କୋରାପୁଟ: ସାରା ବିଶ୍ବରେ କୋରାପୁଟ କଫିର ଚାହିଦା ବଢୁଛି । ପ୍ରାକୃତିକ ସୌନ୍ଦର୍ଯ୍ୟ ଓ ଆଦିବାସୀଙ୍କ ପାଇଁ ପରିଚିତ ଥିବା କୋରାପୁଟ କଫି ପାଇଁ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛି । କୋରାପୁଟ ଜିଲ୍ଲାରେ ବେସରକାରୀ ଭାବେ 126 ଜଣ କଫି ଉଦ୍ୟୋଗୀ 896 ହେକ୍ଟର କଫି ଚାଷ କରିଥିବାବେଳେ, ସରକାରଙ୍କ ସହାୟତାରେ ଆଦିବାସୀ ଲୋକଙ୍କ ଦ୍ୱାରା 2089 ହେକ୍ଟର କଫି ଚାଷ କରାଯାଉଛି । ରାଜ୍ୟର ପ୍ରମୁଖ ସହର ତଥା ବାହାର ରାଜ୍ୟ ଓ ଆନ୍ତର୍ଜାତୀୟ ସ୍ତରରେ ଏଠାକାର କଫିର ଆଦରକୁ ବୃଦ୍ଧି କରାଯାଇପାରିଛି । କିନ୍ତୁ ଏସବୁ ସଫଳତା କେବଳ ଶୁଣିବାକୁ ମିଳୁଛି । କଫି ପାଇଁ ବିଶ୍ବ ସ୍ତରରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିବା କୋରାପୁଟରେ ଦେଖିବାକୁ ମିଳୁନି କଫିର ବ୍ୟବହାର ।
ସ୍ଥାନୀୟ ଅଞ୍ଚଳର ଚା' ଦୋକାନରେ କୋରାପୁଟ କଫିର ଚାହିଦା ଦେଖିବାକୁ ମିଳୁନାହିଁ । ଯେଉଁ ଗୋଟିଏ ଦୁଇଟି ସ୍ଥାନରେ କୋରାପୁଟ କଫି ପିଇବା ପାଇଁ ମିଳୁଛି ତାର ଉଚ୍ଚ ଦରଦାମ ଫଳରେ ସାଧାରଣ ଲୋକେ କଫି ଠାରୁ ଦୂରେଇ ରହୁଛନ୍ତି । ସରକାରୀ ଭାବେ TDCC ପକ୍ଷରୁ ବିକ୍ରି ହେଉଥିବା କୋରାପୁଟ କଫିର ଦାମ ଅପେକ୍ଷାକୃତ ଭାବେ ଅଧିକ ରହୁଛି । ତେଣୁ କଫି ଗୁଣ୍ଡ ଆଣି ବିକ୍ରି କରିବା ସମ୍ଭବ ହୋଇ ପାରୁନଥିବା ବ୍ୟବସାୟୀ କହିଛନ୍ତି । ଉଚ୍ଚ ଦରଦାମ ସହିତ ଛୋଟ ପ୍ୟାକ୍ ଉପଲବ୍ଧ ହେଉନଥିବା ଯୋଗୁଁ ଖୁଜୁରା ବ୍ୟବସାୟୀଙ୍କ ଦ୍ବାରା ଏହା କିଣିବା ସମ୍ଭବପର ହୋଇପାରୁନାହିଁ । ସଂସ୍ଥା ତରଫରୁ କୋରାପୁଟ ବଜାରରେ ନିଜସ୍ବ କଫିକୁ ବିକ୍ରି କରାଇବା ପାଇଁ ଆଗ୍ରହ ଦେଖାଉନଥିବା କୁହାଯାଇଛି ।
