କୋରାପୁଟ: ନାମାଙ୍କନ ଦାଖଲର ଶେଷ ଦିନରେ କୋଟିଆ ପଞ୍ଚାୟତରେ ଦେଖିବାକୁ ମିଳିଛି ହାଇଡ୍ରାମା । କୋଟିଆ ପଞ୍ଚାୟତରେ ନିର୍ବାଚନ ପାଇଁ ସମସ୍ତ ରାଜନୈତିକ ଦଳ ସହମତି ଭିତ୍ତିରେ ପ୍ରାର୍ଥୀ ଦେବା ପାଇଁ ସ୍ଥିର ହୋଇଛି । କିନ୍ତୁ ଆଜି ଶେଷ ଦିନରେ ଜିଲ୍ଲା ପରିଷଦ ଓ ସରପଞ୍ଚ ପଦବୀ ପାଇଁ ଏକାଧିକ ପ୍ରାର୍ଥୀପତ୍ର ଦାଖଲ କରିଛନ୍ତି । ଯାହା କୋଟିଆରେ ପଞ୍ଚାୟତ ନିର୍ବାଚନକୁ ଆହୁରି ରୋଚକ କରିଛି ।
ଗତକାଲି ନିଷ୍ପତ୍ତି ଅନୁସାରେ କୋଟିଆ ପଞ୍ଚାୟତର ୱାର୍ଡ ମେମ୍ବର ଠାରୁ ଆରମ୍ଭ କରି ଜିଲ୍ଲା ପରିଷଦ ଆସନ ପାଇଁ ସର୍ବଦଳୀୟ ପ୍ରାର୍ଥୀ ଚୟନ କରାଯାଇ ତାକୁ ନିର୍ଦ୍ବନ୍ଦରେ ନିର୍ବାଚିତ କରିବା ପାଇଁ ସର୍ବଦଳୀୟ ବୈଠକରେ ନିଷ୍ପତ୍ତି ନିଆଯାଇଥିଲା । ନିଷ୍ପତ୍ତି ଅନୁଯାୟୀ କୋଟିଆ ପଞ୍ଚାୟତର ସମସ୍ତ 13 ଟି ଯାକ ୱାର୍ଡ ମେମ୍ବର ନିର୍ଦ୍ବନ୍ଦରେ ଚୟନ ହୋଇଛନ୍ତି । ତେବେ ଆଜି ନାମାଙ୍କନ ଦାଖଲର ଶେଷ ଦିନରେ କୋଟିଆ ପଞ୍ଚାୟତ ପାଇଁ ସରପଞ୍ଚ ପଦବୀ ପାଇଁ 9 ଜଣ ପ୍ରାର୍ଥୀ ଓ ଜିଲ୍ଳା ପରିଷଦ ଆସନ ପାଇଁ 3 ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଓହ୍ଲାଇଛନ୍ତି । ଯାହା କୋଟିଆ ପାଇଁ ଚିନ୍ତାର କାରଣ ପାଲଟିଛି । ତେବେ କୋଟିଆ ପାଇଁ ରାଜନୈତିକ ଦଳ ମାନେ ଯେଉଁ ଏକତା ପ୍ରଦର୍ଶନ କରିଥିଲେ ସେଥିରେ ରାଜନୈତିକ ଦଳ ମାନଙ୍କ ମଧ୍ୟ ଫାଟ ଥିବା ଜଳଜଳ ଦିଶୁଛି। ତେବେ ସେପଟେ ଆଲୋଚନା ମାଧ୍ୟମରେ ସରପଞ୍ଚ ଓ ଜିଲ୍ଲା ପରିଷଦ ଆସନ ମଧ୍ୟ ନିର୍ଦ୍ବନ୍ଦରେ ଚୟନ କରିବା ସମ୍ଭବ ହେବ ବୋଲି ବିଜେଡି ଜିଲ୍ଲା ସଭାପତି ଈଶ୍ବର ପାଣିଗ୍ରାହୀ ପ୍ରକାଶ କରିଛନ୍ତି।
ସୂଚନାଥାଉକି ଗତକାଲି ବିଜେଡି, ବିଜେପି ଓ କଂଗ୍ରେସ ସମେତ ସମସ୍ତ ରାଜନୈତିକ ଦଳର ନେତା ମାନେ ଏକତ୍ର ହୋଇ କୋଟିଆ ପ୍ରସଙ୍ଗରେ ଆଲୋଚନା କରିଥିଲେ । କୋଟିଆରେ ସହମତି ଭିତ୍ତିରେ ପ୍ରାର୍ଥୀ ଦେବା ପାଇଁ ସମସ୍ତ ରାଜନୈତକ ଦଳ ନିଷ୍ପତ୍ତି ନେଇଥିଲେ । ତେବେ ଏ ଭଳି ସ୍ଥିତିରେ ଆଗକୁ କୋଟିଆର ପଞ୍ଚାୟତ ନିର୍ବାଚନ କେଉଁ ମୋଡ ନେଉଛି ତାହା ଦେଖିବାକୁ ବାକି ରହିଲା ।
ସେପଟେ ଆଜି ଜିଲ୍ଲାରେ ନାମାଙ୍କନ ପତ୍ର ଦାଖଲ କରିବାର ଶେଷଦିନ ସୁଦ୍ଧା ଜିଲ୍ଲାରେ ସମୁଦାୟ 3777 ଜଣ ୱାର୍ଡ ମେମ୍ବର ପାଇଁ ପ୍ରାର୍ଥୀ ରହିଥିବା ବେଳେ 1135 ଜଣ ସରପଞ୍ଚ ପାଇଁ , 947 ଜଣ ସମିତି ସଭ୍ୟ ଓ 131 ଜଣ ଜିଲ୍ଲା ପରିଷଦ ଆସନ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । ଏନେଇ ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
