କୋରାପୁଟ: ଖୋଲା ତାରରେ ଲୁଗା ଶୁଖାଇବା ହେଲା କାଳ । ଏକାସାଙ୍ଗରେ ଚାଲିଗଲା ସ୍ବାମୀ ଓ ସ୍ତ୍ରୀଙ୍କ ଜୀବନ । ସୁନାବେଡା ପୋଲିସ କଲୋନୀରେ ରହୁଥିବା ଏକ ଦମ୍ପତ୍ତି ଖୋଲା ତାରରେ ଲୁଗା ଶୁଖାଉଥିବା ବେଳେ ବିଦ୍ୟୁତ ଆଘାତ ପାଇ ଦୁଇଜଣଙ୍କର ମୃତ୍ୟୁ ହୋଇଛି ।
ସୂଚନାନୁୟାୟୀ, ପୋଲିସ କଲୋନୀରେ ରହୁଥିବା ସୁଧାକର ବିଶ୍ବାଳ ଆଜି ସକାଳେ ଗାଧେଉ ଥିବାବେଳେ ଗାଧୁଆ ଘରେ ଟଙ୍ଗା ହୋଇଥିବା ତାର ଉପରେ ଓଦା ଲୁଗା ଶୁଖାଇଥିଲେ । ହଠାତ୍ ସେ ବିଦ୍ୟୁ ଆଘାତ ପାଇ ଚିତ୍କାର କରିଥିଲେ । ସ୍ବାମୀଙ୍କ ପାଟି ଶୁଣି ଚଞ୍ଚଳା ବିଶ୍ବାଳ ଧାଇଁ ଯାଇ ତାଙ୍କୁ ଟାଣି ଆଣିବାକୁ ଚେଷ୍ଟା କରି ସେ ମଧ୍ୟ ବିଦ୍ୟୁତ ଆଘାତର ଶିକାର ହୋଇଯାଇଥିଲେ । ଉଭୟଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି ।
ତେବେ ଲୁଗା ଟଙ୍ଗା ହୋଇଥିବା ତାର ସହ ଇମର୍ଶନ ହିଟରକୁ ବିଦ୍ୟୁତ ସଂଯୋଗ କରିଥିବା ଖୋଲା ତାର ଲାଗିରହିଥିବା ଯୋଗୁଁ ଏହି ଦୁର୍ଘଟଣା ଘଟିଥିବା ଜଣାପଡିଛି । ମୃତ ବ୍ୟକ୍ତି ସୁନାବେଡା ମୁନିସିପାଲିଟି କାର୍ଯ୍ୟାଳୟରେ ଖଜଣା ଆଦାୟ ଅଧିକାରୀ ଭାବେ କାର୍ଯ୍ୟରତ ଥିଲେ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
