ବ୍ରହ୍ମପୁର: ଅଦିନିଆ ବର୍ଷା ଉଜାଡିଦେଲା ଧାନ । ଚାଷ ଜମିରେ ଏବେ ଆଣ୍ଠୁଏ ଲେଖାଏଁ ପାଣି । କଟା ଯାଇଥିବା ଧାନ ଏବେ ପାଣିରେ ଭାସୁଛି । ଚାଷୀର ବର୍ଷକର ଭରସା ଏବେ ତିନି ଦିନିଆ ଲଗାଣ ବର୍ଷା ଭାଙ୍ଗିଦେଇଛି । ଗଞ୍ଜାମ, ଖୋର୍ଦ୍ଧା ପୁରୀ, କଟକ, ଜଗତସିଂହପୁର, ବାଲେଶ୍ୱର ସବୁଠି ସମାନ ଅବସ୍ଥା । ଏଭଳି ସ୍ଥିତିରେ ଗଞ୍ଜାମର ବିଭିନ୍ନ ଅଞ୍ଚଳ ବୁଲି ଚାଷ ଜମିରେ ପହଞ୍ଚି ସ୍ଥିତି ଅନୁଧ୍ୟାନ କରିବା ସହିତ ଚାଷୀଙ୍କ ସହିତ ଆଲୋଚନା କରିଛନ୍ତି ରାଜ୍ୟ ସଡକ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ।
ବର୍ଷା ପାଣିରେ ବୁଡି ରହିଛି ଧାନ
ଯେଉଁ ସମୟରେ ଚାଷୀ ତାର ଅମଳ ଧାନକୁ କାଟି ମଣ୍ଡିରେ ନେଇ ବିକ୍ରି କରିଥାନ୍ତା ସେହି ସମୟରେ ଧାନ ବିଲରେ ବର୍ଷା ପାଣିରେ ବୁଡି ରହିଛି ଅମଳ ହୋଇଥିବା ଏକର ଏକର ଧାନ । ଗଞ୍ଜାମ ଜିଲ୍ଲାର ୨୨ଟି ବ୍ଲକର ଚାଷୀ ଏବେ ଚିନ୍ତାରେ । ଗଞ୍ଜାମ ୨୩ ତାରିଖରୁ ଧାନ ମଣ୍ଡିରେ ବିକ୍ରି ହେବା ନେଇ ଧାର୍ଯ୍ୟ କରାଯାଇଥିବା ବେଳେ ଏବେ ଧାନ ଅମଳ କିପରି ହେବ ସେନେଇ ଚିନ୍ତାରେ ଚାଷୀ । ସେପଟେ ବର୍ଷା ପାଣିରେ ବୁଡି ରହିବା ଯୋଗୁଁ ଧାନର FAQ ମାନରେ କମିପାରେ । ସରକାର ଧାନ କ୍ୱିଣ୍ଟାଲ ପିଛା ୩୧ଶହ ଟଙ୍କା ଘୋଷଣା କରିଥିବା ବେଳେ FAQ ମାନ କମିଲେ ସେହି ମୂଲ୍ୟରେ ଧାନ ବିକ୍ରି ହେବ କି ନାହିଁ ସେନେଇ ମଧ୍ୟ ଚାଷୀ ଚିନ୍ତାରେ ।
ଧାନ ବିଲ ବୁଲି ସ୍ଥିତି ପରଖିଲେ ମନ୍ତ୍ରୀ
ଆଜି(ରବିବାର) ସକାଳୁ ସକାଳୁ ଗୋପାଳପୁର ନିର୍ବାଚନ ମଣ୍ଡଳୀର ଗୋଳନ୍ଥରା, କୁକୁଡାଖଣ୍ଡି ବ୍ଲକର ବିଭିନ୍ନ ଅଞ୍ଚଳ ବୁଲି ଧାନ ବିଲର ସ୍ଥିତି ଦେଖିଛନ୍ତି ମନ୍ତ୍ରୀ ବିଭୂତି ଭୂଷଣ ଜେନା । ଏଥିସହ କ୍ଷତିଗ୍ରସ୍ତ ଚାଷୀମାନଙ୍କ ସହ ଆଲୋଚନା ମଧ୍ୟ କରିଛନ୍ତି ମନ୍ତ୍ରୀଙ୍କ ସହ କନିଷି ତହସିଲଦାର କବିରାଜ ପ୍ରଧାନ, କୃଷି ଅଧିକାରୀ ଶୁଭଶ୍ରୀ ଜେନା ପ୍ରମୁଖ ଉପସ୍ଥିତ ରହି ଚାଷ ଜମି ଅନୁଧ୍ୟାନ କରିଛନ୍ତି । ଏହି ଅଞ୍ଚଳରେ ଚାଷୀମାନଙ୍କର ହୋଇଥିବା କ୍ଷୟକ୍ଷତି ଆକଳନ କରି ରାଜ୍ୟ ସରକାରଙ୍କୁ ରିପୋର୍ଟ ଦିଆଯିବ ବୋଲି ମନ୍ତ୍ରୀ କହିଛନ୍ତି । ଆଉମଧ୍ୟ ଚାଷୀମାନଙ୍କୁ ଉପଯୁକ୍ତ ମୂଲ୍ୟ ମିଳିବ ବୋଲି ମନ୍ତ୍ରୀ କହିଛନ୍ତି ।
FAQ ମାନର ଯାଞ୍ଚ ପାଇଁ ଅଧିକ କଟକଣା ନ ରଖିବା ପାଇଁ ଚାଷୀଙ୍କ ଦାବି
ଏନେଇ ମନ୍ତ୍ରୀ ବିଭୂତିଭୂଷଣ ଜେନା କହିଛନ୍ତି," ଆମେ ଆଶା କରୁଛି ପାଗ ଖୁବଶୀଘ୍ର ବଦଳିଯାଉ । ଚାଷୀ ତା ଧାନଗୁଡିକୁ ବିକୁ । ଚାଷୀ ଧାନ ଯେପରି ୩୧ ଶହ ଟଙ୍କାରେ ବିକ୍ରି କରିବ ସେନେଇ ଆମେ ସୁନିଶ୍ଚିତ କରୁଛୁ । ଚାଷୀର ପଇସା ଚାଷୀ ପାଇବ । ଧାନର FAQ ମାନର ଯାଞ୍ଚ ପାଇଁ ଅଧିକ କଟକଣା ନ ରଖିବା ପାଇଁ ଚାଷୀମାନେ ଅନୁରୋଧ କରିଛନ୍ତି ଓ ଏହାକୁ ଆମେ ସରକାରଙ୍କୁ ଜଣାଇବୁ । ସରକାର ମଧ୍ୟ ଚାଷୀଙ୍କ ପାଇଁ ସମ୍ବେଦନଶୀଳ ଅଛନ୍ତି ।"
ଉପଯୁକ୍ତ ମୂଲ୍ୟରେ ଧାନ କିଣିବାକୁ ଦାବି
ଅନ୍ୟପଟେ ଜଣେ କ୍ଷତିଗ୍ରସ୍ତ ଚାଷୀ କହିଥନ୍ତି, "ଲଘୁଚାପ ବର୍ଷାରେ କଟାଯାଇଥିବା ଧାନ ବିଲରେ ପାଣି ପଶିଯାଇଛି । କଟା ହୋଇଥିବା ଧାନଗୁଡିକ ପାଣିରେ ପଡିରହିଛି । ସରକାରଙ୍କୁ ଏତିକି ଅନୁରୋଧ କରୁଛୁ ଚାଷୀ ଋଣ ଛାଡ କରାଯାଉ, FAQ ମାନର ଧାନ ଯେଉଁ ଦାମରେ କହୁଥିଲେ ସେହି ଦାମରେ ଏହି ଧାନ ସରକାର ନିଅନ୍ତୁ । ଯାହା ଦ୍ୱାରା ଚାଷୀ ଉପକୃତ ହେବେ ।"
ଏହାମଧ୍ୟ ପଢନ୍ତୁ.. ବିଲରେ ଭାସୁଛି ଧାନ, ବର୍ଷକର ରୋଜଗାର ପାଣିରେ ପକାଇ ଦେଲା ବର୍ଷା ଲଘୁଚାପ ବର୍ଷାରେ ଭିଜିଲା ଓଡ଼ିଶା, ପାଚିଲା ଧାନକୁ ନେଇ ଚିନ୍ତାରେ ଚାଷୀ |
ଇଟିଭି ଭାରତ, ବ୍ରହ୍ମପୁର
