କୋରାପୁଟ: ଓଡିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ କୋରାପୁଟ ଜିଲ୍ଲାର 14ଟି ବ୍ଲକ ଓ 4 ଟି ପୌରାଞ୍ଚଳରେ ସମୁଦାୟ 18 ଟି ଉଚ୍ଚ ମାଧ୍ୟମିକ ବିଦ୍ୟାଳୟକୁ ବିଶ୍ୱବିଦ୍ୟାଳୟ ସହ ଯୋଡି ପିଲାଙ୍କ ମଧ୍ୟରେ ଉଚ୍ଚ ଶିକ୍ଷା ପ୍ରତି ସଚେତନତା ସୃଷ୍ଟି କରାଯିବ । ଏଥସହ ସହ ସେମାନଙ୍କ ମଧ୍ୟରେ ବିଶ୍ୱବିଦ୍ୟାଳୟ ପ୍ରତି ଆଗ୍ରହ ସୃଷ୍ଟି କରିବାର ପ୍ରୟାସ କରାଯିବ ବୋଲି ବିଶ୍ବବିଦ୍ୟାଳୟର କୁଳପତି ଆଇ.ରାମବ୍ରହ୍ମମ ଘୋଷଣା କରିଛନ୍ତି । ଓଡ଼ିଶା କେନ୍ଦ୍ରୀୟ ବିଶ୍ଵବିଦ୍ୟାଳୟ କୋରାପୁଟର 12ତମ ପ୍ରତିଷ୍ଠା ଦିବସ ଅବସରରେ ଏପରି କହିଥିଲେ ।
କେନ୍ଦ୍ରୀୟ ବିଶ୍ବବିଦ୍ୟାଳୟ 12 ତମ ପ୍ରତିଷ୍ଠା ଦିବସ ଅବସରରେ ଭାରତର ରାଷ୍ଟ୍ରପତି ତଥା ସମସ୍ତ କେନ୍ଦ୍ରୀୟ ବିଶ୍ୱବିଦ୍ୟାଳୟର ଭିଜିଟର୍ ରାମନାଥ କୋବିନ୍ଦ ବିଶ୍ୱବିଦ୍ୟାଳୟର ଉନ୍ନତି କାମନା କରିବା ସହିତ ଶୁଭେଚ୍ଛା ବାର୍ତ୍ତା ପ୍ରଦାନ କରିଥିଲେ । ମୂଲ୍ୟବୋଧ ଯୁକ୍ତ ଶିକ୍ଷାକୁ ଗୁରୁତ୍ଵ ଦେବା ସହିତ ସେ ଯୁବଶକ୍ତିର ପ୍ରତିଷ୍ଠା ନେଇ ନୂତନ ଆଶା ସଞ୍ଚାର କରିଥିଲେ । ସେହିଭଳି ଓଡିଶାର ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଶିକ୍ଷାର ମୂଳ ଭିତ୍ତି ଓ ଆଦର୍ଶ ପ୍ରସଙ୍ଗ ଉତ୍ଥାପନ କରିବା ସହିତ ଅତୀତ ଓ ସାଂପ୍ରତିକ ଭାରତର ମହତ୍ଵପୂର୍ଣ୍ଣ ଯୋଗଦାନକୁ ଉଲ୍ଲେଖ କରିଥିଲେ ।
କେନ୍ଦ୍ର ସରକାରଙ୍କ ମନ୍ତ୍ରିମଣ୍ଡଳର ଶିକ୍ଷାମନ୍ତ୍ରୀ ଡ. ରମେଶ ପୋଖରୀୟାଲ ‘ନିଶଙ୍କ’, ଓ ପେଟ୍ରୋଲିୟମ, ପ୍ରାକୃତିକ ଗ୍ୟାସ୍ ଓ ଇସ୍ପାତ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଅନ-ଲାଇନରେ ପାଳନ ହେଉଥିବା ପ୍ରତିଷ୍ଠା ଦିବସରେ ସାମିଲ ହୋଇଥିଲେ । ଏହି ଅବସରରେ ନୂତନ କେନ୍ଦ୍ରୀୟ ପାଠାଗାର, ଶୈକ୍ଷିକ-ଗୃହ, ଷ୍ଟାଫ-କ୍ଵାର୍ଟର, ଅଫିସ/ପ୍ରଶାସନିକ ଗୃହ ଆଦିର ଶୁଭ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା । ଶିକ୍ଷାମନ୍ତ୍ରୀ ମହାମାରୀ କୋଭିଡ-୧୯ ସମୟରେ ‘ଭରୋସା’ ଭଳି କାର୍ଯ୍ୟକ୍ରମ ଦ୍ଵାରା କୋରୋନା ବିରୋଧରେ ଏହି ବିଶ୍ବବିଦ୍ୟାଳୟ କରିଥିବା ସଚେତନତା ମୂଳକ କାର୍ଯ୍ୟ ସହିତ ଅନ-ଲାଇନ ପାଠପଢା ଏବଂ ପରୀକ୍ଷାକୁ ପ୍ରଶଂସା କରିଥିଲେ ।
ସେହିଭଳି ‘ନୂତନ ଶିକ୍ଷା ନୀତି -୨୦୨୦’ ଆଧାରରେ ଶିକ୍ଷା ଓ ତାହାର ବିବିଧ ଦିଗ ସମ୍ପର୍କରେ ଆଲୋଚନା କରିବା ସହିତ ତାହାର ସକରାତ୍ମକ ଦିଗଗୁଡ଼ିକୁ ସେ ଉଲ୍ଲେଖ କରିଥିଲେ । ‘ନାଲକୋ’ ଏବଂ ‘ହାଲ୍’ ଭଳି ଶିଳ୍ପସଂସ୍ଥା ସହିତ ଅନୁବନ୍ଧିତ ହୋଇ ଆଞ୍ଚଳିକ ବିକାଶ କ୍ଷେତ୍ରରେ କାର୍ଯ୍ୟ କରିବା ଉଚିତ ବୋଲି ଧର୍ମେନ୍ଦ୍ର କହିଥିଲେ । କେନ୍ଦ୍ର ସରକାରଙ୍କ ମୁଖ୍ୟ ଅର୍ଥ ପରାମର୍ଶଦାତା ତଥା ସୁଲେଖକ ଡ. ସଂଜୀବ ସାନ୍ୟାଲ୍ ଏହି ପ୍ରତିଷ୍ଠା ଦିବସର ବକ୍ତା ଭାବେ ନିଜର ବ୍ୟାପକ ଦୃଷ୍ଟିଭଙ୍ଗୀକୁ ବିଶ୍ୱବିଦ୍ୟାଳୟ ପରିପ୍ରେକ୍ଷୀରେ ଉପସ୍ଥାପନ କରିଥିଲେ । ଚଳିତ ବର୍ଷ ଓଡ଼ିଶା କେନ୍ଦ୍ରୀୟ ବିଶ୍ଵବିଦ୍ୟାଳୟର ଦ୍ଵାଦଶତମ ଦ୍ଵାଦଶ ପ୍ରତିଷ୍ଠା ଦିବସ ହୋଇଥିବାରୁ ଏହି ଅବସରରେ ୧୨ ଗୋଟି ବୃକ୍ଷ କୁଳପତିଙ୍କଦ୍ଵାରା ରୋପଣ କରାଯାଇଥିଲା । ଏହା ସହିତ ଦ୍ଵାଦଶ ପ୍ରତିଷ୍ଠା ଦିବସ ଅବସରରେ ଏକ ସ୍ମୃତିମୟ ଏକାଦଶ ବର୍ଷର ଅନୁଭୂତିକୁ ଭିତ୍ତି କରି ପ୍ରସ୍ତୁତ ହୋଇଥିବା ‘ସ୍ମରଣିକା’କୁ ଡ. ରମେଶ ପୋଖରୀୟାଲ ‘ନିଶଙ୍କ’ ଏବଂ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କଦ୍ଵାରା ମିଳିତ ଭାବେ ଉନ୍ମୋଚିତ ହୋଇଥିଲା
ବିଶ୍ବବିଦ୍ୟାଳୟର ସାମ୍ବାଦିକତା ଓ ଜନସଞ୍ଚାର ବିଭାଗର ଅଧ୍ୟାପକ ଡ. ସୌରଭ ଗୁପ୍ତା କାର୍ଯ୍ୟକ୍ରମର ସଂଚାଳନ କରିଥିବା ବେଳେ ଅନ୍-ଲାଇନ୍ ମାଧ୍ୟମରେ ଆୟୋଜିତ ହୋଇଥିବା ଏହି କାର୍ଯ୍ୟକ୍ରମକୁ କୋଭିଡ-୧୯ର ସମସ୍ତ ନିୟମକୁ ଆଖି ଆଗରେ ରଖି ପାଳନ କାରାଯାଇଥିଲା
କୋରାପୁଟରୁ ସିଏଚ.ଶାନ୍ତାକାର ଇଟିଭି ଭାରତ
