କୋରାପୁଟ: ଜାତୀୟ ଶିଶୁ ସୁରକ୍ଷା ଆୟୋଗ ଆନୁକୂଲ୍ୟରେ ଆସନ୍ତା ଅକ୍ଟୋବର ୪ ତାରିଖ ଦିନ କୋରାପୁଟରେ ଶିଶୁ ସୁରକ୍ଷା ଓ ଅଧିକାର ସମ୍ପର୍କିତ ଅଭିଯୋଗ ସଂଗ୍ରହ ଶିବିର ତଥା ଶୁଣାଣୀ ଆୟୋଜିତ ହେବ । ଏ ସଂକ୍ରାନ୍ତରେ ଆଜି ରାଜ୍ୟ ଶିଶୁ ସୁରକ୍ଷା କମିଶନ ଅଧ୍ୟକ୍ଷା ସଂଧ୍ୟାବତୀ ପ୍ରଧାନ କୋରାପୁଟ ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ପ୍ରଦାନ କରିଛନ୍ତି ।
କୋରାପୁଟ ଜିଲ୍ଲା ଭାରତ ସରକାରଙ୍କ ଦ୍ବାରା ଚୟନ କରାଯାଇଥିବା ୧୧୫ ଟି ଆସ୍ପୃହା ଜିଲ୍ଲା ମଧ୍ୟରୁ ଗୋଟିଏ ହୋଇଥିବା ଯୋଗୁଁ ନୀତି ଆୟୋଗର ନିର୍ଦେଶ କ୍ରମେ ଏହି ସ୍ବତନ୍ତ୍ର ଶିବିର ଆୟୋଜିତ ହେଉଥିବା ଶିଶୁ ସୁରକ୍ଷା କମିଶନ ଅଧ୍ୟକ୍ଷା ସଂଧ୍ୟାବତୀ କହିଛନ୍ତି । ଏହି ଶିବିରରେ ଜାତୀୟ ଓ ରାଜ୍ୟ ଶିଶୁ ଅଧିକାର କମିଶନ ଶିଶୁଙ୍କ ଶିକ୍ଷା, ସ୍ବାସ୍ଥ୍ୟ , ପୁଷ୍ଟିହୀନତା, ଦକ୍ଷତା ଓ ଆର୍ଥିକ ସ୍ବଚ୍ଛଳତା ପ୍ରଭୃତି କ୍ଷେତ୍ରରେ ସମସ୍ତ ଅଭିଯୋଗ ଗ୍ରହଣ କରି କିଛି କ୍ଷେତ୍ରରେ ସେହି ମୁହୂର୍ତ୍ତରେ ସମାଧାନ କରିବା ପାଇଁ ନିର୍ଦେଶନାମା ଜାରି କରିବା ସହିତ ଆଉ କିଛି ବିଷୟରେ ନିର୍ଦିଷ୍ଟ ସମୟସୀମା ମଧ୍ୟରେ ସମାଧାନ କରିବା ପାଇଁ ଜିଲ୍ଲା ପ୍ରଶାସନକୁ ନିର୍ଦେଶ ଦେବେ ବୋଲି ଜଣାପଡିଛି ।
ଜାତୀୟ ଶିଶୁ ଅଧିକାର ଆୟୋଗ ଦ୍ବାରା ଆୟୋଜିତ ହେଉଥିବା ଏହି ଶିବିରଟି ସମଗ୍ର ରାଜ୍ୟରେ ଆୟୋଗର ପ୍ରଥମ ଜିଲ୍ଲା ଭିତ୍ତିକ ଶୁଣାଣି ହେଉଛି । ଫଳରେ ଏହାର ସଫଳତା ପାଇଁ ଜିଲ୍ଲା ପ୍ରଶାସନ ବିଭିନ୍ନ ବିଭାଗ ସମେତ ଶିଶୁ ଅଧିକାରକୁ ନେଇ ଜିଲ୍ଲାରେ କାର୍ଯ୍ୟରତ ବିଭିନ୍ନ ସଂଗଠନର କର୍ମକର୍ତାଙ୍କ ସହ ବିସ୍ତୃତ ଆଲୋଚନା କରିବା ସହ ଗ୍ରାମାଞ୍ଚଳରୁ କିପରି ବହୁ ସଂଖ୍ୟାରେ ଅଭିଯୋଗ ଗୋଷ୍ଠୀ ଉନ୍ନୟନ ଅଧିକାରୀଙ୍କ ମାଧ୍ୟମରେ ଆୟୋଗଙ୍କ ପାଖକୁ ଶୁଣାଣି ନିମନ୍ତେ ପହଞ୍ଚି ପାରିବ ସେହି ଅନୁଯାୟୀ କାମ କରିବାକୁ ପରାର୍ମଶ ଦିଆଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
