କୋରାପୁଟ: ହାଇକୋର୍ଟର ମୁଖ୍ୟ ବିଚାରପତି ଏସ ମୁରଲୀଧରନଙ୍କ ଦ୍ଵାରା ଜୟପୁରରେ ଉଦଘାଟିତ ହୋଇଛି ଡିଷ୍ଟ୍ରିକ୍ଟ କୋର୍ଟର ନୂତନ ଭବ୍ୟ ଭବନ । ଭର୍ଚ୍ଚୁଆଲ ମାଧ୍ୟମରେ ମୁଖ୍ୟ ବିଚାରପତି କୋର୍ଟର ଏହି ଭବନ ଉଦଘାଟନ କରିଛନ୍ତି । ଜିଲ୍ଲାର ନ୍ୟାୟିକ ପ୍ରକ୍ରିୟା ଏହା ମାଧ୍ୟମରେ ଆହୁରି ସୁଦୃଢ ହେବ ବୋଲି କହିଛନ୍ତି ମୁଖ୍ୟ ବିଚାରପତି ।
ଏହି କୋଠାରେ 4ଟି ଫ୍ଲୋର ରହିଥିବା ବେଳେ ପ୍ରାଥମିକ ପର୍ଯ୍ୟାୟରେ 13ଟି କୋର୍ଟ କାମ କରିବ । ନୂତନ ବିଲ୍ଡିଂ ପରିସରରେ ଭର୍ଚ୍ଚୁଆଲ ଉଦଘାଟନ ପାଇଁ ସ୍ବତନ୍ତ୍ର ବ୍ୟବସ୍ଥା ହୋଇଥିଲା । କୋରାପୁଟ ଭଳି ଏକ ଆଦିବାସୀ ଅଧ୍ୟୁଷିତ ଅଂଚଳରେ ନ୍ୟାୟିକ ପ୍ରକ୍ରିୟାକୁ ଆହୁରି ସୁଦୃଢ଼ କରିବାରେ ଏହା ସହାୟକ ହେବ ବୋଲି ହାଇକୋର୍ଟ ମୁଖ୍ୟ ବିଚାରପତି କହିଛନ୍ତି ।
ଏହି ଭର୍ଚ୍ଚୁଆଲ ଉଦଘାଟନୀ ସମୟରେ ବିଲ୍ଡିଂ କମିଟି ଚେୟାରମ୍ୟାନ ଶତ୍ରୁଘ୍ନ ପୂଜାହାରି, କୋରାପୁଟ ଜିଲ୍ଲା ପାଇଁ ନିଯୁକ୍ତ ହାଇକୋର୍ଟର ସ୍ବତନ୍ତ୍ର ଜଜ୍ ଏସ.କେ ପାଣିଗ୍ରାହୀ ପ୍ରମୁଖ ଉପସ୍ଥିତ ରହିଥିଲେ ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
