ଆମେ ଓବିସି ନୁହେଁ ଆଦିବସୀ, ଆମକୁ ଆମ ମାନ୍ୟତା ମିଳୁ : କୋରାପୁଟ ବନବାସୀ ମହାସଭା

ରାଜ୍ୟ ସରକାରଙ୍କ ଦ୍ଵାରା ଆରମ୍ଭ କରାଯାଉଥିବା ପଛୁଆ ବର୍ଗ ଜନ ଗଣନାକୁ ନେଇ ଅସନ୍ତୁଷ୍ଟ ଆଦିବାସୀ । କୋରାପୁଟର ବିଭିନ୍ନ ଅଞ୍ଚଳରେ ଆଦିବାସୀ ମାନ୍ୟତା ପାଇଁ ଦାବି ଜୋର ଧରିଛି । ଅଧିକ ପଢ଼ନ୍ତୁ

କୋରାପୁଟ: ଆସନ୍ତାକାଲି(ସୋମବାର) ଦିନ ଠାରୁ କୋରାପୁଟ ଜିଲ୍ଲାରେ ଓବିସି ଜନସଂଖ୍ୟା ସର୍ଭେ ଆରମ୍ଭ । ରାଜ୍ୟ ସରକାରଙ୍କ ଦ୍ଵାରା ଆରମ୍ଭ କରାଯାଉଥିବା ପଛୁଆ ଗଣନାକୁ ନେଇ ଅସନ୍ତୁଷ୍ଟ ଆଦିବାସୀ । କୋରାପୁଟର ବିଭିନ୍ନ ଅଞ୍ଚଳରେ ଆଦିବାସୀ ମାନ୍ୟତା ପାଇଁ ଦାବି ଜୋର ଧରିଛି । ବର୍ଷବର୍ଷ ଧରି ଦାବି କରିଆସୁଥିଲେ ମଧ୍ୟ ନା ମାନ୍ୟତା ମିଳିଛି ନା ସରକାରଙ୍କ କିଛି ସୁବିଧା ବୋଲି ଅଭିଯୋଗ କରିଛନ୍ତି ଆଦିବାସୀ । ଆଜି କୋରାପୁଟସ୍ଥ କୋଟସ ସଭାଗୃହରେ ଅବିଭକ୍ତ କୋରାପୁଟ ଜିଲ୍ଲା ବନବାସୀ ମହାସଭା ଏକ ସାମ୍ବାଦିକ ସମ୍ମିଳନୀ ଆୟୋଜିତ କରିଥିଲେ । ଓବିସି ଜନଗଣନା ଆଦିବସୀଙ୍କୁ ଭୂଆଁ ବୁଲାଇବା ପାଇଁ ଏକ ଚାଲ ବୋଲି ଅଭିଯୋଗ କରିଛି କୋରିପୁଟ ବନବାସୀ ମହାସଭା ।

କୋରାପୁଟ ବନବାସୀ ମହାସଭା ଉପ ସଭାପତି ଦାଶରଥି ମାଳି କହିଛନ୍ତି , "ଆଦିବାସୀ ନିଜ ହକ ପାଇବା ପାଇଁ ଦୀର୍ଘ ଧରି ଦାବି କରି ଆସୁଛନ୍ତି । କିନ୍ତୁ ସେମାନଙ୍କୁ ଓବିସି ତାଲିକା ଭୁକ୍ତ କରି ସରକାର ଏହି ଆନ୍ଦୋଳନକୁ ଚପାଇ ଦେବକୁ ଚକ୍ରାନ୍ତ କରୁଛନ୍ତି । କୋରାପୁଟରେ ଆଦିବାସୀଙ୍କୁ ମାନ୍ୟତା ମିଳୁନି । ଫଳରେ ସରକାରୀ ସୁବିଧା ସୁଯୋଗରୁ ସେମାନେ ବଞ୍ଚିତ ହେଉଛନ୍ତି । ପଟ୍ଟାଙ୍ଗୀରେ କୋଟିଆର ବିବାଦୀୟ ୨୧ଟି ଗ୍ରାମ ଓ ନନ୍ଦପୁରର ଅଧିକାଂଶ ଲୋକଙ୍କୁ ଆଦିବାସୀ ମାନ୍ୟତା ମିଳିନି । ବାରମ୍ବାର ଦାବି ହୋଇଥିଲେ ସୁଦ୍ଧା ଫଳ ଶୂନ । ନିର୍ବାଚନ ସମୟରେ ସରକାର ପ୍ରତିଶ୍ରୁତି ତ ଦେଉଛନ୍ତି ହେଲେ ପୂରଣ କରୁନାହାନ୍ତି । ସ୍ବାଧୀନତା ପୂର୍ବରୁ ଇଂରେଜ ସରକାର କୋରାପୁଟର ପାର୍ବତ୍ୟାଞ୍ଚଳରେ ବସବାସ କରି ଜୀବିକା ନିର୍ବାହ କରିଆସୁଥିବା ଲୋକଙ୍କୁ ହିଲ୍‌ ଟ୍ରାଇବର ମାନ୍ୟତା ଦେଇଥିଲେ । କିନ୍ତୁ ଦେଶ ସ୍ବାଧୀନତା ପାଇବା ପରେ ପଡ଼ୋଶୀ ଆନ୍ଧ୍ରପ୍ରଦେଶ ଏହି ସମସ୍ତ ଅଧିବାସୀଙ୍କୁ ଆଦିବାସୀର ମାନ୍ୟତା ପ୍ରଦାନ କରିଥିବା ବେଳେ ଓଡିଶା ସରକାର ଓବିସି କହି ଠକୁଛନ୍ତି ।"

ଏହାକୁ ନେଇ ଶତାଧିକ ଅଦିବାସୀ ସରକାରଙ୍କ ଉପରେ ଆକ୍ରୋଶମୂଳକ ମନୋଭାବ ପୋଷଣ କରିଛନ୍ତି । ରାଜ୍ୟ ସରକାର ଆଦିବାସୀ ମାନ୍ୟତା ପ୍ରଦାନର ଦାୟିତ୍ୱ କେନ୍ଦ୍ର ସରକାରଙ୍କର ବୋଲି କହି ନିଜ ଦାୟିତ୍ବରୁ ଖସିଯିବା ପାଇଁ ଚେଷ୍ଟା କରୁଥିବା ଅଭିଯୋଗ ହୋଇଛି । ଏଥି ସହିତ ଓବିସି ତାଲିକାଭୁକ୍ତ ନହେବା ପାଇଁ ବନବାସୀ ଆନ୍ଦୋଳନ କରିଛନ୍ତି । ଆସନ୍ତା 2024ରେ ହେବାକୁ ଥିବା ସାଧାରଣ ନିର୍ବାଚନରେ ବନବାସୀ ଉଚିତ୍‌ ଜବାବ ଦେବେ ବୋଲି ସେ ଚେତାବନୀ ଦେଇଛନ୍ତି ।

ଇଟିଭି ଭାରତ, କୋରିପୁଟ