସହରର ଅବସ୍ଥା ଠିକ ପୂର୍ବଭଳି । ଚିକିତ୍ସା ପାଇଁ ଆଖପାଖ ସହର ଉପରେ କରିବାକୁ ପଡୁଛି ନିର୍ଭରଶୀଳ । କୋରାପୁଟ ଜିଲ୍ଲାର ବ୍ୟବସାୟିକ ପ୍ରାଣକେନ୍ଦ୍ର କୁହାଯାଉଥିବା ସେମିଳିଗୁଡାରେ ଦେଖାଦେଇଛି ସ୍ୱାସ୍ଥ୍ୟସେବାର ବିକଳ ଚେହେରା । 20 ହଜାର ଲୋକଙ୍କ ପାଇଁ କେବଳ ଜଣେ ଡାକ୍ତରଙ୍କୁ ନେଇ ଏଠି ଚାଲିଛି ଚିକିତ୍ସା ।
ନନ୍ଦପୁର ଓ ବିଶାଖାପାଟଣା ଆଡକୁ ଯାଉଥିବା ରାସ୍ତାରେ ଥିବା ଚିକିତ୍ସାଳୟ ଉପରେ ସେମିଳିଗୁଡାର ବ୍ଲକବାସୀ ଭରସା କରୁଛନ୍ତି । ହେଲେ 20 ହଜାର ଜନସଂଖ୍ୟା ବିଶିଷ୍ଟ ଅଞ୍ଚଳରେ କେବଳ ଏ ଗୋଟିଏ ଚିକିତ୍ସାଳୟ ଏବେ ଅଞ୍ଚଳବାସୀଙ୍କ ଚିନ୍ତାର କାରଣ ପାଲଟିଛି ।
ସେମିଳିଗୁଡା ଓ ସୁନାବେଡ଼ାରେ ମିଗ ଓ ସୁଖୋଇ ବିମାନ ତିଆରି କରୁଥିବା ଏଚଏଏଲ ଏବଂ ବକ୍ସାଇଟ ଉତ୍ତୋଳନ କରି ପ୍ରାଥମିକ ବିଶୋଧନ କରୁଥିବା ନାଲକୋ କମ୍ପାନୀ ଗଢି ଉଠିବଢିଚାଳିଛି ସହର । ହେଲେ ଆଜି ଯାଏ ଏହି ସହରକୁ ଉପଖଣ୍ଡ ମାନ୍ୟତା ପ୍ରଦାନ କରାଯାଇଛି ନା ଉପଖଣ୍ଡସ୍ତରୀୟ ଚିକିତ୍ସାଳୟ ଯୋଗାଇ ଦିଆଯାଇଛି । ଯାହାକୁ ନେଇ ଅଞ୍ଚଳବାସୀ ଚିନ୍ତା ପ୍ରକଟ କରିବା ସହ ସମସ୍ତ ରାଜନେତା ତଥା ନେତାଙ୍କୁ ଦାବି ଜଣାଇଛନ୍ତି ।
ବିଶ୍ୱ ସ୍ୱାସ୍ଥ୍ୟ ସଂଗଠନ ଓ ଡବ୍ଲ୍ୟୁଏଚଓ ଅନୁଯାୟୀ ହଜାରେ ଲୋକଙ୍କ ପାଇଁ ଜଣେ ଡାକ୍ତର ରହିବା ଆବଶ୍ୟକ । ୨୦୧୭ରେ କରାଯାଇଥିବା ଏକ ଆକଳନ ଅନୁଯାୟୀ ଭାରତବର୍ଷରେ ପ୍ରତି ୧୫୯୭ ଜଣଙ୍କ ପାଇଁ ଜଣେ ଡାକ୍ତର ରହିଥିବା ବେଳେ ଓଡ଼ିଶାରେ ୨୭୪୯ ଜଣଙ୍କ ପାଇଁ ଜଣେ ଡାକ୍ତର ରହିଛନ୍ତି । ଯାହା ଏକ ଚିନ୍ତାର ବିଷୟ ପାଲଟିଛି ।
ସେପଟେ, ଯଦି କୌଣସି ରାଜନୈତିକ ଦଳ ତଥା ନେତାଙ୍କ ଠାରୁ ଲିଖିତ ପ୍ରତିଶ୍ରୁତି ନ ମିଳେ, ତେବେ ଏଥର ଭୋଟ ବର୍ଜନ କରିବେ ବୋଲି ଚେତାବନୀ ଦେଇଛନ୍ତି ସେମିଳିଗୁଡାବାସୀ ।
କୋରାପୁଟରୁ ସିଏଚ.ଶାନ୍ତାକାର, ଇଟିଭି ଭାରତ
