କୋରାପୁଟ: ଗୋଟିଏ ଦୁର୍ଘଟଣା ସବୁକିଛି ବଦଳାଇ ଦେଲା । ଦିନେ ପରିବାର ଚଳାଇବା ପାଇଁ କାମ କରୁଥିଲେ ହେଲେ ଏବେ ଶଯ୍ୟାଶାୟୀ । ବାପା ମାଆଙ୍କୁ ସାହାରା ଦେବା ବଦଳରେ ଏବେ ସାହା ଖୋଜୁଛନ୍ତି । ଆମେ କହୁଛୁ କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ମାଲିପୁଟ ପଞ୍ଚାୟତର ଖିରାପୁଟ ଗାଁର ଯୁବକ ମିଥୁନ ହନ୍ତାଳଙ୍କ କଥା । କାମକୁ ଯାଇଥିବାବେଳେ ଦୁର୍ଘଟଣାର ଶିକାର ହୋଇଥିଲେ ମିଥୁନ । ଟ୍ରାକ୍ଟର ଓଲଟି ଯିବା ଯୋଗୁଁ ତାଙ୍କ ଅଣ୍ଟାରେ ଶକ୍ତ ଆଘାତ ଲାଗିଥିଲା । ଅପରେସନ ହୋଇଥିଲା ହେଲେ ଅଣ୍ଟା ଏ ଯାଏଁ ସଳଖ ହୋଇନାହିଁ ଫଳରେ ବାପାମାଆଙ୍କ ସାହାରାରେ ଜୀବନ ଜିଉଁଛନ୍ତି ମିଥୁନ ।
ବର୍ଷକ ତଳେ କାମକୁ ଯାଇଥିଲେ ମିଥୁନ । ଏହି ସମୟରେ ଏକ ଦୁର୍ଘଟଣା ଘଟିଥିଲା । ଟ୍ରାକ୍ଟର ଓଲଟି ଯିବା ଯୋଗୁଁ ତାଙ୍କ ଅଣ୍ଟାରେ ଶକ୍ତ ଆଘାତ ଲାଗିଥିଲା। ଗୋଡ଼ ଦୁଇଟି ଅଚଳ ହୋଇଯିବାରୁ ତାଙ୍କୁ କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରୁ ତାଙ୍କୁ କଟକ ରେଫର୍ କରି ଦିଆଯାଇଥିଲା । ପରେ ସେଠାରୁ କଟକ ଏସସିବି ମେଡିକାଲ କଲେଜରେ ଦୁଇମାସ ଧରି ଚିକିତ୍ସା କରାଯାଇଥିଲା । କିନ୍ତୁ ସେଠାରେ ମଧ୍ୟ ମିଥୁନଙ୍କ ଅଣ୍ଟା ଭଲ ହୋଇନଥିଲା । ଔଷଧ ଦେଇ ଡାକ୍ତର ଘରକୁ ପଠାଇଦେଇଥିବା କହିଛନ୍ତି ମିଥୁନଙ୍କ ବାପା ସଇତା ହନ୍ତାଳ ।
ଏହା ବି ପଢନ୍ତୁ...ଶିକ୍ଷା ବ୍ୟବସ୍ଥାକୁ ଆଖିଠାର, ସ୍କୁଲରେ କାଠ ବୋହିଲେ ଛାତ୍ର
ଆର୍ଥିକ ଦୁଃସ୍ଥିତି ମଧ୍ୟ ଦେଇ ଗତି କରୁଥିବା ପରିବାର ସେତେବେଳକୁ ଧାର ଉଧାର କରି ଦେଢ଼ ଲକ୍ଷ ଟଙ୍କା ଖର୍ଚ୍ଚ କରିସାରିଥିଲେ । ହେଲେ ଫଳଶୂନ୍ୟ । ସେବେଠୁ ଶଯ୍ୟାଶାୟୀ ହୋଇଛନ୍ତି ମିଥୁନ। ଖିଆପିଆଠୁ ନେଇ ସମସ୍ତ ନିତ୍ୟକ୍ରମ ବୁଝୁଛନ୍ତି ପରିବାର । ମିଥୁଙ୍କୁ ବିଶାଖାପାଟଣାରେ ଡାକ୍ତରଙ୍କ ପାଖକୁ ନେଇଯାଇଥିଲା କିନ୍ତୁ ଅର୍ଥାଭାବ ଯୋଗୁଁ ଅଧିକ ଚିକିତ୍ସା ହୋଇପାରିନଥିଲା । ବର୍ତ୍ତମାନ ଖଟ ଉପରେ ମିଥୁନ ଶୋଇ ରହିଛନ୍ତି । ଭେଣ୍ଡିଆ ପୁଅରୁ ଏ ଅବସ୍ଥା ଯୋଗୁଁ ବାପା ମାଆଙ୍କ ଚିନ୍ତାରେ ପଡିଛନ୍ତି ।
କିଛିଦିନ ପୂର୍ବେ ଶୋଭା ସଂଗଠନର କର୍ମକର୍ତ୍ତାଙ୍କ ସହଯୋଗରେ ପଟ୍ଟାଙ୍ଗିରେ ଅନୁଷ୍ଠିତ ହେଉଥିବା ଭିନ୍ନକ୍ଷମ ଶିବିରରେ ପରୀକ୍ଷା କରାଇବା ଫଳରେ 500 ଟଙ୍କାର ଭିନ୍ନକ୍ଷମ ଭତ୍ତା ପାଉଛନ୍ତି । କିନ୍ତୁ ଉନ୍ନତ ସ୍ବାସ୍ଥ୍ୟସେବା ପାଇବା ପାଇଁ ସରକାରଙ୍କ ତରଫରୁ ସହଯୋଗ କରାଗଲେ ମିଥୁନ ପୁଣି ଚାଲିପାରିବେ ବୋଲି ବାପା ଆଶା ବାନ୍ଧିଛନ୍ତି । ମିଥୁନଙ୍କୁ ରାଜ୍ୟ ସରକାରଙ୍କ ପକ୍ଷରୁ କିଛି ଆର୍ଥିକ ସହାୟତା ମିଳିଲେ ଏହା ସମ୍ଭବ ହୋଇପାରନ୍ତା ।
ଇଟିଭି ଭାରତ, କୋରାପୁଟ