ଏନେଇ କଫି ବ୍ୟବସାୟୀ କହିଛନ୍ତି, "କଫି ବୋର୍ଡ ଓ କୋରାପୁଟ କଫି ଡେଭେଲପମେଣ୍ଟ ଟ୍ରଷ୍ଟର ମିଳିତ ପ୍ରୟାସରେ କଫି ଚାଷକୁ ଏକ ଉଚ୍ଚତର ସ୍ଥାନରେ ପହଞ୍ଚାଇବ । କୋରାପୁଟ ଅଞ୍ଚଳରେ କଫି ଦାନାର ବିକ୍ରୟ ବାର୍ଷିକ ୧୨ କୋଟି ଟଙ୍କାରୁ ଉର୍ଦ୍ଧ୍ବ ହେଉଥିବାବେଳେ, ସରକାରୀ ପ୍ରୋତ୍ସାହନ ଓ ସ୍ଥାନୀୟ କଫି ଦୋକାନୀଙ୍କୁ ରିହାତି ଦରରେ କୋରାପୁଟ କଫି ଗୁଣ୍ଡ ଦିଆଯାଇ ପାରିଲେ ରାଜ୍ୟ ତଥା ଦେଶବିଦେଶରେ ଉତ୍ତମ ବଜାର ସୃଷ୍ଟି କରିଥିବା କୋରାପୁଟ କଫି ସ୍ଥାନୀୟ ଅଞ୍ଚଳରେ ମଧ୍ୟ ଆଦୃତ ହୋଇପାରନ୍ତା ।"
ଏହା ମଧ୍ୟ ପଢ଼ନ୍ତୁ: କୋଟିଆରେ ଆନ୍ଧ୍ର କରିବ ହାଇଡ୍ରୋ ପାୱାର ପ୍ରୋଜେକ୍ଟ ! ବୁଡିଯିବ ଓଡିଶା ଗାଁ
ଓଡ଼ିଶାର କୋରାପୁଟରେ କଫି ଚାଷ ପାଇଁ ଅନୁକୂଳ ଜଳବାୟୁ ରହିଥିବା ଯୋଗୁଁ ଏଠାରେ ୧୯୭୧ ମସିହାରେ ଜିଲ୍ଲା ପ୍ରଶାସନ ଆନୁକୁଲ୍ୟରେ କଫି ଚାଷ ଆରମ୍ଭ କରାଯାଇଥିଲା । 50 ବର୍ଷ ମଧ୍ୟରେ କୋରାପୁଟ ଜିଲ୍ଲାର ତିନି ହଜାର ହେକ୍ଟରରୁ ଉର୍ଦ୍ଧ୍ବ ଜମିରେ କଫି ଚାଷ କରାଯାଉଛି । ଜିଲ୍ଲାରେ ଅନ୍ୟୁନ 3 ହଜାର କ୍ଷୁଦ୍ର ଚାଷୀ ତଥା ଶତାଧିକ କଫି ଉଦ୍ୟୋଗୀ ଏହି ଚାଷ କରି ଲାଭାନ୍ଵିତ ହେଉଛନ୍ତି । କଫି ବଗିଚାରେ ପାଞ୍ଚ ହଜାରରୁ ଉର୍ଦ୍ଧ୍ୱ ଦିନ ମଜୁରିଆ ବର୍ଷ ତମାମ କାମ ପାଇଥାନ୍ତି । କଫି ଚାଷର ସମ୍ଭାବନା ଓ ଆଦିବାସୀ ବହୁଳ ଅଞ୍ଚଳରେ ଅର୍ଥନୈତିକ ବ୍ୟବସ୍ଥାରେ ଉନ୍ନତି ଆଣିବା ଦିଗରେ କଫିର ଯୋଗଦାନକୁ ଉପଲବ୍ଧି କରି ରାଜ୍ୟରେ କଫିକୁ ଦିଆଯାଇଥିବା ସ୍ବତନ୍ତ୍ର ମାନ୍ୟତା ଦିଆଯାଇଛି ।
ଇଟିଭି ଭାରତ, କୋରାପୁଟ
