କୋରାପୁଟ: ପ୍ରଶାସନିକ ଅବହେଳାର ମୂକସାକ୍ଷୀ ଭାବେ କୋରାପୁଟ ସହରରେ ବନ୍ଦ ପଡିଛି 7ବର୍ଷ ହେବ ଅନେକ ପ୍ରକଳ୍ପ । ପ୍ରକଳ୍ପମାନଙ୍କ ମଧ୍ୟରେ ଅଳସୀ ତେଲ ଘଣା, ଇଟା ତିଆରି ମେସିନ ସମେତ ଧୂପକାଠି ଓ ସାନିଟାରୀ ନାପକିନ ତିଆରି ମେସିନ । ଆଦିବାସୀଙ୍କୁ ଆତ୍ମନିର୍ଭରଶୀଳ କରାଇବାକୁ ୨୦୧୨ ମସିହାରେ କୋରାପୁଟ ସହରର ବିଭିନ୍ନ ସ୍ଥାନରେ ଏହି ସବୁ ପ୍ରକଳ୍ପର ଶୁଭାରମ୍ଭ କରାଯାଇଥିଲା ।
ଅଞ୍ଚଳର ଆଦିବାସୀଙ୍କ ଆପଣାର ଫସଲ ଅଳସୀରୁ ତେଲ ବାହାରକରି ବିକ୍ରିକଲେ ସେମାନେ ନିକ ଉତ୍ପାଦର ଉଚିତ ମୂଲ୍ୟ ପାଇପାରିବେ । ଫ୍ଲାଇଆସ ଇଟା ସମେତ ଅଗରବତୀ ଓ ସାନିଟାରୀ ନାପକିନ ତିଆରି କରି ସ୍ବୟଂ ସହାୟକ ମହିଳା ଗୋଷ୍ଠୀ ଆତ୍ମନିର୍ଭରଶୀଳ ହେବେ । ଏନେଇ ୨୦୧୨ ମସିହାରେ କୋରାପୁଟ ସହରର ବିଭିନ୍ନ ସ୍ଥାନରେ ଏହି ସବୁ ପ୍ରକଳ୍ପର ଶୁଭାରମ୍ଭ କରାଯାଇଥିଲା । ପ୍ରଶାସନିକ ଅବହେଳାର ଶୀକାର ହୋଇ ପ୍ରସ୍ଫୁଟିତ ହେବା ପୂର୍ବରୁ ହିଁ ମୃତପ୍ରାୟ ପଡିରହିଲା ପ୍ରକଳ୍ପ ।
ସୂଚନାଥାଉକି, ନୂଆ ନୂଆ ପ୍ରକଳ୍ପ କାର୍ଯ୍ୟ ଆରମ୍ଭ ସମୟରେ ଅଳସୀ ତେଲ ଘଣାରୁ ତେଲ ବାହାରିଥିଲା, ଇଟା ଛାଞ୍ଚରୁ ସୁନ୍ଦର ଇଟା ବାହାରି ବଜାରକୁ ଗଲା, ସ୍ବାବଲମ୍ବୀ ହେବାର ପ୍ରୟାସରେ ମହିଳାମାନେ ଧୂପକାଠି ଓ ସାନିଟାରୀ ନାପକିନ ତିଆରି କରୁଥିବା ଦେଖି ଜିଲ୍ଲାବାସୀ ଓ ପ୍ରଶାସନିକ ଅଧିକାରୀ ଆନନ୍ଦିତ ହୋଇ ଉଠିଥିଲେ। କିନ୍ତୁ କିଛିଦିନ ମଧ୍ୟରେ ସେତେବେଳର ଜିଲ୍ଲାପାଳଙ୍କ ବଦଳି ହୋଇଯିବା ପରେ ଅଚାନକ ଭାବେ ପ୍ରଶାସନିକ ସ୍ତରରେ ଏହି ପ୍ରକଳ୍ପ ଗୁଡିକ ପ୍ରତି ଦୃଷ୍ଟିଭଙ୍ଗୀରେ ପରିବର୍ତ୍ତନ ଘଟିବାରେ ଲାଗିଲା। ଦେଖୁ ଦେଖୁ ତେଲ ଘଣା ଓ ଇଟା ତିଆରି କଳ ବନ୍ଦ ପଡିଲା । ସେହିପରି ଧୂପକାଠି, ନାପକିନ ତିଆରି ଘରେ ତାଲା ପଡିଲା ।
ବର୍ତ୍ତମାନ ଜିଲ୍ଲାପାଳ ମଧୁସୂଦନ ମିଶ୍ର ପୁଣିଥରେ ଏହି ପ୍ରକଳ୍ପ ଗୁଡିକର ଅନୁଧ୍ୟାନ କରି ସମ୍ଭବ ହେଲେ ପୁନଃରୁଦ୍ଧାର କରିବାର ପ୍ରତିଶ୍ରୁତି ଦେବା ପରେ ନୂତନ ଆଶା ସଞ୍ଚାରିତ ହୋଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
