କୋରାପୁଟ: କୁନ୍ଦୁଲି ପୀଡିତା ମାମଲାରୁ ହଟିବ ପରଦା । ପୀଡିତା ଓ ତାଙ୍କ ପରିବାରକୁ ନ୍ୟାୟ ଦେବାର ସମସ୍ତ ପ୍ରଚେଷ୍ଟା କରାଯିବ । ମାମଲାର ଅନୁସନ୍ଧାନ ପାଇଁ ନୂତନ ଭାବେ ଗଠିତ ଏସଆଇଟିର ବୈଠକ କୋରାପୁଟସ୍ଥିତ ଦକ୍ଷିଣ ପଶ୍ଚିମାଞ୍ଚଳ ଡ଼ିଆଇଜିଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି ।
ଦକ୍ଷିଣାଞ୍ଚଳ ଡ଼ିଆଇଜି ସତ୍ୟବ୍ରତ ଭୋଇ, ଉତ୍ତରାଞ୍ଚଳ ଡ଼ିଆଇଜି ହିମାଂଶୁ ଲାଲ ଓ ଦକ୍ଷିଣ ପଶ୍ଚିମାଞ୍ଚଳ ଡ଼ିଆଇଜି ସଫିନ ଅହମ୍ମଦଙ୍କୁ ନେଇ ଗଠିତ ଏହି ଏସଆଇଟି ସୋମବାର ପୀଡିତାଙ୍କ ଗାଁରୁ ଆସିଥିବା ପରିବାର ବର୍ଗଙ୍କ ସହ ଚର୍ଚ୍ଚା କରିଛନ୍ତି ।
2017ରେ କୁନ୍ଦୁଲି ନିକଟରେ ଜଣେ ନାବାଳିକାକୁ ଗଣଦୁଷ୍କର୍ମ ଅଭିଯୋଗ ହୋଇଥିଲା। ପରବର୍ତ୍ତୀ ସମୟରେ ସେହି ନାବାଳିକା ଆତ୍ମହତ୍ୟା କରିବା ପରେ ସରକାରଙ୍କ ଦ୍ବାରା ବିଭିନ୍ନ କମିଟି ଗଠନ କରାଯାଇ ଏହାର ତଦନ୍ତ କରାଯାଇଛି ।
ତେବେ ରାଜ୍ୟ ସରକାର ଉଚ୍ଚ ନ୍ୟାୟାଳୟର ଚାପରେ ଆସି ପୁଣିଥରେ ଏସଆଇଟି ଗଠନ କରି ତଦନ୍ତ ଆରମ୍ଭ କରିଛନ୍ତି । ସାମ୍ବାଦିକଙ୍କ ସହ କଥାବାର୍ତ୍ତା ହେବା ସମୟରେ ଦକ୍ଷିଣ ପଶ୍ଚିମାଞ୍ଚଳ ଡ଼ିଆଇଜି ସଫିନ ଅହମ୍ମଦ ତଦନ୍ତର ଧାରା ଠିକ ବାଟରେ ଚାଲିଛି ଓ ପୀଡିତାଙ୍କୁ ନ୍ୟାୟ ଦେବାରେ କେହି ପଛଘୁଞ୍ଚା ଦେବେ ନାହିଁ ବୋଲି ଜଣାଇଛନ୍ତି । ଘଟଣାରେ ପୀଡିତାଙ୍କ ପରିବାର ସିବିଆଇ ତଦନ୍ତ ଦାବି କରିବା ସହ ନ୍ୟାୟ ମିଳିଲା ପର୍ଯ୍ୟନ୍ତ ସଂଗ୍ରାମ ଜାରି ରହିବ ବୋଲି ସଂକଳ୍ପକୁ ଦୋହରାଇଛନ୍ତି ।
କୋରାପୁଟରୁ ସି.ଏଚ୍ ଶାନ୍ତାକାର, ଇଟିଭି ଭାରତ
