କୋରାପୁଟ: ଅଖ୍ୟାତ ପଲ୍ଲୀରୁ ‘Super-30’ । ପ୍ରେଷ୍ଟିଜିଅସ୍ ସମ୍ମାନରେ ସମ୍ମାନିତ ହେଲେ ଲାଛନାଗୁଡା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ରାମକୃଷ୍ଣ ସାବତ । ହାଇଦ୍ରାବାଦର ଇଣ୍ଟରନ୍ୟାସନାଲ୍ କନଭେନସନ ସେଣ୍ଟରରେ ‘I Build Enovation’ ତରଫରୁ ଆୟୋଜିତ ‘Super-30’ ଆୱାର୍ଡରେ ତାଙ୍କୁ ସମ୍ମାନିତ କରାଯାଇଛି ।
ଆଦିବାସୀ ଇଲାକାର ଶିକ୍ଷାର ପୂଜାରୀ ରାମକୃଷ୍ଣ ସାର୍ଙ୍କ ପାଇଁ ‘Super-30’ ଯାତ୍ରା ଏତେ ସହଜ ନଥିଲା । ଲୋକେ ନିଜ ସୁନେଲି ଭବିଷ୍ୟତର ରଙ୍ଗିନ ସ୍ବପ୍ନରେ ମଜିଥିବା ବେଳେ ପିଲାଙ୍କ ଭବିଷ୍ୟତ କଥା ଚିନ୍ତାକରୁଥିଲେ ରାମକୃଷ୍ଣ ସାର୍ । ଘୋର ଅଭାବ ଅସୁବିଧା ସତ୍ତ୍ବେ ମାଗିଯାଚି ସ୍ଥାନୀୟ ଲୋକଙ୍କ ସହାୟତାରେ 1991 ମସିହାରେ ସେ ପ୍ରତିଷ୍ଠା କରିଥିଲେ ଲାଛନାଗୁଡା ଉଚ୍ଚ ପ୍ରାଥମିକ ବିଦ୍ୟାଳୟ । ତାଙ୍କ ପ୍ରଚେଷ୍ଟା ଯୋଗୁଁ ଆଜି ସ୍କୁଲର ଏରୁଣ୍ଡି ମାଡି ପାରିଛନ୍ତି ହଜାର ହଜାର ପିଲା । ନିଜ ଜୀବନର 29 ବର୍ଷ ସେ ପିଲାଙ୍କ ପାଇଁ ଉତ୍ସଗୀକୃତ କରିଦେଇଛନ୍ତି । ରାମକୃଷ୍ଣ ସାର୍ଙ୍କ ପାଇଁ ସ୍କୁଲରୁ ବହୁ ପ୍ରତିଭାବାନ ଛାତ୍ରଛାତ୍ରୀ ଜନ୍ମ ନେଇଛନ୍ତି ।
ତେବେ ଗୁଣ ଚିହ୍ନେ ଗୁଣିଆ ପରି, ରାମକୃଷ୍ଣ ସାରଙ୍କ ଉତ୍ସର୍ଗକୁ ଚିହ୍ନି ପାରିଛି ‘IB HUBS’ । 30 ହଜାର ଶିକ୍ଷକଙ୍କୁ ପଛରେ ପକାଇ ସୁପର-30ସମ୍ମାନ ପାଇଛନ୍ତି ସେ । ସୂର୍ଯ୍ୟଙ୍କ ଭଳି ଅହରହ ଜଳି ଶିକ୍ଷାର ଅନ୍ଧାରକୁ ଦୂର କରିଥିବା ସାବତ ସାରଙ୍କ ଏହି ଯାତ୍ରା ଅନ୍ୟଙ୍କୁ ପ୍ରେରଣା ଯୋଗାଇବ ନିଶ୍ଚୟ ।
ହାଇଦ୍ରାବାଦରୁ ରମ୍ୟାଙ୍କ ରିପୋର୍ଟ, ଇଟିଭି ଭାରତ
