କୋରାପୁଟ: ଗତ ବର୍ଷ ଠାରୁ ସର୍ବତ୍ର ସ୍କୁଲ କଲେଜ କୋରୋନାର ପ୍ରଭାବରେ ବନ୍ଦ ପଡିଛି । ସରକାରଙ୍କ କଡ଼ା ନିର୍ଦ୍ଦେଶକୁ ମାନି ସହରଠାରୁ ଗାଁ ପର୍ଯ୍ୟନ୍ତ ସରକାରୀ ଓ ବେସରକାରୀ ବିଦ୍ୟାଳୟକୁ ପିଲାଙ୍କୁ ଆସିବା ପାଇଁ ମନା କରାଯାଇଛି । କିନ୍ତୁ କୋରାପୁଟ ଜିଲ୍ଲା କାକୀରିଗୁମ୍ମାରେ ଚାଲିଛି ମୁକ୍ତାକାଶ ବିଦ୍ୟାଳୟ । କାରଣ ଗାଁରେ ନାହିଁ ଉନ୍ନତମାନର ମୋବାଇଲ ସିଗନାଲ । ସେପଟେ ସ୍ମାର୍ଟ ଫୋନର ଅଭାବରେ ଅନଲାଇନ କ୍ଳାସ କରି ନପାରି ଘରେ ବସିରହି ଅନାଗତ ଭବିଷ୍ୟତକୁ ଚାହିଁ ରହିଛନ୍ତି ଛାତ୍ରଛାତ୍ରୀ । ଖାସକରି ଏପରି ସ୍ଥିତିରେ ଛାତ୍ରୀମାନଙ୍କୁ ସମ୍ଭାବ୍ୟ ବାଲ୍ୟ ବିବାହ ଓ ଦାଦନ ଶ୍ରମିକ ହେବାରୁ ସୁରକ୍ଷା ପ୍ରଦାନ କରିବାକୁ ପ୍ରୟାସ ଜାରି ଖୁଡିପଦରରେ ୱାର୍ଡ ସଂସ୍ଥା ଦ୍ଵାରା ଚାଲୁଥିବା ଆଦର୍ଶ ବିଦ୍ୟାଳୟର ପରିଚାଳକ ମାନେ ।
ଏହି ବିଦ୍ୟାଳୟରେ ବିଶେଷ କରି ପାହାଡ ପର୍ବତ ଘେରା ଅଞ୍ଚଳରେ ରହୁଥିବା କନ୍ଧ ଜନଜାତିର ଝିଅ ମାନେ ପଢିବାକୁ ଆସନ୍ତି । କିନ୍ତୁ ମହାମାରୀ ଯୋଗୁଁ ସ୍କୁଲ ବନ୍ଦ ହେବାରୁ ତାଙ୍କୁ ସ୍ବଳ୍ପ ବୟସରୁ ବିବାହ କରାଇ ଦେବାର ସମ୍ଭାବନା ଅଧିକ ରହିଛି । ଏହି କଥାକୁ ହୃଦୟଙ୍ଗମ କରି ସେମାନଙ୍କ ପାଇଁ ପାଠପଢା କିପରି ପୁନଃ କରାଯାଇପାରିବ ସେ ନେଇ ସମସ୍ତ ଶିକ୍ଷକ ଶିକ୍ଷୟତ୍ରୀ ଓ ରାମକୃଷ୍ଣ ସୁରଦେବଙ୍କ ଭଳି ପରାମର୍ଶଦାତାଙ୍କ ସହ ଆଲୋଚନା କରାଯାଇଥିଲା । ଅନେକ ଆଲୋଚନା ପରେ ସମସ୍ତ ଶିକ୍ଷକ ଶିକ୍ଷୟତ୍ରୀ ନବମ ଶ୍ରେଣୀରେ ପଢୁଥିବା ଝିଅଙ୍କ ପାଖକୁ ଯାଇ ପାଠ ପଢାଇବା ପାଇଁ ନିଷ୍ପତ୍ତି ନିଆଯାଇଥିଲା ।
ଏହି କ୍ରମରେ ଦାମନଯୋଡିରେ ଥିବା ନାଲ୍କୋ ଖଣିର ପାଦଦେଶରେ ତଥା ନିକଟସ୍ଥ ପଞ୍ଚପଟ୍ଟମାଳୀ ପର୍ବତର ଏକ ନିବୃତ କୋଣ ଉପର ଗଡତି ଓ ମୁଣ୍ଡ ଗଡତି ତଥା ଦୂରରେ ଥିବା ଭିତରଗଡ ଠାରେ ଅସ୍ଥାୟୀ ବିଦ୍ୟାଳୟ ଖୋଲିଦିଆଗଲା । ଉପର ଗଡତି ଓ ମୁଣ୍ଡ ଗଡତି ଗ୍ରାମର ମଧ୍ୟ ଭାଗରେ ଏକ ପାହାଡିଆ ସମତଳ ଅଞ୍ଚଳରେ ବିଶାଳ ବୃକ୍ଷ ମୂଳରେ ରହିଛି ଏହି ମୁକ୍ତାକାଶ ବିଦ୍ୟାଳୟ । କୋଭିଡ଼ ନିୟମାବଳୀର ସମସ୍ତ ସର୍ତ୍ତକୁ ମାନି ଖୋଲାଯାଇଥିବା ଅସ୍ଥାୟୀ ବିଦ୍ୟାଳୟକୁ ଏହି ଦୁଇଟି ଗ୍ରାମରୁ 23 ଜଣ ଝିଅ ସବୁଦିନ ପଢିବାକୁ ଆସୁଥିବା ଏହି ବିଦ୍ୟାଳୟର ଶିକ୍ଷକ ଭଗବାନ ହିକକା ଜଣାଇଛନ୍ତି ।
ସେପଟେ ସେମିଳିଗୁଡା, ଦାମନଯୋଡି ଓ ଅନ୍ୟାନ୍ୟ ଅଞ୍ଚଳରେ ରହୁଥିବା ଏହି ଶିକ୍ଷକ ଶିକ୍ଷୟତ୍ରୀଙ୍କ ପାଇଁ ମଧ୍ୟ ସେହି ସ୍ଥାନକୁ ଯିବା କିଛି କମ କଷ୍ଟଦାୟକ ନୁହେଁ । ତଥାପି ପିଲାଙ୍କ ଆବଶ୍ୟକତାକୁ ଆଖିରେ ରଖି ସେମାନଙ୍କ ପାଖରେ ପହଞ୍ଚିବା ସହ ପ୍ରତ୍ୟେକ ବିଷୟକୁ ପ୍ରାଞ୍ଜଳ ଭାବରେ ବୁଝାଇବା ପାଇଁ ବ୍ୟବହାର ଉପଯୋଗୀ ଶିକ୍ଷଣ ସାମଗ୍ରୀକୁ ପ୍ରସ୍ତୁତ କରି ଛାତ୍ରଛାତ୍ରୀଙ୍କୁ ପଢ଼ାଇବାରେ ଲାଗିଛନ୍ତି ଶିକ୍ଷକ ଶିକ୍ଷୟିତ୍ରୀ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
